افغانستان میں طالبان انتظامیہ کے وزیر اعظم ملا محمد حسن اخوند نے کہا ہے کہ تارکین وطن کے معاملے کو دباؤ کے لیے استعمال نہیں کرنا چاہیے، واپسی کا عمل بتدریج ہونا چاہیے تاکہ ملکوں کے درمیان نفرت اور بداعتمادی نہ پیدا ہو۔
تارکین وطن کے عالمی دن پر جاری بیان میں ان کا کہنا ہے کہ ’ہم ان ممالک کے شکر گزار ہیں جنہوں نے ہمارے تارکین وطن شہریوں کو برسوں سے جگہ دی ہے۔ ہمارے لوگ ان کی مہربانیوں کو نہیں بھولتے اور ان کی مہمان نوازی کی قدر کرتے ہیں۔‘
انہوں نے کہا کہ ’ہمیں امید ہے کہ تارکین وطن کے انسانی مسئلے کو سیاسی نقطہ نظر اور فوری مفادات اور فیصلوں کے زاویے سے نہیں دیکھا جانا چاہیے۔‘
پاکستان اور افغانستان کے درمیان افغان پناہ گزینوں کی واپسی کے فیصلے کے بعد ست تعلقات کشیدہ ہیں۔ پاکستان کا کہنا ہے کہ وہ اپنے ملکی مفاد میں غیرقانونی غیرملکیوں کو نکال رہا ہے۔ تاہم وہ کالعدم تحریک طالبان پاکستان کے حوالے سے اس کے بطور افغان طالبان پر دباؤ کے تاثر کو مسترد کرتا ہے۔
وزیر اعظم ملا محمد حسن اخوند کے مطابق ’اس معاملے کو دباؤ کے طور پر استعمال نہیں کیا جانا چاہیے، واپسی کا عمل باوقار اور بتدریج ہونا چاہیے تاکہ خدا نہ کرے، یہ طویل مدت میں ملکوں کے درمیان انسانی تباہی، نفرت اور بد اعتمادی کا باعث نہ بنے۔‘
ان کے مطابق: ’پناہ گزینوں کے عالمی دن کے موقع پر ہم تمام جماعتوں، دنیا کے ممالک اور اقوام متحدہ سے متعلقہ اداروں سے کہتے ہیں کہ وہ افغانستان میں پناہ گزینوں کے مسئلے کو نظر انداز نہ کریں۔‘
ان کا کہنا ہے کہ ’آپ سب جانتے ہیں کہ ہمارے ملک پر پچھلی چار دہائیوں میں دو بار حملہ کیا گیا اور افغان قوم نے اپنے مذہب، ایمان، آزادی، قومی خود مختاری اور اقدار کے دفاع کے مقصد سے جارحوں کے خلاف بڑی جرأت اور خلوص کے ساتھ ہجرت کا راستہ اختیار کیا۔ جہاد کیا اور انہوں نے جنگ کی۔‘
انہوں نے کہا کہ ’تارکین وطن بھائیوں اور بہنوں خواہ وہ وطن واپس آئے ہوں یا بیرون ملک دوسرے ممالک میں مقیم ہوں، یہ واقعی قابل احترام اور قابل تعریف ہے۔‘
ان کا مزید کہنا تھا کہ ’میں تارکین وطن اور واپس آنے والوں کے ساتھ نمٹنے کے لیے ہائی کمیشن کی قیادت اور اراکین کا شکریہ ادا کرنا چاہتا ہوں جنہوں نے پناہ گزینوں اور واپس آنے والوں کے مسائل کو بروقت حل کیا اور ان کی پناہ گاہ، کھانے پینے، صحت، نقل و حمل کے شعبوں میں مدد کی۔‘
افغانستان میں طالبان انتظامیہ کے وزیر اعظم ملا محمد حسن اخوند کے مطابق: ’پچھلے کچھ مہینوں میں دوسرے علاقوں میں درحقیقت نظام کا پورا ادارہ اپنے وطن واپس آنے والے تارکین وطن کی خدمت میں مصروف ہے جس سے ظاہر ہوتا ہے کہ امارت اسلامیہ اپنے عوام بالخصوص تارکین وطن کے مسائل حل کرنے کے لیے پرعزم ہے اور اسے اپنا دینی اور قومی فریضہ سمجھتی ہے۔‘
’میں تمام شہریوں خصوصاً سرمایہ داروں اور امیر شہریوں سے بھی خواہش کرتا ہوں کہ جنہوں نے پچھلے کچھ مہینوں میں اپنے تارکین وطن بھائیوں کے لیے اپنے ہتھیار کھولے ہیں، وہ ان کی ہر ممکن مدد کریں اور مکان کے کرایے اور دیگر ضروریات کے معاملے میں ان کے ساتھ تعاون کریں۔‘
ملا محمد حسن اخوند کا کہنا تھا کہ ’پناہ گزینوں کے عالمی دن کے موقع پر ہم تمام جماعتوں، دنیا کے ممالک اور اقوام متحدہ سے متعلقہ اداروں سے کہتے ہیں کہ وہ افغانستان میں پناہ گزینوں کے مسئلے کو نظر انداز نہ کریں۔‘
