پاکستان میں آئندہ ماہ سے شروع ہونے والی آئی سی سی چیمپیئنز ٹرافی کے لیے تاحال تینوں کرکٹ سٹیڈیمز پر تعمیراتی کام جاری ہے جو پی سی بی کے مطابق اختتامی مراحل میں ہے اور 31 جنوری تک مکمل کر لیا جائے گا۔
ان تین سٹیڈیمز میں قدافی سٹیڈیم لاہور، راولپنڈی کرکٹ سٹیڈیم اور کراچی کا نیشنل بینک کرکٹ ارینا (جس کا پہلے نام نیشنل سٹیڈیم تھا) شامل ہیں۔
آئی سی سی چیمپیئنز ٹرافی آئندہ ماہ 19 فروری سے شروع ہونے جا رہی ہے جو نو مارچ تک جاری رہے گی۔ اس دوران سوائے انڈیا کے باقی تمام ٹیمیں پاکستان میں اپنے میچز کھیلیں گی جبکہ انڈیا کے تمام میچز اور ایک سیمی فائل متحدہ عرب امارات میں کھیلے جائیں گے۔
اس حوالے سے انڈین میڈیا پر کافی بات کی جا رہی ہے کہ پاکستان تاحال سٹیڈیمز کا تعمیراتی کام ہی مکمل نہیں کر پایا ہے جبکہ پاکستان کرکٹ بورڈ کی جانب سے مسلسل اپ ڈیٹس فراہم کی جا رہی ہیں۔
پاکستان کرکٹ بورڈ نے بتایا ہے کہ 31 جنوری تک تمام کام مکمل کر لیے جائیں گے اور پاکستان، نیوزی لینڈ اور جنوبی افریقہ کے درمیان کھیلی جانے والی سہ ملکی سیریز بھی چیمپیئنز ٹرافی سے قبل قذافی سٹیڈیم اور نیشنل بینک کرکٹ ارینا میں کھیلی جائے گی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پی سی بی کی جانب سے جمعرات 23 جنوری کو کراچی کے کرکٹ سٹیڈیم کی اپ گریڈیشن کے کا کام کا جائزہ لینے کے لیے میڈیا کو سٹیڈیم کا دورہ کروایا گیا تھا۔
اس موقع پر میڈیا کو بریفنگ دیتے ہوئے پراجیکٹ ڈائریکٹر بلال چوہان نے بتایا تھا کہ نیشنل سٹیڈیم کی اپ گریڈیشن اور تعمیرات کا تمام کام مکمل ہو گیا ہے۔ جب کہ گراؤنڈ فلور پر سٹینڈز اور ٹاپ فلور پر پارٹیشن کا کام جلد مکمل ہو جائے گا۔
بلال چوہان کے مطابق: ’سٹینڈز کے مکمل ہونے کے بعد کرسیاں لگا دی جائیں گی۔ پہلے فلور پر موجود پلیئرز ڈریسنگ روم مکل ہوچکا ہے، اس کی صفائی کا کام جاری ہے۔
’سٹیڈیم میں پرانے چھ لائٹ ٹاورز کی جگہ نئی ایل ای ڈی لائٹ والے تین لائٹ ٹاورز پر فریم لگانے کا کام مکمل ہوچکا ہے جبکہ بقیہ تین ٹاورز پر بھی فریم کا کام جلد مکمل ہو جائے گا جس کے بعد لائٹس نصب کر دی جائیں گی۔‘
بقول بلال چوہان: ’عمارت میں جدید طرز کی دو لفٹ نصب ہو گئیں ہیں۔ بیرونی لفٹ چند روز میں لگ جائے گی۔ گراؤنڈ فلور پر وی وی آئی پی انکلوژرز میں کام مکمل ہونے کے قریب ہے۔ اہم شخصیات کے لیے گیلری بھی جلد مکمل ہو جائے گی۔‘
’سٹیڈیم کے لیے دونوں ڈیجیٹل سکرینز دبئی پہنچ گئی ہیں، جو جلد کراچی لائی جائیں گی۔ بڑی سکرین وسیم اکرم انکلوژر اور چھوٹی سکرین عالم انکلوژر کے سامنے نصب کی جائے گی۔‘
