وزیراعظم شہباز شریف نے بھارتی ہم منصب نریندر مودی کی جانب سے تہنیتی خط کا جواب دیتے ہوئے کہا ہے کہ پاکستان بھارت سے پرامن تعلقات اور مسئلہ کشمیر سمیت تمام مسائل کا حل چاہتا ہے۔
بھارتی وزیر اعظم نریندر مودی نے وزیراعظم شہباز شریف کو وزارتِ عظمی کا منصب سنبھالنے پر مبارکباد کا خط لکھا تھا جس کے جواب میں سفارتی انداز سے ان کا شکریہ ادا کیا گیا۔
خط میں لکھا گیا کہ ’پاکستان علاقائی سلامتی اور امن کا خواہاں ہے نیز دہشت گردی کی جنگ میں ہماری قربانیوں سے دنیا واقف ہے اور انہیں تسلیم کرتی ہے۔ ‘
مزید کہا گیا: ’ہمیں یقین ہے کہ پاکستان اور بھارت کے پرامن تعلقات دونوں ممالک کے عوام کی معاشی ترقی کے لیے اہم ہیں۔ یہ نتائج یقینی طور پہ بامعنی مذاکرات اور موجود تنازعات کے پرامن حل سے ممکن ہیں۔‘
وزیراعظم شہباز شریف کا اپنے خط میں مزید کہنا تھا: ’ہمیں اپنے عوام کی خوشحالی کے لیے کام کرنا چاہیے۔ میرا بہت شکریہ قبول کیجیے۔ ‘
11 اپریل کو شہباز شریف کی جانب سے وزارت عظمیٰ کا منصب سنبھالنے کے بعد بھارتی وزیراعظم نریندر مودی نے انہیں مبارک باد دی تھی۔
اپنے ٹوئٹر پیغام میں نریندر مودی نے لکھا تھا کہ ’بھارت دہشت گردی سے پاک خطے میں امن اور استحکام کا خواہاں ہے، تاکہ ہم اپنے ترقیاتی چیلنجوں پر توجہ مرکوز کر سکیں اور اپنے لوگوں کی فلاح و بہبود کو یقینی بنا سکیں۔‘
Congratulations to H. E. Mian Muhammad Shehbaz Sharif on his election as the Prime Minister of Pakistan. India desires peace and stability in a region free of terror, so that we can focus on our development challenges and ensure the well-being and prosperity of our people.
— Narendra Modi (@narendramodi) April 11, 2022
