15 جنوری کو قطر کے وزیر اعظم نے اعلان کیا کہ اسرائیل اور حماس نے غزہ میں فائر بندی اور قیدیوں کی رہائی کے لیے ایک معاہدہ قبول کر لیا ہے۔
میں اس معاہدے کا خیر مقدم غزہ کے بہادر عوام کی زبردست قربانیوں، اسرائیلی جیلوں میں فلسطینی قیدیوں کی طویل اذیتوں، غزہ کی پٹی میں بے گھر ہونے والوں کی بڑے پیمانے پر نقل مکانی، یہاں تک کہ قیدی بنائے گئے اسرائیلی شہریوں اور دیگر کے خاندانوں کے لیے ایک انسانی نقطہ نظر سے قابض اور مقبوضہ ریاست کے درمیان فرق کو ملحوظ خاطر رکھتے ہوئے کرتا ہوں۔
اگر معاہدے پر مکمل عمل درآمد کیا جاتا ہے تو یہ غزہ میں جاری جارحیت کا خاتمہ کر دے گا اور اسرائیل کے زیر حراست ایک ہزار فلسطینیوں کے بدلے تقریباً ایک سو اسرائیلی قیدیوں کو رہا کر دے گا۔
توقع ہے معاہدے پر قیدیوں کے تبادلے، بے گھر لوگوں کی واپسی، انسانی امداد میں اضافے، اور اسرائیلی افواج کے مخصوص علاقوں سے انخلا کے لحاظ سے تین مراحل میں عمل کیا جائے گا۔
یہ بات قابل ذکر ہے کہ دوسرے اور تیسرے مرحلے کے مذاکرات پر بات چیت پہلے مرحلے کے 16ویں دن شروع ہو گی، جس کا مطلب ہے کہ ابھی اعلان کردہ معاہدہ غزہ تنازعے کو حل کرنے کے لیے ایک عارضی قدم ہے، اور یہ ایک مکمل، تفصیلی اور نازک صورت حال کا حتمی حل نہیں۔
اگر معاہدے پر عمل کیا جاتا ہے تو اس سے اکتوبر 2023 اور اس کے بعد غزہ میں جارحیت کا خاتمہ ہو جائے گا، اور یہ بات مفید تو ہے، لیکن اس سے فلسطین-اسرائیل تنازعے کا خاتمہ نہیں ہو گا۔
لہٰذا ہم مزید لڑائیاں، تشدد اور جوابی تشدد دیکھیں گے کیونکہ فلسطینی عوام جو اب بھی مغربی کنارے اور غزہ میں قبضے میں ہیں، اپنی قومی شناخت سے جڑے ہوئے ہیں، اور اسرائیل ان کے خود ارادیت کے حق میں رکاوٹ پیدا کرتے ہوئے قبضے اور تشدد کے استعمال پر مصر ہے۔
ہمیں ضرورت سے زیادہ اور غیر معقول خوشی یا مایوسی دونوں سے بچنا چاہیے جو اس حقیقت کو نظر انداز کرتی ہے کہ فائر بندی اور مصائب کو کم کرنا ایک ضروری قدم ہے چاہے وہ کافی نہ ہو۔
مثبت اور ممکنہ خطرات کا ایک معقول اندازہ فریقین کے معاہدے تک پہنچنے کے محرکات کا جائزہ لینے سے لگایا جا سکتا ہے، حالانکہ اس کے عناصر گذشتہ مئی سے امریکی خیالات کے تناظر میں سلامتی کونسل کی قرارداد نمبر 2735 میں شامل ہیں، اور فریقین کی سنجیدگی کا تعین کرتے ہیں۔
معاہدے کے اعلان کے بعد اور اس کے نافذ ہونے سے پہلے غزہ میں 20 سے زائد افراد کو اسرائیل قتل کر چکا ہے اور اس معاہدے کے کئی نکات غیر واضح ہیں، جیسے یہ کہ کون سے فلسطینی رہا ہوں گے اور آیا اسرائیلی افواج بفر زون میں رہیں گی یا اس سے مکمل طور پر دست بردار ہو جائیں گی۔
درحقیقت معاہدے کے دوسرے اور تیسرے مرحلے کے عناصر کو ملتوی کرنے کا مطلب یہ ہے کہ فریقین کو ایک دوسرے پر اعتبار نہیں۔
