معروف اسلامی مبلغ مولانا طارق جمیل کے بڑے صاحبزادے یوسف جمیل نے اپنے والد کے فیس بک اکاؤنٹ پر آکر اپنے بھائی کی خود کشی کی تصدیق کی ہے۔

اتوار اور پیر کی درمیانی شب فیس بک پر اپلوڈ کی جانے والی ویڈیو میں مولانا طارق جمیل کے بڑے صاحبزادے یوسف جمیل نے کہا کہ ’میرے چھوٹے بھائی نے باہر ڈیوٹی پر تعینات سکیورٹی گارڈ کی بندوق لے کر خود کو گولی مار لی۔‘

انہوں نے ان افواہوں کی تردید کی کہ ان کی کسی سے کوئی دشمنی تھی یا کسی نے ان پر حملہ کیا تھا۔

یوسف جمیل نے اپنے ویڈیو بیان میں کہا کہ ’میں بڑے بوجھل دل کے ساتھ، بڑی مشکل سے یہ ویڈیو بیان ریکارڈ کرا رہا ہوں۔ لیکن اس مشکل وقت میں مجھے اس لیے میڈیا کے سامنے حاضر ہونا پڑا ہے کیوں کہ غلط خبریں چلائی جا رہی ہیں اور میں ان کی وضاحت کرنا چاہتا ہوں۔‘

انہوں نے بتایا کہ ’میرے بھائی عاصم جمیل بچپن سے شدید ڈپریشن کے مریض تھے اور پچھلے چھ ماہ سے ان کی بیماری کی شدت کی وجہ سے ان کو بجلی کے جھٹکے دیے جا رہے تھے تاکہ ان کی ڈپریشن کی بیماری کو کنٹرول کیا جا سکے۔‘

یوسف جمیل نے بیان میں مذید بتایا کہ اس علاج کے باجود ان کے چھوٹے بھائی کو کوئی فائدہ نہیں ہوا اور گذشتہ روز جب وہ ’اتفاقاً‘ گھر میں اکیلے تھے تو انہوں نے اپنی جان لے لی۔

اس سے قبل خانیوال کی ضلعی پولیس نے اتوار کو بتایا تھا کہ عالم دین مولانا طارق جمیل کے بیٹے عاصم جمیل کی تلمبہ میں گولی لگنے سے موت واقع ہو گئی ہے۔

مولانا طارق جمیل نے ایکس (سابقہ ٹوئٹر) پر اپنے بیٹے کی موت کی تصدیق کرتے ہوئے لکھا: ’آج تلمبہ میں میرے بیٹے عاصم جمیل کا انتقال ہو گیا ہے۔ اس حادثاتی موت نے ماحول کو سوگوار بنا دیا۔ آپ سب سے گزارش ہے کہ اس غم کے موقع پر ہمیں اپنی دعاؤں میں یاد رکھیں۔ اللہ میرے فرزند کو جنت الفردوس میں اعلیٰ مقام عطا فرمائے۔‘ 

ترجمان آر پی او ملتان عبداللہ گِل نے بتایا کہ ’پولیس کو دیہی صحت کے مرکز (آر ایچ سی) خانیوال سے اطلاع ملی کہ ہسپتال میں ایک نعش لائی گئی ہے۔ جب ہم وہاں پہنچے تو معلوم ہوا کہ نعش مولانا طارق جنمیل کے بیٹے کی ہے جن کی موت سینے پر گولی لگنے سے ہوئی۔‘ 

عبداللہ کے مطابق عاصم کے گھر والے بھی ہسپتال میں موجود تھے لیکن انہوں نے فی الحال پولیس کو کچھ نہیں بتایا۔ 

ترجمان کا کہنا تھا کہ پولیس کے اعلیٰ افسران موت کی تحیققات کر رہے ہیں، اور فی الحال کوئی مقدمہ درج نہیں کیا گیا۔

ترجمان پنجاب پولیس نے بتایا کہ ڈی پی او خانیوال اور سینیئر پولیس افسران موقعے پر موجود ہیں اور شواہد اکٹھے کر لیے گئے ہیں۔ 

آر پی او ملتان سہیل چوہدری نے انڈپینڈنٹ اردو کو بتایا کہ ’پولیس نے جائے وقوعہ پر موجود سی سی ٹی وی کیمروں کی فوٹیج کا بغور جائزہ لیا ہے، جس میں عاصم جمیل کو خود کو گولی مارتے دیکھا گیا۔‘

انہوں نے مزید بتایا کہ ’وقوعے سے پہلے عاصم جم میں ایکسر سائز کر رہے تھے۔‘

خانیوال پولیس کے ترجمان عمران احمد نے بتایا کہ عاصم کی عمر 30 سے 35 برس کے درمیان تھی۔

صوبہ پنجاب کے انسپکٹر جنرل ڈاکٹر عثمان انور نے واقعے کا نوٹس لیتے ہوئے آر پی او ملتان سے رپورٹ طلب کر لی۔ 

آئی جی کا کہنا ہے کہ شواہد اور فرانزک رپورٹ کی روشنی میں موت کی وجوہات کا تعین کیا جائے گا۔ 

وزارت اطلاعات و نشریات نے نگران وفاقی وزیر اطلاعات مرتضیٰ سولنگی کا بیان جاری کیا ہے جس میں انہوں نے واقعے پر اظہار افسوس کرتے ہوئے مولانا طارق جمیل اور اہل خانہ سے اظہار تعزیت کیا ہے۔

نگران وزیر اعظم انوار الحق کاکڑ، پاکستان مسلم لیگ (ن) کے صدر شہباز شریف اور دیگر سیاسی رہنماؤں نے بھی واقعے پر اظہار افسوس کیا ہے۔