سابق نگران وزیراعظم انوار الحق کاکڑ کی شکایت پر نیشنل سائبر کرائم انویسٹی گیشن ایجنسی (این سی سی آئی اے) نے گذشتہ روز اسلام آباد سے گرفتار صحافی شاہد میتلا کو بدھ کو مقامی عدالت میں پیش کیا، جہاں ان کا دو روزہ راہداری ریمانڈ منظور کر لیا گیا۔
این سی سی آئی اے کے اعلیٰ عہدے دار نے نام ظاہر نہ کرنے کی شرط پر انڈپینڈنٹ اردو کو بتایا تھا کہ ’شاہد میتلا کی گرفتاری کوئٹہ میں سابق نگران وزیراعظم انوار الحق کاکڑ کی شکایت پر درج ایک مقدمے کے سلسلے میں عمل میں لائی گئی ہے۔‘
پنجاب کے شہر چشتیاں سے تعلق رکھنے والے شاہد میتلا مختلف نیوز چینلز، جن میں نیوز ون، پاکستان ٹیلی وژن نیوز، اے آر وائے نیوز اور بول جیسے اداروں سے وابستہ رہ چکے ہیں۔ وہ تقریباً 20 سال سے میڈیا سے منسلک ہیں اور انہوں نے ’بلوم پاکستان‘ کے نام سے اپنا ڈیجیٹل میڈیا پلیٹ فارم بھی قائم کر رکھا ہے۔
اہلیہ کے مطابق شاہد میتلا کو گذشتہ روز رات گئے اسلام آباد کے سیکٹر ایف سکس سے گرفتار کیا گیا تھا۔
انہیں بدھ کو اسلام آباد میں سول جج/ سپیشل مجسٹریٹ این سی سی آئی اے ملک امان کی عدالت میں پیش کیا گیا، جہاں این سی سی آئی اے بلوچستان نے سات روزہ راہداری ریمانڈ کی استدعا کی، تاہم شاہد میتلا کے وکیل حبیب حنظلہ کی جانب سے راہداری ریمانڈر کی مخالفت کی گئی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سماعت کے دوران وکیل حبیب حنظلہ نے کہا: ’جب ملزم کو دوسرے صوبے میں ریمانڈ پر لے جانا ہو تو پولیس قوانین کے تحت ہوم آفس کے تحت کوآرڈینیشن لازمی ہے۔ شاہد میتلا کے مطابق انہوں نے بی ایل اے کے خلاف متعدد ٹویٹس کی ہیں اور انہیں بلوچستان میں خطرہ ہے۔‘
وکیل نے بتایا کہ ’ہمیں ابھی تک ایف آئی آر ہی فراہم نہیں کی گئی۔ اسی کیس میں اسلام آباد ہائی کورٹ نے حفاظتی ضمانت منظور کر رکھی ہے۔‘
وکیل حبیب حنظلہ نے انڈپینڈنٹ اردو سے گفتگو میں بتایا کہ شاہد میتلا کے خلاف انوارالحق کاکڑ کی جانب سے ایک ٹویٹ پر جولائی میں کوئٹہ کے این سی سی آئی اے میں مقدمہ درج کروایا گیا تھا، جس کے بعد اسلام آباد ہائی کورٹ سے ان کی قبل از گرفتاری ضمانت حاصل کی گئی تھی۔
وکیل کے مطابق گذشتہ روز انہیں اسلام آباد سے حراست میں لیا گیا اور 24 گھنٹے کا اضافی وقت حاصل کرنے کے لیے گرفتاری کی رسمی تاریخ رات 12 بجے کے بعد ظاہر کی گئی۔ عدالت میں پولیس نے ایک ہفتے کا راہداری ریمانڈ مانگا، جس پر جج نے ابتدا میں تین دن کا ریمانڈ منظور کر لیا تھا۔
وکیل حبیب حنظلہ نے پولیس رولز کے سیکشن 20 کا حوالہ دیتے ہوئے کہا کہ ’بین الصوبائی تحویل کی منتقلی کے لیے دونوں صوبوں کے ہوم ڈپارٹمنٹس کے مابین باضابطہ رابطہ اور منظوری ضروری ہے، جس کے بعد جج نے تین روزہ راہداری ریمانڈ کا حکم واپس لیتے ہوئے پولیس کو قانونی تقاضے پورے کرنے کی ہدایت کی۔‘
بعد ازاں عدالت نے صحافی شاہد میتلا کا دو روزہ راہداری ریمانڈ منظور کر لیا۔
گندم سکینڈل میں 300 ارب روپے کمانے کے الزام کا ثبوت مانگا ہے: انوار الحق کاکڑ
انوار الحق کاکڑ ملک کے سابق نگران وزیراعظم اور سینیٹ کے رکن ہیں۔ انہوں نے انڈپینڈنٹ اردو سے گفتگو میں شاہد میتلا کے خلاف درج کروائی گئی شکایت کی تفصیلات بتاتے ہوئے کہا کہ انہوں نے اپنے خلاف گندم سکینڈل میں 300 ارب روپے کمانے کے الزام کا ثبوت مانگا ہے۔
بقول انوار الحق کاکڑ: ’شاہد میتلا نے بلوچستان کی صورت حال کے تناظر میں ایک ٹویٹ کی تھی جس میں الزام عائد کیا گیا تھا کہ بلوچستان سے تعلق رکھنے والی ایک شخصیت نے 300 ارب روپے گندم سکینڈل میں کمائے، وزیراعظم کا جہاز منی لانڈرنگ کے لیے استعمال کیا اور اسلام آباد میں پراپرٹی ٹائیکون سے جائیداد حاصل کی۔‘
ان کا مزید کہنا تھا کہ انہوں نے قانون کے مطابق شکایت درج کروائی تاکہ صحافی اپنے الزامات کا ثبوت پیش کرے۔
سابق وزیراعظم کے مطابق صلح صفائی کے لیے ان سے متعدد افراد نے رابطہ کیا۔ ساتھ ہی انہوں نے کہا: ’صحافی یہ تسلیم کرے کہ تحقیقات کے بعد الزامات کے شواہد نہیں ملے اور یہ کہے کہ یہ بات حقیقت کے منافی تھی کیونکہ وہ ان باتوں کے ثبوت فراہم کرنے میں ناکام رہے۔‘
The government is not behind this arrest,it's pursued on my complainant will defend with ferocity any attack on my repute,pretend gladiator join the arena freedom of press does not entitle you for mendacity,wish you'd learnt basic ethos at beginning of career.
— Anwaar ul Haq Kakar (@anwaar_kakar) November 18, 2026
اہل خانہ کیا کہتے ہیں؟
شاہد میتلا کی اہلیہ ندا شاہد نے انڈپینڈنٹ اردو سے گفتگو میں بتایا کہ ان کے شوہر کا ’انوار الحق کاکڑ کے ساتھ کوئی معاملہ چل رہا تھا۔ شاید انہوں نے کوئی ٹویٹ کی تھی، مجھے اتنا نہیں معلوم تھا کیونکہ میں ان کے کاموں میں زیادہ دخل نہیں دیتی تھی۔‘
اہلیہ کے مطابق: ’انوار الحق کاکڑ نے نوٹس بھیجا تھا کہ آپ ٹویٹ کا جواب دیں یا معافی مانگیں۔ ہم اس وقت امریکہ میں تھے، وہاں سے شاہد نے وکیل کے ذریعے قبل از گرفتاری ضمانت کروا لی تھی۔‘
