صبح اٹھا، ایک کوٹ لنڈے سے دو دن پہلے خریدا تھا، اسے ڈرائی کلین کرنے دیا تو دکان والے بھائی سے درخواست کی کہ یار کل شام تک دے دیجیے گا، پرسوں فنکشن کرنا ہے۔

کہنے لگے ’سر جی کچھ بھی اور پہن جاؤ یہ نہیں ملے گا۔‘ ایسا ٹکا سا جواب انہوں نے کبھی نہیں ٹکایا تھا۔

شدید حیران ہوا اور پوچھا کہ ’مرشد خیر ہے؟ آگے تو 12 گھنٹے کی سروس پہ بھی چیزیں اٹھائی ہیں، آج صبح کس سے لڑ کر بیٹھے ہیں؟‘

بولے ’آپ نہا کے آئے ہو؟‘

اب میں تھوڑا مشکوک ہو گیا کہ استاد یہ رات والی بُوٹی کے اثر میں ہیں۔ خیر، مناسب سا جواب دیا کہ ’خیریت، اب نہانے کا سین کیوں کھول رہے ہیں؟‘

کہنے لگے ’پانی گرم تھا؟‘ کہا ہاں، بولے ’تو پھر آپ امیر لوگ ہو سر، گیس بھی آ رہا ہے، پانی بھی آ رہا ہے، بجلی بھی ہے، ادھر اپنے پاس صبح سے ٹوئٹر ہے بس، اور یہ ساری خبریں ہیں جو بتا رہی ہیں کہ ’بجلی اگلے 36 گھنٹے نہیں آئے گا، اور آپ کے پاس یو پی ایس بھی چالو ہو گا، جبھی خبر نئیں آپ کو، اتنے امیر ہو تو لنڈے کے کپڑے کیوں پہنتے ہو؟‘

میں نے معصوم سی مسکراہٹ کے ساتھ سر کھجایا اور غیر معینہ مدت کی رسید کٹوا کے دفتر آ گیا۔

ٹوئٹر کھولا تو وہی کہانی تھی جو ڈرائی کلین والے نے سنائی تھی۔ ہر طرف شور ہے کہ بجلی غائب ہے اور کم سے کم 12 گھنٹے بعد مکمل بحال ہو گی۔ ٹوئٹر پہ نمبر ون ٹرینڈ بھی اسی حساب سے #ElectricityShutDown ہے۔

ایک جُگت جو نمبر ون پر چل رہی ہے وہ یہ کہ ’مشن مجنوں والا سدھارتھ آیا تھا نیوکلیئر پلانٹ اڑانے، کسی لاہوریے نے غلط راستہ بتا دیا، وہ پاور پلانٹ اڑا کے چلا گیا۔‘

ایک اور میم بھی ٹوئٹر پہ ہاتھوں ہاتھ لے جا رہی ہے جس کے مطابق ’یو پی ایس ہے پر بجلی نئیں، جنریٹر گیس پہ ہے لیکن گیس ندارد اور سولر پینل لگے ہیں مگر دھوپ نئیں ہے۔‘

دوسری جانب جن کے فون کی بیٹری ختم ہونے والی ہے وہ غریب الگ پریشانی میں ہیں، قوم لیکن جُگت سے کہاں از آتی ہے، ملاحظہ کیجے:

اپنی طرح سادھو، سنت، فقیر، پُرباش لوگ بھی ٹوئٹر پہ اللہ میاں نے بھیجے ہوتے ہیں۔ ایک مہربان کا مشورہ چیک کیجے اور عمل کرنے کا دل چاہے تو ستو پی کے سونے کا اضافہ میری طرف سے کر لیں۔

ایک ٹوئٹر صارف نے موجودہ صورت حال کو بالکل کوزے میں سمو دیا ۔۔۔ ’چاند پہ ہے اپُن‘ سبحان اللہ، اس سے عمدہ تبصرہ کیا ہو سکتا ہے۔

کچھ دور بین لوگ اسے پاکستان کی سیاسی صورت حال پر منطبق کر کے نئے نتیجے بھی نکال رہے ہیں۔ وطن عزیز میں تفریح یہی ہے کہ نیا بہرحال کچھ بھی نہیں ہوتا اور تاریخ اپنے آپ کو رج کے دہراتی ہے۔

تو خدا بہتر جاننے والا ہے کہ اب اصل میں کیا ہو گا لیکن آفیشل سرکاری بیان کے مطابق 12 گھنٹے میں بجلی کی بحالی متوقع ہے۔