تائیوان کے ایک مجسمہ ساز لِن سن لئی نے اپنی زندگی ایک انوکھے مشن میں گزار دی ہے۔ وہ ملک بھر سے ایسی مورتیوں کو جمع کرتے ہیں جنہیں لوگ ترک کر کے پھینک دیتے ہیں۔

اکسٹھ سالہ لِن لاوارث مورتیوں کو اپنی دکان میں لا کر ان کے رنگ و روپ بحال کرتے ہیں اور جب کبھی کوئی گاہک آ جائے تو معمولی سا معاوضہ لے کر انہیں بیچ دیتے ہیں۔

تائیوان میں بدھ اور تاؤ مذاہب کے ماننے والوں کی اکثریت ہے لیکن لِن کے مطابق مورتیاں پھینک دینے والے لوگوں کی تعداد مورتیاں سنبھال کر رکھنے والوں سے اس قدر زیادہ ہے کہ ان کی دکان اور گھر کا کونا کونا ہر قسم کے دیوتاؤں کی مورتی سے بھرا ہوا ہے۔

لِن بتاتے ہیں: ’چالیس سالوں میں میرے پاس دس سے بیس ہزار دیوتا جمع ہو گئے ہیں۔ اتنے زیادہ ہیں کہ میرے گھر میں چلنا مشکل ہے۔‘