پاکستان کے وزیر خارجہ اور نائب وزیراعظم اسحاق ڈار نے پیر کو اسلام آباد میں پریس کانفرنس کے دوران کہا ہے کہ اقوام متحدہ کی سلامتی کونسل کی قراردادوں پر عمل درآمد کروانے کے دولت مشترکہ دباؤ ڈالے۔
دولت مشترکہ کی سیکرٹری جنرل پیٹریشیا سکاٹ لینڈ کے ساتھ مشترکہ پریس کانفرنس میں اسحاق ڈار کا کہنا تھا کہ دولت مشترکہ عالمی چینلجز کے پیش نظر شراکت داری کو فروغ دینے کا اہم پلیٹ فارم ہے، پاکستان 21 ویں صدی کے چیلنجز کا مقابلہ کرنے کے لیے دولت مشترکہ کا ساتھ دے گا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
وزیر خارجہ نے مزید کہا کہ تعلیم، امور نوجوانان اور موسمیاتی تبدیلی سے نمٹنے کی کوششوں میں پیٹریشیا سکاٹ لینڈ کی شراکت کو سراہتے ہیں۔ 2022 کے سیلاب میں سیکریٹری جنرل دولت مشترکہ کا تعاون اور کوششیں اہمیت کی حامل تھیں۔
اسحاق ڈار کے بقول ’پاکستان رکن کی حیثیت سے دولت مشترکہ اور اس کے اداروں کو بہت اہمیت دیتا ہے۔ ریاستی تعلقات کے اصولوں کو برقرار رکھنے میں دولت مشترکہ کا کردار اہم ہے، رکن ممالک کے درمیان تنازعات کے حل کے لیے دولت مشترکہ کو کردار ادا کرنا چاہیے۔‘
اس موقعے پر دولت مشترکہ کی سیکریٹری جنرل پیٹریشیا سکاٹ لینڈ نے کہا کہ ’میں پاکستان میں مہمان نوازی پر شکرگزار ہوں۔ پاکستان نے مشکلات کا سامنا بہت ہمت سے کیا ہے۔‘
انہوں نے مزید کہا ’سب جانتے ہیں کہ تین کروڑ 30 لاکھ پاکستانی 2022 کے سیلاب سے متاثر ہوئے۔ دولت مشترکہ ایک اہم پلیٹ فارم ہے، اس پلیٹ فارم سے بہت سے اہم کام ہونا ابھی باقی ہیں۔‘
