عورت بال کٹوانے لگے تو سمجھ لو کہ ایک طوفان تھا، آ کے گزر گیا۔

تمہیں کیوں نہیں پتہ چل سکا؟ تم نہیں تھے وہاں، اس آندھی میں، ان تھپیڑوں میں، اس جوار بھاٹے کے درمیان، لہروں میں — تم تھے ہی نہیں۔

تم نے تو نوٹس بھی نہیں کیا۔ تم نے پوچھا کٹوا لیے؟ اس نے بولا ہاں، تم نے تعریف کر دی اس نے وصول کر لی — اب کیوں سوچ رہے ہو؟

ہاں تم نے منع کیا ہو گا۔ مت کٹواؤ، لمبے اچھے لگتے ہیں بال، گھنے ہیں، ابھی سوٹ کرتے ہیں، پتہ نہیں کیسے لگو گی، لمبے بالوں پر شاعری سنائی ہو گی، بنگالی عورتوں کا بتایا ہو گا، چینج سے ڈرایا ہو گا؟

چینج — یہی ہے۔ کسی چیز پہ جب نہیں چلا اور ادھر بس چل گیا تو اس نے بھی چلا لیا۔ یہ بال نہیں کٹے پچھلے سمجھ لو پانچ سال کٹ گئے، جھڑ گئے، کندھوں پر سے اتر گیا بوجھ۔

لیکن تم نہیں سمجھ سکتے، دیکھو، تمہارے لیے حالات سے لڑنے کے طریقے اور بہت سے ہیں۔ تم فرار ہو سکتے ہو، تم بازوؤں میں چھپا سکتے ہو چہرے کو یا الٹے پیر بھاگ سکتے ہو۔

اس کے پاس آپشن کوئی نہیں تھا۔ تم پھر بھی نہیں سمجھے۔ اس لیے شاید کہ تم ایسی جگہ کبھی کھڑے ہی نہیں ہوئے جہاں تمہارے پاس آپشن کوئی نہ ہو، پچھتاوے ہوں اور تمہیں سر جھٹک کے نکلنا بھی ہو۔

اگلی صبح اٹھنے کے لیے، نئی کچہریاں بھگتانے کے لیے۔ اتنی لمبی کیوں گھسیٹ لی کہانی؟

اس لیے کہ سوال بعض اوقات ایسے جوابوں میں لپیٹ دیے جاتے ہیں جیسے تم سننا چاہتے ہو۔ اب تم کو یہ کون سمجھائے کہ بس، دل بھر گیا۔ دل کیوں بھرا تم پوچھو گے اور جواب وہی جو تم نہیں سننا چاہتے۔

تمہیں پتہ ہے وہ خود کتنا اپ سیٹ ہوئی تھی جب پہلی بار اس نے بال کٹوائے تھے؟ اسے پتہ بھی نہیں تھا لیکن لمبے بال اس کی شناخت بن چکے تھے۔

لڑکی ہو؟ بال تو لمبے گھنے ہوں گے ہی۔ یہ 'ظاہری سی بات' جھٹلانے کے پہلے سیکنڈ اس نے کیا خوف اور بعد میں کتنا دکھ محسوس کیا تھا، تمہیں اندازہ ہے؟ تمہیں تو یہ بھی نہیں پتہ کہ وہ بال کٹنے کے تین دن بعد کتنا طاقت ور محسوس کر رہی تھی۔

جب سیمسن کی طاقت اس کے بالوں میں ہو سکتی ہے تو ڈیلائلہ بوائے کٹ میں کیوں پاور فل محسوس نہیں کر سکتی؟

یہ اس کا سسٹم ری سیٹ تھا، الارم تھا، اشارہ تھا، تم نے کب سنا؟ اب یاد آ رہا ہو گا؟ ہاں؟ جوڑو — کڑیاں جوڑتے جاؤ کہانی کھلتی جائے گی۔

یہ فارمولا میں ہر عورت پہ اپلائے نہیں کر رہا، خوش قسمت ہوں، میری اپنی ماں کے بال بوائے کٹ تھے ہمیشہ، اسی کی آنکھ سے دنیا کو دیکھتا ہوں۔

کسی کو چھوٹے بال اس لیے بھی پسند ہو سکتے ہیں کہ لمبے بالوں کا کھلارا بہت ہوتا ہے۔ مصروف عورت کے پاس یہ لانجھے پالنے کا وقت نہیں ہوتا۔ صبح سر دھویا اور رات تک جڑیں گیلی ہیں، گردن بھاری ہے، سر پہ بوجھ ہے۔

ان کا یہ ذاتی مسئلہ ہے — اور تمہاری پسند وہ سر پہ اٹھا کر کیوں گھومیں بھئی؟

یہ بھی ہو سکتا ہے کہ وہ خواہ مخوا کی 'نسوانیت' چوبیس گھنٹے نہ اٹھانا چاہتی ہو۔ جن پیمانوں پہ تم ایک عورت کو پرکھتے ہو ان سب کا بوجھ جانتے ہو؟

کندھوں پہ نیل پڑ جاتے ہیں، پنڈلیاں رات کو ٹوٹ رہی ہوتی ہیں اور پیر — انہیں نمک والے پانی کی ضرورت ہوتی ہے۔ تم کچھ نہیں جانتے۔

تم صرف وہ دیکھتے ہو جو تمہیں دکھایا جاتا ہے۔ تم سوچتے بھی وہی ہو جو تم صدیوں سے دیکھتے آ رہے ہو۔

صرف اتنا بتاؤ کہ راہ چلتے ہر کوئی تمہیں مڑ کر دیکھے، یہ پسند کرو گے یا چپ چاپ کسی کی توجہ میں آئے بغیر منزل تک پہنچنا؟

کبھی کبھار وجہ صرف یہ بھی ہوتی ہے ان بہت سے کاموں کی جن کا مقصد تم کو سمجھ نہیں آتا۔ اچھی صورت پہ نظریں اچھی نہیں پڑتیں۔

تو میں کہاں تھا؟ عورت بال کٹوانے لگے تو سمجھ لو کہ ایک طوفان تھا، آ کے گزر گیا۔ یہ کسی تعلق کا ٹوٹنا ہو سکتا ہے، نئی زندگی کا آغاز بھی، یہ کسی صدمے سے نکلنا ہو سکتا ہے یا محض ایک تبدیلی کی خواہش بھی۔

یہ جو کچھ بھی ہے، اور جتنی گہرائی اس سادے سے عمل میں ہے۔۔۔ تم شاید ہی سمجھو کبھی!

بس اتنا یاد رکھو کہ ڈیلائلہ بغیر بالوں کے ایسے پھرتی ہے جیسے مینا پنجرے سے باہر، آزاد — اتنی آزاد جتنی اب مہسا امینی ہے۔

نوٹ: یہ مضمون لکھاری کی ذاتی آرا پر مبنی ہے، ادارے کا اس سے متفق ہونا ضروری نہیں۔

(ایڈیٹنگ: بلال مظہر)