کراچی میں پولیس کا کہنا ہے کہ ملیر میں واقع ایک فلیٹ سے پیر 22 جنوری کو پانچ لاشیں ملی ہیں جو ابتدائی تحقیقات کے مطابق ’خودکشی‘ کا واقعہ لگ رہا ہے۔

واقعے کے حوالے سے ایس ایس پی ایسٹ طارق مستوئی  نے انڈپینڈنٹ اردو کو بتایا ہے کہ ’آج شام کراچی کے علاقے ملیر میں ائیر پورٹ کے قریب فلیٹ میں قتل کی لرزہ خیز واردات میں شوہر نے بیوی اور تین بچوں کے ساتھ خود کو بھی قتل کر لیا۔‘

انہوں نے بتایا کہ ’اب تک کی تحقیقات کے مطابق یہ قتل کم خودکشی ہے۔‘ ان کا کہنا ہے کہ اب تک کی پولیس کی تحقیقات کے مطابق یہ واقعہ خودکشی کا ہے۔

طارق مستوئی نے مزید کہا کہ ’احسن رضا نامی شخص نے خود کو پھانسی لگائی جبکہ دو بیٹوں، ایک بیٹی اور اہلیہ کی لاشوں پر تیز دھار آلے کے وار کے نشان موجود ہیں۔‘

ان کا کہنا تھا کہ ’لاشوں کو ہسپتال منتقل کر دیا گیا ہے اور پوسٹ مارٹم رپورٹ کے بعد مزید کارروائی کی جائے گی۔‘

ایس ایس پی ملیر نے بتایا کہ ’احسن رضا رضوی نامی شخص گارمنٹس کا کام کرتا تھا تاہم ان کا کاروبار بند ہو چکا تھا جس کے بعد سے وہ پریشان تھا۔‘

ان کا مزید کہنا تھا کہ ’وہ کرائے کے فلیٹ میں رہائش پذیر تھا جس کے لیے مالک مکان کرایہ کا تقاضہ بھی کر رہے تھے، جبکہ پڑوسیوں کے مطابق احسن کافی عرصے سے بے روزگار اور مہنگائی سے شدید پریشان تھا۔‘