یہاں ہمیں یہ پوچھنا چاہیے کہ کیا معاہدے کی منظوری کسی عسکری مقصد تک پہنچنے کی تدبیر ہے، یہ ایک مستقل رجحان اور فریقین کے درمیان محفوظ اور مستحکم حالات تک پہنچنے کی کوشش کی نشاندہی ہے؟
یہ بھی ضروری ہے کہ آنے والے وقت کا تصور کیا جائے تاکہ معاہدے سے ہونے والے فوائد کو زیادہ سے زیادہ فروغ دیا جا سکے اور خاص طور پر اس کے منفی اثرات اور خطرات کو محدود کیا جا سکے کیونکہ یہ بات قابل ذکر ہے کہ سلامتی کونسل کی قرارداد میں ایک بہت اہم عنصر کو چھوڑ دیا گیا تھا۔
یہ کہنا مبالغہ آرائی نہیں ہو گی کہ اسرائیل اور حماس معاہدے تک پہنچنے کے لیے پرجوش نہیں تھے اور یہ کہ حالات، شدید اندرونی اور بیرونی دباؤ اور دونوں جانب کے نقصانات نے انہیں سمجھوتے کی طرف بڑھنے پر مجبور کیا۔
اس کا مطلب ہے کہ دونوں طرف کے جاری نقصانات اور اسرائیلی قیدیوں کے خاندانوں، غزہ کے عوام اور فلسطینی قیدیوں کی وجہ سے دباؤ میں شدید اضافہ ہو رہا تھا۔
مصر اور قطر کا مذاکراتی کردار بھی تھا، ادھر ٹرمپ کا دباؤ اپنے نقطۂ عروج پر پہنچ گیا تھا اور صدر بائیڈن کے جانے سے قبل بحران کے حل تک پہنچنے کے لیے تیزی کی ضرورت پر زور دیا جا رہا تھا۔
لہٰذا یہ ایک ’ضرورت کا معاہدہ‘ ہے جس کے نفاذ کو ایمان داری اور انصاف کے ساتھ یقینی بنانے کے لیے محتاط نگرانی کی ضرورت ہے۔
معاہدے پر عمل درآمد ہموار نہیں ہو گا، اور یہ فرض کرنا غلط ہے کہ دوسرے مراحل کے مذاکرات لازمی طور پر کامیابی سے ختم ہوں گے اور یہ خاص طور پر فلسطینیوں سے متعلق ہے کیونکہ اسرائیل نے اپنے اعلان کردہ اہداف حاصل نہیں کیے۔
اسرائیل نے حماس کو کمزور کیا لیکن اس کا خاتمہ نہیں کیا اور اسرائیلی وزیر خزانہ نے وزیر اعظم سے تحریری ضمانتیں حاصل کرنے کا مطالبہ کیا کہ پہلے مرحلے کے بعد جنگ دوبارہ شروع ہو جائے گی۔
اسرائیل نے بار بار اعلان کیا ہے کہ وہ ہمیشہ اور ہر جگہ حماس کے رہنماؤں کو نشانہ بنائے گا اور وہ اب بھی غزہ کے اندر سکیورٹی معاملات میں بالادستی اور حتمی فیصلہ سازی برقرار رکھنے پر اصرار کر رہا ہے، جس سے اس کے غزہ سے مکمل انخلا اور سکیورٹی انتظامات کے بارے میں کئی سوالات اٹھتے ہیں۔
جب تک اسرائیل فلسطینیوں کو اپنی قومی شناخت پر عمل کرنے سے روکتا رہے گا، مزاحمت ختم نہیں ہو گی بلکہ صورت حال اور حالات کے تقاضوں کے مطابق ظاہر ہو گی اور تشدد کا تبادلہ ہو گا۔
طے پانے والے معاہدے میں نئی پیش رفت میں اس کی دفعات پر عمل درآمد کے لیے ایک فالو اپ باڈی کی تشکیل ہے، جس کا صدر دفتر مصر میں ہے اور اس میں قطر اور امریکہ بھی شامل ہیں۔
اس ادارے کو مضبوط بنایا جانا چاہیے، اس کی تشکیل کی جانی چاہیے اور فیصلے کرنے کے طریقہ کار اور کسی بھی خلاف ورزی کے اثرات پر احتیاط اور درستگی سے اتفاق کیا جانا چاہیے تاکہ اس کے پاس واقعات میں ملوث ہوئے بغیر نگرانی کے لیے ضروری صلاحیتیں ہوں تاکہ تمام فریق معاہدے پر قائم رہیں۔
