پاکستانی سیاست میں ایک بار پھر اس وقت ہل چل ہوئی جب وزیراعظم شہباز شریف کی مریم نواز اور دیگر افراد کے ساتھ ہونے والی بات چیت کی آڈیو لیک ہوئی۔

بعدازاں سابق وزیراعظم عمران خان اور ان کے اس وقت کے پرسنل سیکرٹری اعظم خان کی گفتگو کی آڈیو بھی لیک ہوئی۔

ان تمام لیک ہونے والی آڈیوز کی اب تک کسی نے تردید نہیں کی بلکہ عمران خان، شہباز شریف اور مریم نواز ان میں ہونے والی باتوں کا دفاع کرتے دکھائی دیے۔

ڈارک ویب پر ’انڈی شیل‘ کے نام سے اکاؤنٹ پر پہلے تو ان آڈیوز کی بولی لگائی گئی اور لکھا گیا کہ سب سے زیادہ بولی لگانے والے کو آڈیوز فروخت کی جائیں گی اور بتایا گیا کہ 8 جی بی کی فائل میں اہم عہدیداروں کی آڈیو موجود ہے۔

انڈی شیل کے نام سے ٹوئٹر پر ایک اکاؤنٹ بھی سامنے آیا جو مبینہ طور پر اسی ہیکر کا ہے، جو مزید آڈیوز کی موجودگی کا دعویٰ کرتا رہا ہے۔

اس اکاؤنٹ کے اب تک 64 ہزار سے زیادہ فالورز ہو چکے ہیں مگر یہ اکاؤنٹ کسی کو خود فالو نہیں کر رہا۔

اپنے اس اکاؤنٹ کی بائیو میں انڈی شیل نے لکھا ہے کہ اکاؤنٹ 30 ستمبر کو ڈیلیٹ ہو جائے گا۔

اس کی وجہ یہ بھی ہو سکتی ہے کہ 27 ستمبر کو اس اکاؤنٹ سے ہونے والی ٹویٹ لکھا گیا تھا کہ تمام تر آڈیوز 30 ستمبر کو ریلیز کر دی جائیں گی۔

مگر 27 ستمبر کو ہونے والی ٹویٹ کے بعد اب تک س اکاؤنٹ سے کوئی ٹویٹ نہیں کی گئی۔

یہی وجہ ہے کہ سوشل میڈیا صارفین ’مزید آڈیوز‘ کے لیے ہیکر کے ایک بار پھر ایکٹو ہونے کا انتظار کر ہے ہیں اور دلچسپ تبصرے کر رہے ہیں۔

ٹوئٹر صارف سلمان درانی نے ٹویٹ میں سوال کیا: ’ہیکرز نے کس ٹائم اٹھنا ہے؟‘

کاشف سومرو نے ’ہیکر بھائی‘ کو مخاطب کرتے ہوئے کہا کہ ’عوام انتظار کر رہی ہے۔‘

قدرت اللہ نامی صارف نے لکھا کہ ’ہیکر بھائی اپنا خیال رکھنا۔ اگر ایزی لوڈ یا پیکج کی ضرورت ہوئی تو بتا دینا تم گھر سے باہر نہ نکلنا۔‘

کچھ لوگ بے صبری سے آڈیوز کے لیک ہونے کا انتظار کر رہے ہیں جبکہ کچھ کے خیال میں اب آڈیوز نہیں آنی۔

ایک ٹوئٹر صارف نے لکھا کہ ’میرے خیال سے (ہیکر کو) خریدا گیا ہے۔‘

سلطان طاہر نے انڈی شیل کے ڈارک ویب اکاؤنٹ کا سکرین شاٹ شیئر کرکے لکھا کہ ہیکر اپنے اکاؤنٹ پر 28 ستمبر کے بعد آن لائن نہیں ہوا۔ اس کے جواب میں بھی ایک صارف نے لکھا کہ ’بک گیا۔‘