اس سے قبل افغان وزیر اعظم نے اپنے ایک بیان میں پاکستانی حکمرانوں کو براہ راست مخاطب کرتے ہوئے انہیں افغان شہریوں کو بے دخل کرنے سے رک جانے کو کہا تھا۔
دوسری جانب سے اقوام متحدہ کے سیکرٹری جنرل انتونیو گوتیریش نے اپنے پیغام میں کہا ہے کہ بین الاقوامی برادری لوگوں کو اپنی برادریوں میں رہنے کے لیے اور ان لوگوں کے لیے جو نقل مکانی کرنا چاہتے ہیں یا منتقل ہونا چاہتے ہیں، کو حل فراہم کرے۔
اقوام متحدہ کی ویب سائٹ پر تارکین وطن کے عالمی دن (18 دسمبر 2023) پر جاری پیغام میں ان کا کہنا تھا کہ ’ہم دنیا بھر میں لاکھوں تارکین وطن کی خدمات پر غور کرتے ہیں اور ان کا جشن مناتے ہیں۔‘
ان کے مطابق ’نقل و حرکت کرنے والے لوگ اپنے اصل اور منزل دونوں ممالک میں ترقی کے طاقتور محرک ہیں، کارکنوں ، طلبہ، کاروباری افراد، خاندان کے فرد، فنکاروں اور بہت کچھ کے طور پر۔ تارکین وطن اکثر اپنی نئی برادریوں کو گلے لگاتے ہوئے اپنے آبائی ممالک کے ساتھ مضبوط روابط برقرار رکھتے ہیں جہاں وہ علم، تجربے اور مہارت کی دولت لاتے ہیں۔‘
انہوں نے کہا کہ ’اگر اچھی طرح سے انتظام کیا جائے تو نقل و حرکت پائیدار ترقی، خوشحالی اور ترقی کی بنیاد بن سکتی ہے۔ تارکین وطن کے امکانات کو کھولنا سب کے فائدے کے لیے ہے اور ستمبر 2023 میں نیو یارک میں پائیدار ترقیاتی اہداف کے سربراہ اجلاس کے دوران بیان کردہ 2030 ایجنڈا کے اہم چیلنجوں سے نمٹنے کی کوششوں کو تیز کرنے کی کلید ہے۔‘
ان کا کہنا تھا کہ ’اس بات کی اشد ضرورت ہے کہ بین الاقوامی برادری لوگوں کو اپنی برادریوں میں رہنے کے لیے اور ان لوگوں کے لیے جو نقل مکانی کرنا چاہتے ہیں یا منتقل ہونا چاہتے ہیں، کو حل فراہم کرے۔‘
ان کا کہنا تھا کہ ’دبئی میں حال ہی میں مکمل ہونے والے سی او پی 28 سربراہ اجلاس نے آئی او ایم کو تارکین وطن پر موسمیاتی تبدیلی کے اثرات کی دوبارہ وکالت کرنے کا موقع فراہم کیا تاکہ وہ اس بحث کا مرکزی حصہ بن سکیں۔
’تارکین وطن، خواتین، معذور افراد اور برادریوں کے ساتھ مساوی اور جامع شراکت داری کو فروغ دینا، جبکہ نوجوانوں کے کردار پر زور دینا، اب پہلے سے کہیں زیادہ اہم ہے۔‘
ان کا کہنا تھا کہ ہر شخص ایک فرق پیدا کر سکتا ہے۔ ہر شخص تبدیلی کا ایجنٹ بن سکتا ہے۔ آج ہمارے اجتماعی اقدامات مل کر ہمیں ایک بہتر کل کے لیے تیار کریں گے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
حکومت پاکستان نے پاکستان میں مقیم غیر قانونی پناہ گزینوں کو ملک سے واپس جانے کے لیے 31 اکتوبر کی ڈیڈ لائن دی تھی۔
وزارت داخلہ کی جانب سے 12 دسمبر کو جاری کردہ اعداد و شمار کے مطابق پاکستان چھوڑنے والے غیر قانونی افغان باشندوں کی کل تعداد چار لاکھ 26 ہزار 865 ہے۔
انڈپینڈنٹ اردو کو 24 نومبر، 2023 کو دیے گئے ایک انٹرویو میں سابق نگران وزیر داخلہ سرفراز بگٹی نے کہا تھا کہ ’غیر قانونی طور پر مقیم افراد کو اپنے وطن بھیجنے کا سلسلہ ایک ماہ میں مکمل ہو جائے گا۔‘
اقوام متحدہ کا ادارہ برائے پناہ گزین (یو این ایچ سی آر) کے مطابق پاکستان میں 13 لاکھ سے زائد رجسٹرڈ افغان پناہ گزین موجود ہیں جن میں سب سے زیادہ (سات لاکھ پشاور) اور دوسرے نمبر پر بلوچستان (تین لاکھ) میں رہائش پذیر ہیں۔
جبکہ وفاقی وزارت داخلہ کے مطابق رجسٹرڈ کے علاوہ تقریباً 17 لاکھ غیر قانونی طور پر افغان پاکستان کے مختلف علاقوں میں مقیم ہیں جن کے پاس کسی قسم کی سفری یا قیام کی دستاویزات موجود نہیں ہیں۔
مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔
