انڈین اداکار اور گلوکار ایوشمان کھرانہ ہمیشہ سے اپنی جاندار اداکاری اور فلموں کے حقیقت سے قریب تر موضوعات کی وجہ سے سراہے جاتے ہیں، لیکن حالیہ چند دنوں سے ’دل دل پاکستان‘ گانے کی وجہ سے انہیں انڈین شائقین کی جانب سے سخت ناراضگی کا سامنا ہے۔

22 جنوری کو ایوشمان کھرانا اترپردیش کے شہر ایودھیا میں رام مندر کی تاریخی افتتاحی تقریب میں شریک تھے، جس کی تصاویر بھی انہوں نے اپنے انسٹاگرام پر شیئر کیں، اس کے بعد سوشل میڈیا پر ایک ویڈیو وائرل ہو گئی، جس میں وہ کسی کنسرٹ میں پاکستان کا مشہور ترین ملی نغمہ ’دل دل پاکستان‘ گا رہے ہیں۔

یہ ویڈیو منظر عام پر آنےکے بعد انڈین اداکار کو تین روز سے سوشل میڈیا پر سخت ٹرولنگ کا سامنا ہے اور کئی صارفین کی جانب سے انہیں ’غدار‘ کہہ کر دھمکیاں بھی دی جا رہی ہیں۔

جے ایس آر نامی صارف نے ایکس پر ایوشمان کی ویڈیو شیئر کرکے انہیں ٹیگ کرتے ہوئے لکھا: ’یہ کبھی نہیں بھلایا جائے گا اور نہ کبھی معاف کیا جائے گا۔ آپ کسی بھی سطح پر گر سکتے ہیں۔‘

اسی صارف نے ایک اور پوسٹ میں انڈین حکومت سے اپیل کی کہ ایوشمان کھرانہ کی تمام سرگرمیوں اور لین دین کو ٹریک کیا جائے کیونکہ ایسی حرکت کوئی غدار ہی کر سکتا ہے۔

وروشا نامی صارف نے اسے ’کیریئر تباہ کرنے والی پرفارمنس‘ قرار دیا۔

جیری نامی صارف نے ایوشمان کو ’ریاست مخالف‘ کہتے ہوئے بائیکاٹ کا مطالبہ کیا اور لکھا کہ انڈین اداکار کو ہر سوشل میڈیا پلیٹ فارم پر ان فالو کیا جائے۔

 چیراگ نامی صارف نے کہا کہ ایوشمان نے اپنی عزت کھو دی ہے۔ ’ایسا دوغلا آدمی بالی وڈ میں ہی ملتا ہے، تو بنیادی طور پر رام مندر صرف ایک پبلسٹی سٹنٹ تھا۔‘

ساروو نامی صارف نے ایوشمان کی گلوکاری پر طنز کرتے ہوئے کہا: ’اتنا بے سرا گانا، گانے کی بےعزتی ہے، اس نے گانے کا کچرا بنا دیا ہے، مجھے یقین ہے کہ پاکستانی بھی کوس رہے ہوں گے۔‘

ان سب کے دوران کئی صارفین کی جانب سے 2018 کی ایک پوسٹ بھی شیئر کی جا رہی ہے، جس میں ایوشمان پاکستان کے سابق وزیراعظم عمران خان کو وزیراعظم بننے پر مبارک باد دے رہے ہیں۔

اس پوسٹ میں ایوشمان کا کہنا تھا کہ ’ 92 کے کرکٹ ورلڈ کپ میں جیت کر کی گئی تقریر پر میرے والد نے پیش گوئی کی تھی کہ یہ بندہ پکا ایک دن وزیراعظم بنے گا اور آج یہ ہو گیا۔‘

انہوں نے عمران خان کو ٹیگ کرتے ہوئے لکھا تھا کہ ’میں ہمیشہ سے آپ کا مداح رہا ہوں اور اب آپ پر برصغیر میں امن اور ہم آہنگی لانے کی سب سے بڑی ذمہ داری ہے۔‘

ٹائمز آف انڈیا کے مطابق ایوشمان کھرانہ کی پی آر ٹیم نے اس سارے معاملے پر وضاحت دیتے ہوئے کہا ہے کہ یہ ویڈیو 2017 میں دبئی کے ایک کنسرٹ کی ہے، جہاں انڈین اداکار نے پاکستانی گلوکار علی ظفر کے ساتھ دونوں ممالک کے درمیان ہم آہنگی کے لیے ایک شو میں حصہ لیا تھا۔

اداکار کی ٹیم کا مزید کہنا تھا کہ سوشل میڈیا پر کچھ صارفین کی جانب سے جانتے بوجھتے اس کنسرٹ کا وہ حصہ شیئر کیا جا رہا ہے، جس میں ایوشمان ’دل دل پاکستان‘ گا رہے ہیں۔

’دل دل پاکستان‘ 1987 میں میوزک بینڈ وائٹل سائنز کا گایا ہوا ملی نغمہ ہے، جسے جنید جمشید نے گایا۔ یہ ملی نغمہ راتوں رات مشہور ہوا اور قومی ترانے کے بعد دنیا بھر میں پاکستان کی شناخت بنا۔

مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