احد رضا میر کی پہلی نیٹ فلکس سیریز ’ریذیڈنٹ ایول‘ نے ریلیز ہوتے ہی سوشل میڈیا پر دھوم مچا رکھی ہے اور ان کا نام مسلسل ٹرینڈ کر رہا ہے۔

کوئی پہلے پاکستانی اداکار کو نیٹ فلکس سیریز میں دیکھ کر خوش ہو رہا ہے تو کوئی احد رضا میر کی اداکاری سے متاثر ہونے کا اعتراف کر رہا ہے۔

ابھی احد رضا میر کا نام نیٹ فلکس کی سیریز کی وجہ سے ٹرینڈ کر ہی رہا تھا کہ ساتھ ہی خبر سامنے آئی کہ انہیں ایک اور بین الاقوامی ویب سیریز میں بھی کاسٹ کر لیا گیا ہے۔

’ہم تم،‘ ’عہد وفا،‘ ’یہ دل میرا‘ اور ’آنگن‘ جیسے ڈراموں سے اپنے مداح بنانے والے احد رضا اب ’ورلڈ آن فائر‘ کے دوسرے سیزن میں نظر آئیں گے۔

نیٹ فلکس کی سیریز ’ریذیڈنٹ ایول‘ میں ارجن بترا کا کردار ادا کرنے والے احد ’ورلڈ آن فائر‘ میں راجب نامی کا کردار ادا کریں گے۔

نیٹ فلکس سیریز میں اداکاری کا جوہر دکھانے پر احد رضا میر کے مداح سوشل میڈیا پر ان کے گن گا رہے ہیں۔

حمزہ صدیق نامی صارف نے ٹوئٹر پر لکھا: ’ایسا محسوس ہی نہیں ہو رہا کہ ہالی وڈ میں پہلا پراجیکٹ ہے۔ احد نے ارجن بترا کا بہترین کردار ادا کیا۔‘

ایک ٹوئٹر صارف نے لکھا: ’کیا آپ کی ٹانگیں تھکتی نہیں، میرے خواب سے بھاگتے ہوئے؟‘

ایک طرف احمد رضا میر کی تعریف ہوتی رہی مگر کچھ لوگ ان کے ایک بولڈ سین پر تنقید کرتے رہے۔

رمشا طاہر نے لکھا: ’اگر ایسا ہی سین کسی لڑکی نے کیا ہوتا تو غیرت بریگیڈ پاگل ہو چکی ہوتی۔‘

لیکن احد رضا میر کے مداحوں نے انہیں ایسی تنقید کو نظر انداز کرنے کا مشورہ دیا ہے۔

’ریزیڈنٹ ایول‘ نیٹ فلکس کی اوریجنل ہارر ویب سیریز ہے، جس میں 2036 کے دور کو دکھایا گیا ہے، جب ایک جان لیوا وائرس پھیلتا ہے اور اس وائرس سے متاثرہ خون چوسنے والی مخلوق کا زمین پر قبضہ ہوجاتا ہے۔

آٹھ اقساط پر مشتمل اس سیریز میں احد رضا میر کے علاوہ امریکی اداکار لانس ریڈک، سیانا اگوڈنگ، برطانوی اداکارہ ایلا بالنسکا، تمارا سمارٹ، کورین نژاد جرمن اداکارہ ایڈیلائن روڈولف اور میکسیکو کی اداکارہ پاؤلا نونیز نے اداکاری کے جوہر دکھائے ہیں۔