ندا شاہد کے مطابق اس معاملے کا آغاز رواں برس مئی سے ہوا لیکن ان کے پاس متعلقہ ٹویٹ کی تفصیلات یا اس کا سکرین شاٹ موجود نہیں ہے۔
اس سوال پر کہ کیا ان کے شوہر نے ٹویٹ ڈیلیٹ کی تھی؟ اہلیہ نے بتایا: ’شاہد نے کہا کہ نہ میں معذرت نہیں کروں گا اور نہ ہی ٹویٹ ڈیلیٹ کروں گا یا واپس لوں گا۔‘
انہوں نے مزید بتایا کہ ’پاکستان واپسی کے بعد دو تین بار کورٹ میں سماعت ہوئی تو وہ جاتے رہے۔ کیس میں یہی شرط رکھی جا رہی تھی کہ معافی مانگیں اور ٹویٹ ڈیلیٹ کریں، لیکن شاہد کا کہنا تھا کہ میں ایسا نہیں کروں گا۔‘
شاہد میتلا کی گرفتاری سے متعلق واقعے کی تفصیل بیان کرتے ہوئے اہلیہ ندا نے بتایا کہ گذشتہ روز دوپہر تقریباً دو بجے ہماری آخری ملاقات ہوئی۔ ’رات آٹھ بجے میں نے انہیں گھر کے کام سے متعلق میسج کیا، جو انہوں نے دیکھ لیا (بلیو ٹِک ہو گیا)، لیکن کوئی جواب نہیں دیا۔ پھر آٹھ بج کر 45 منٹ پر میری والدہ کی کال آئی کہ شاہد کی گرفتاری کی خبریں چل رہی ہیں۔ میں نے ان کا واٹس ایپ دیکھا تو ’لاسٹ سین‘ آٹھ بج کر 54 منٹ کا آ رہا تھا۔ اس کے بعد ان کے تینوں فون نمبرز بند جا رہے تھے۔‘
اہلیہ نے بتایا کہ دفتر کے لوگوں اور دوستوں نے بتایا کہ ’وہ ایک دوست کے ساتھ ریسٹورنٹ میں کھانے کے لیے نکلے تھے۔ وہاں تین افراد یونیفارم میں اور ایک بغیر یونیفارم کے آئے۔ انہوں نے شاہد سے کہا کہ موبائل فون جمع کروا دیں اور گاڑی میں بیٹھ جائیں۔ شاہد نے اپنا فون دوست کے حوالے کیا کہ گھر والوں کو اطلاع دے اور وہ ان کے ساتھ چلے گئے۔‘
ندا شاہد کہتی ہیں کہ اس کے بعد سے نہ ان کی شوہر سے بات ہوئی ہے اور نہ ہی کسی سرکاری ادارے کی طرف سے رابطہ کیا گیا ہے۔ ’عدالت میں کہا جا رہا ہے کہ کیس کوئٹہ میں درج ہوا ہے اور شاید انہیں کوئٹہ لے جایا جائے گا، تاہم مجھے ایف آئی آر کی کوئی کاپی نہیں ملی۔‘
صحافی نادر بلوچ شاہد میتلا کے دوست ہیں۔ انہوں نے بتایا کہ وہ شاہد میتلا کو ایک دہائی سے زائد عرصے سے ذاتی اور پیشہ ورانہ طور پر جانتے ہیں۔ وہ اپنے ادارے ’بلوم پاکستان‘ پر قومی، سیاسی، سماجی اور دیگر اہم موضوعات پر خبریں اور تجزیے شائع کرتے ہیں۔
نادر کے مطابق: ’شاہد میتلا سوشل میڈیا پلیٹ فارم ایکس پر بھی سیاسی اور عوامی اہمیت کے حامل معاملات پر اپنی رائے کا کھل کر اظہار کرتے رہے ہیں۔ ان سے آخری ملاقات کے دوران ایک اہم بات بھی زیرِ بحث آئی۔‘
نادر کہتے ہیں: ’شاہد میتلا نے انہیں بتایا تھا کہ انہوں نے پنجاب کی ایک سینیئر وزیر سے متعلق مبینہ کرپشن کے معاملے پر ایک ٹویٹ کی تھی، جس کے بعد ان کے بقول، انہیں دباؤ کا سامنا کرنا پڑ رہا تھا۔‘