اسی طرح اس ادارے کو فوری طور پر اگلے مرحلے کے دوران غزہ کی پٹی کے انتظامی نظام کے ساتھ الجھنا نہیں چاہیے، جو بنیادی طور پر فلسطینیوں کے پاس ہونا چاہیے اور انہیں ان کے حقوق فراہم کرنا چاہییں اور غزہ اور اسرائیل کے درمیان تعلقات پر توجہ نہیں دینی چاہیے اور نہ ہی اس بات کو معاہدے کے اندر موجود تسلیم کرنا چاہیے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
دریائے اردن کے مغربی کنارے کے ساتھ رابطے اور سیاسی انضمام کو برقرار رکھنے کے علاوہ غزہ میں جاری رہنے کا حق ملنا چاہیے۔
مجھے اسرائیلی موقف پر حیرت نہیں ہوئی، لیکن میں امریکی بیانات میں فلسطین-اسرائیل تنازعے اور ایک فلسطینی ریاست کے حل کے کسی بھی حوالے کی عدم موجودگی سے پریشان تھا، یہاں تک کہ بائیڈن انتظامیہ کی جانب سے بھی۔
سلامتی کونسل کی قرارداد نمبر 2735 کا کفیل ہونے کے باوجود جس میں دو ریاستی حل کا واضح حوالہ شامل تھا، ٹرمپ کے نمائندے نے صرف اسرائیل اور سعودی عرب کے درمیان امن قائم کرنے کے لیے ’ابراہیمی معاہدے‘ پر پیش رفت کرنے میں دلچسپی پر زور دیا، جبکہ ریاض کے جاری کردہ سرکاری بیان میں معاہدے کا خیرمقدم کیا گیا اور عرب-اسرائیل تنازعے کے جامع حل کی خواہش کا اظہار کیا گیا اور ایک بار پھر زور دیا گیا کہ کسی بھی دوطرفہ امن انتظامات کا انحصار ایک آزاد فلسطینی ریاست کے قیام پر ہے۔
مصر جلد ہی مقبوضہ فلسطینی عوام کی حمایت کے لیے ایک کانفرنس کا انعقاد اور میزبانی کرے گا، جس میں غزہ کی صورت حال پر خصوصی توجہ دی جائے گی۔
یہ ایک مثبت اور ضروری قدم ہے کیونکہ پوری بین الاقوامی برادری کو اس کوشش میں حصہ لینا چاہیے۔
میں جانتا ہوں کہ موسم گرما کے آغاز میں ایک فلسطینی ریاست کے قیام پر ایک کانفرنس کی تیاری کے لیے سعودی عرب کی مشترکہ کوششیں جاری ہیں۔
یہ بھی ایک ایسا قدم ہے جس کی میں تعریف کرتا ہوں کیونکہ عرب آواز کو بلند کرنا چاہیے، یہ تصدیق کرتے ہوئے کہ فلسطینی عوام کو دنیا کے دیگر تمام لوگوں کی طرح حقوق حاصل ہیں، بشمول خود ارادیت اور ایک خودمختار ریاست کے ذریعے اپنی قومی شناخت کا اظہار کرنے کی صلاحیت کے۔
ٹرمپ کا دوسرا دورِ اقتدار شروع ہو چکا ہے اور وہ اس کے دوران صرف موجودہ حقیقت اور فوری حالات پر غور و فکر کیا جائے گا، تاکہ صورت حال کو مستحکم کیا جا سکے اور غیر ضروری جھڑپوں سے بچنے کے لیے معاہدے کیے جا سکیں۔
اس دوران فلسطین کے معاملے کے تاریخی یا قانونی پہلوؤں پر غور و فکر نہیں کیا جائے گا۔
بشکریہ انڈپینڈنٹ عربیہ۔
نوٹ: یہ تحریر کالم نگار کی ذاتی آرا پر مبنی ہے، جس سے انڈپینڈنٹ اردو کا متفق ہونا ضروری نہیں۔
