’ایک ایک ٹرک میں لاکھوں سے کروڑوں روپے کا سامان لدا ہوا ہے، جن میں اکثریت سبزیوں اور پھلوں کی ہے، جو وقت گزرنے کے ساتھ خراب ہو رہی ہیں۔ بارڈر کی بندش میں طوالت سے بہت زیادہ نقصان ہو سکتا ہے۔‘
یہ کہنا تھا حاجی عظیم اللہ کا، جو پاکستان کی جانب طورخم سرحد پر کسٹم کلیئرنگ ایجنٹس کی تنظیم کے سربراہ ہیں اور گذشتہ تین روز سے پاکستان اور افغانستان کے درمیان طورخم سرحد کھلنے کا انتظار کر رہے ہیں۔
حاجی عظیم اللہ نے بتایا کہ پاکستان کی جانب سے تقریباً 1200 ٹرک سرحد کھلنے کے منتظر ہیں، جن میں سے اکثر پر پھل اور سبزیاں لدی ہوئی ہیں۔
’کئی ٹرکوں میں سیمنٹ اور دوسرا خراب نہ ہونے والا سامان بھی موجود ہے۔‘
انہوں نے بتایا کہ بہت سارے ٹرک خوردو نوش کی اشیا کے خراب ہونے کے خدشے کے باعث واپس پشاور پہنچا دیے گئے ہیں۔
یہ سرحد بدھ کو دونوں ملکوں کی بارڈر فورسز کے درمیان فائرنگ کے بعد بند کر دی گئی تھی۔
پاکستانی حکام کے مطابق افغانستان کی جانب سے ایک متنازع چیک پوسٹ تعمیر کی جا رہی تھی، جس پر ہمسایہ ملک بار بار کی تنبیہ کے باوجود کام نہیں روکا۔
طورخم پر موجود حکام نے بتایا کہ چیک پوسٹ کے تنازعے پر دونوں طرف کی سرحدی فورسز کے درمیان فائرنگ کا تبادلہ ہوا اور سرحد کو آمدورفت کے لیے بند کرنا پڑا۔
افغان طالبان کے مرکزی ترجمان ذبیح اللہ مجاہد نے جمعرات کو انڈپینڈنٹ اردو کو بتایا تھا کہ دونوں ملکوں کے حکام اس حوالے سے بات کریں گے تاکہ مستقبل میں ایسے واقعات رونما نہ ہو سکیں۔
افغانستان کے صوبہ ننگرہار کے اطلاع مرکز سے جاری ایک بیان میں بتایا گیا کہ سرحد بند ہے لیکن دونوں ممالک کے حکام کے مابین اس سلسلے میں بار چیت جاری ہے۔
تاہم سرحد کھولنے کے حوالے سے ابھی تک کوئی پیش رفت نہیں ہوئی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
یہ سرحد دونوں ملکوں کے مابین اہم تجارتی راہ داری ہے۔
حاجی عظیم اللہ سے جب دریافت کیا گیا کہ جلد سرحد کھلنے کے کتنے امکان موجود ہیں تو انہوں نے کہا: ’میں سرحد پر موجود ہوں اور ابھی یہاں بالکل خاموشی ہے۔‘
صدر طورخم کسٹم کلیئرینگ ایجنٹس ایسوسی ایشن کے مطابق افغانستان کی طرف بھی سینکڑوں مال بردار گاڑیاں سرحد کھلنے کے انتظار میں ہیں۔
پاکستان ٹریڈ ڈویلپمنٹ اتھارٹی کی 2020 کی ایک رپورٹ کے مطابق پاکستانی اشیا کی مانگ کے حوالے سے افغانستان دنیا میں پانچواں ملک ہے، جبکہ افغانستان کی اشیا کے لیے پاکستان دنیا کا پہلا ملک ہے۔
پاکستان گندم، سیمنٹ، چینی، اور کچھ تیل افغانستان کو بھیجتا ہے، جبکہ وہاں سے خشک میوہ جات، پھل، سبزیاں اور کوئلہ سب سے زیادہ درآمد کیا جاتا ہے۔
شاہد حسین خیبر پختونخوا چیمبر آف کامرس کے نائب صدر اور پاک افغان تجارتی معاملات پر گہری نظر رکھتے ہیں۔
انہوں نے انڈپینڈنٹ اردو کو بتایا کہ طورخم اہم تجارتی مرکز ہے اور اب اس سرحد پر درآمدات و برآمدات کا سالانہ حجم ایک ارب ڈالر سے زیادہ ہے۔
’پاکستان اور افغانستان کے درمیان روزانہ کروڑوں روپوں کی تجارت ہوتی ہے اور ایک دن سرحد بند رہنے سے دونوں طرف کے تاجروں کا نقصان ہوتا ہے۔‘
صنعت کاروں کے علاوہ شاہد حسین کے مطابق ٹرک مالکان، ڈرایئورز سمیت ٹرانزٹ کاروبار سے وابستہ تمام شعبہ جات اور مزدوروں کو روزانہ معاشی نقصان ہوتا ہے۔
