پاکستان اور سعودی کمپنی کا ترکمانستان سے گوادر تک گیس پائپ لائن کے لیے مفاہمتی یادداشت پر دستخط

مجوزہ منصوبے پر 25 سے 30 ارب ڈالر سرمایہ کاری کا تخمینہ، پائپ لائن افغانستان سے ہوتی ہوئی چمن کے قریب پاکستان میں داخل ہو گی اور بلوچستان سے گزر کر گوادر تک پہنچے گی۔

پاکستان کی سرکاری کمپنی انٹر سٹیٹ گیس سسٹمز اور سعودی عرب میں قائم کمپنی ڈیلٹا انرجی سعودی نے 17 نومبر 2026 کو مفاہمتی یادداشت پر دستخط کیے (آئی ایس جی ایس)

پاکستان کی سرکاری کمپنی انٹر سٹیٹ گیس سسٹمز (آئی ایس جی ایس) اور سعودی عرب میں قائم کمپنی ڈیلٹا انرجی سعودی (ڈی ای ایس) نے منگل کو ترکمانستان سے افغانستان کے راستے پاکستان کے شہر گوادر تک گیس پائپ لائن بچھانے کے منصوبے کی فزیبلٹی مشترکہ طور پر جانچنے کے لیے مفاہمتی یادداشت پر دستخط کر دیے ہیں۔

آئی ایس جی ایس کی جانب سے جاری پریس ریلیز میں بتایا گیا کہ خصوصی سرمایہ کاری سہولت کونسل (ایس آئی ایف سی) کے زیر اہتمام ہونے والی تقریب میں مفاہمتی یادداشت پر دستخط کیے گئے۔ تقریب میں ایس آئی ایف سی، پیٹرولیم ڈویژن، آئی ایس جی ایس اور ڈیلٹا انرجی کے اعلیٰ حکام نے شرکت کی۔

پریس ریلیز کے مطابق آئی ایس جی ایس پیٹرولیم ڈویژن کے ماتحت پاکستان کی سرکاری کمپنی ہے، جبکہ ڈیلٹا انرجی سعودی، ڈیلٹا انٹرنیشنل گروپ کا حصہ اور سعودی عرب میں قائم کمپنی ہے۔

مجوزہ منصوبے پر 25 سے 30 ارب ڈالر کی سرمایہ کاری کا تخمینہ لگایا گیا ہے۔ منصوبے کے تحت گیس پائپ لائن ترکمانستان سے افغانستان کے راستے پاکستان میں داخل ہو گی، جہاں یہ چمن کے قریب سرحد عبور کرنے کے بعد بلوچستان سے گزرتی ہوئی گوادر تک پہنچے گی۔

منصوبے میں گوادر میں مائع قدرتی گیس (ایل این جی) ٹرمینل کی تعمیر بھی شامل ہے، جبکہ بعد کے مرحلے میں پائپ لائن کو دیگر مقامات تک توسیع دینے کا منصوبہ بھی زیر غور ہے۔

پریس ریلیز کے مطابق مجوزہ گیس پائپ لائن منصوبے کا مقصد پاکستان کی انرجی سکیورٹی کو مضبوط بنانا، گیس کی فراہمی کے ذرائع میں تنوع پیدا کرنا اور علاقائی روابط کو فروغ دینا ہے۔

روئٹرز کے مطابق پروگرام میں پاکستان کے افغانستان سے متصل سرحدی شہر چمن سے ایک پائپ لائن بچھانے کا منصوبہ بھی شامل ہے، جو پاکستان سے گزرتے ہوئے انڈین سرحد کے قریب واقع علاقے فاضلکا تک پہنچے گی۔

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

ڈیلٹا انرجی نے اس راستے کو ’بنیادی تزویراتی عزم‘ قرار دیا ہے، جس کے لیے پاکستانی اور انڈٰین حکام کے ساتھ باضابطہ رابطے اور معاہدوں کی ضرورت ہوگی۔

پاکستان میں گیس کی فراہمی کے لیے دیگر پائپ لائن منصوبوں پر بھی ماضی میں کام کرنے کے منصوبے بنائے گئے تھے، تاہم ان میں کئی برس سے تاخیر کا سامنا ہے۔

ڈیلٹا انرجی نے ممکنہ ذرائع میں افغانستان کے علاقے کشک میں گیس کے ذخائر اور افغانستان کے دیگر وسائل کی نشاندہی کی ہے۔

کمپنی کے مطابق یہ پروگرام ترکمانستان، افغانستان، پاکستان اور انڈیا (تاپی) گیس پائپ لائن منصوبے سے الگ ہے اور اس کا انحصار ترکمانستان پر نہیں ہوگا۔

معاہدہ ان منصوبوں کے جائزے کے لیے ایک فریم ورک فراہم کرتا ہے، تاہم یہ حتمی سرمایہ کاری کا فیصلہ نہیں ہے اور نہ ہی اس کے تحت منصوبوں کی مالی معاونت یا تعمیر کا کوئی حتمی وعدہ کیا گیا ہے۔

زیادہ پڑھی جانے والی معیشت