پاکستان میں گذشتہ تین روز سے موبائل انٹرنیٹ سروسز بند رہنے کے بعد جب حکام نے انٹرنیٹ کو بحال کیا تو کچھ صارفین نے اسے ٹک ٹاکر حریم شاہ کی ٹویٹ کا ثمر قرار دے دیا۔

 حریم شاہ نے اپنی ٹویٹ میں وفاقی وزیرداخلہ رانا ثنااللہ کو ٹیگ کرتے ہوئے انٹرنیٹ کی بحالی کا مطالبہ کیا تھا۔

پاکستان میں سابق وزیراعظم عمران خان کی گرفتاری کے بعد ہونے والی پرتشدد کارروائیوں کے پیش نظر حکومت کی جانب سے انٹرنیٹ پر پابندی عائد کر دی گئی تھی، جس سے پاکستان بھر میں لاکھوں لوگوں کو شدید مشکلات کا سامنا تھا۔

انہی میں سے ایک مشہور ٹک ٹاکر حریم شاہ بھی تھیں۔جنہوں نے اپنی ناراضگی کا کھل کر اظہار بھی کیا۔

اور اب جب تین دن بعد انٹرنینٹ کی بحالی شروع ہوئی تو سوشل میڈیا صارفین نے کئی دن سے جاری اس گرم سیاسی ماحول میں ہلکا پھلکا مزاق کرتے ہوئے ٹوئٹر پر حریم شاہ کا شکریہ ادا کرنا شروع کر دیا۔

 صارفین کی جانب سے حریم شاہ کے نام کے ساتھ دلچسپ اور مزاحیہ ٹویٹس کا سلسلہ جاری رہا جو پاکستان میں ٹاپ ٹرینڈز لسٹ میں بھی آ گیا۔

کئی صارفین کی جانب سے ان کا شکریہ ادا کرتے ہوئے کہا گیا کہ ’قوم انہیں ہمیشہ یاد رکھے گی۔‘ 

سعدیہ نامی صارف نے اپنے وائی فائے کے نام کا سکرین شاٹ شیئر کرتے ہوئے بتایا کہ ان کے بھائی نے وائی فائی کا نام ہی حریم رکھ دیا ہے 

گلوکار علی آفتاب نے حریم شاہ کی ٹویٹ کو ری ٹویٹ کرتے ہوئے کہا ’قدم بڑھاو حریم شاہ ہم تمہارے ساتھ ہیں‘ 

 
صارف محمد خان نے تو تمام ڈیٹا استعمال کرنے والوں کو خراج تحسین کے طور پر اپنے ڈی پی پر حریم شاہ کی تصویر پوسٹ کرنے کا مشورہ دے دیا 

جبکہ ایاز خان نامی صارف نے تو حریم شاہ سے انٹرنیٹ کی بحالی کے بعد الیکشن کرانے کا مطالبہ بھی کر دیا۔