پاکستان میں آئندہ ماہ سے شروع ہونے والی آئی سی سی چیمپیئنز ٹرافی کے پاکستان میں کھیلے جانے والے میچوں کی ٹکٹوں کی فروخت کل یعنی 28 جنوری سے شروع ہونے جا رہی ہے۔
پاکستان میں کھیلے جانے والے گروپ میچز اور دوسرے سیمی فائنل میچ کی ٹکٹیں 28 جنوری کو پاکستانی وقت کے مطابق دوپہر دو بجے سے دستیاب ہوں گی جبکہ دبئی میں کھیلے جانے والے انڈیا کے میچز اور پہلے سیمی فائنل کی ٹکٹوں کی فروخت کا اعلان ابھی نہیں کیا گیا ہے۔
آئی سی سی چیمپئنز ٹرافی کا انعقاد 19 فروری سے پاکستان میں ہو رہا ہے جبکہ انڈیا اپنے میچز متحدہ عرب امارات میں کھیلے گا۔
میگا ٹورنامنٹ کا فائنل نو مارچ کو کھیلا جائے گا۔
پاکستان میں کھیلے جانے والے میچز کے لیے جنرل سٹینڈ کے ٹکٹ کی قیمت ایک ہزار پاکستانی روپے ہوگی جبکہ پریمیم سیٹس مختلف کیٹگریز میں 1500 روپے سے دستیاب ہوں گی، جن میں کراچی، لاہور اور راولپنڈی میں ہونے والے دس میچز شامل ہیں۔
اسی طرح لاہور کے قدافی سٹیڈیم میں پانچ مارچ کو کھیلے جانے والے دوسرے سیمی فائنل کی بات کی جائے تو اس کی سب سے مہنگی ٹکٹ 25000 جبکہ سب سے سستی ٹکٹ 2500 پاکستانی روپے رکھی گئی ہے۔
راولپنڈی میں ہونے والے میچز کی سب سے مہنگی ٹکٹ 18000 جبکہ سب سے سستی ٹکٹ 1000 ہے۔ اسی طرح کراچی میں کھیلے جانے والے میچز کی سب سے سستی ٹکٹ 1000 اور سب سے مہنگی ٹکٹ 25000 پاکستانی روپے رکھی گئی ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
آئی سی سی کے مطابق فزیکل ٹکٹیں بھی پاکستان میں ٹی سی ایس کے منتخب ایکسپریس سینٹرز پر دستیاب ہوں گی جن کا اعلان مناسب وقت پر کیا جائے گا۔
چیمپئنز ٹرافی کے فائنل کی ٹکٹیں دبئی میں ہونے والے پہلے سیمی فائنل کے بعد فروخت کے لیے پیش کی جائیں گی۔
آئی سی سی کے چیف کمرشل آفیسر انوراگ داھیا کا کہنا ہے کہ ’یہ ایک یادگار موقع ہے کہ پاکستان 1996 کے بعد پہلے گلوبل ٹورنامنٹ کی میزبانی کر رہا ہے۔‘
انہوں نے اپنے بیان میں کہا ہے کہ ’اس ٹورنامنٹ میں دنیا کی بہترین ٹیمیں حصہ لے رہی ہیں۔ ہم اپنے فینز کی حوصلہ افزائی کر رہے ہیں کہ وہ اس سے محروم نہ ہوں اور اپنی ٹکٹیں حاصل کر لیں۔‘
