اسلام آباد میں پیر کو منعقدہ ایک تقریب کے دوران سعودی فنڈ فار ڈویلپمنٹ اور پاکستان نے دونوں ممالک کے درمیان 1.61 ارب ڈالر کے دو معاہدوں پر دستخط کیے ہیں۔
پاکستان اور سعودی فنڈ فار ڈویلپمنٹ کے درمیان پیر کو اسلام آباد میں مفاہمتی یادداشتوں پر دستخط کی تقریب ہوئی جس میں وزیراعظم شہباز شریف، وفاقی وزرا، سعودی فنڈ کے سی ای او سلطان عبدالرحمن المرشد اور سعودی سفیر نے شرکت کی۔
ایوان وزیر اعظم سے جاری بیان کے مطابق معاہدوں میں سعودی عرب سے تیل درآمد کے لیے 1.20 ارب ڈالر اور مانسہرہ میں گریویٹی فلو واٹر سکیم کی تعمیر کے لیے 41 ملین ڈالر رعائتی قرضے کے معاہدے شامل ہیں۔
بیان کے مطابق وزیر اعظم محمد شہباز شریف نے سعودی فنڈ فار ڈویلپمنٹ کے سی ای او سلطان بن عبدالرحمٰن المرشد کی قیادت میں وفد سے ملاقات کی۔
ملاقات میں شہباز شریف نے سعودی عرب اور پاکستان کے درمیان دیرینہ دوستی کا حوالہ دیتے ہوئے صحت، توانائی، انفراسٹرکچر اور تعلیم کے شعبوں میں پاکستان کو مالی امداد فراہم کرنے کے ساتھ ساتھ 2022 کے تباہی کن سیلاب کے بعد تعمیر نو کے لیے ایس ایف ڈی کی کوششوں کو سراہا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
دوسری جانب سعودی فنڈ فار ڈویلپمنٹ کی جانب سے جاری بیان میں کہا گیا ہے کہ ’سعودی قیادت کی ہدایات کے مطابق، اور اسلامی جمہوریہ پاکستان کے وزیر اعظم شہباز شریف کی موجودگی میں، سعودی فنڈ فار ڈویلپمنٹ کے سی ای او سلطان المرشد نے آج پاکستان کے معاشی امور کی وزارت کے سیکرٹری ڈاکٹر کاظم نیاز کے ساتھ 1.2 ارب ڈالر کے تیل کی مالی اعانت کے لیے معاہدے پر دستخط کیے۔‘
سعودی فنڈ فار ڈویلپمنٹ کی جانب ایکس پر جاری بیان میں مزید کہا گیا ہے کہ ’اس معاہدے کا مقصد پاکستان کی معیشت کو سہارا دینا، سیکٹر کی ترقی کو فروغ، معاشی چیلنجوں سے نمٹنے اور ایک مستحکم معیشت کی تعمیر ہے۔ یہ 2019 سے سعودی عرب کی جانب سے تیل مشتقات کی مالی اعانت کے سلسلے میں فراہم کی جانے والی مدد کی استثنیٰ کے طور پر آیا ہے، جس کی کل رقم 6.7 ارب ڈالر ہو گئی ہے۔‘
پاکستان کے وزیر اعظم کے دفتر سے جاری بیان کے مطابق شہباز شریف نے آئل امپورٹ فنانسنگ فیسلٹی کے معاہدے پر دستخط کا خیرمقدم کرتے ہوئے کہا کہ یہ منصوبہ فوری مالیاتی بوجھ کو کم کرتے ہوئے پٹرولیم مصنوعات کی مستحکم فراہمی کو یقینی بنا کر پاکستان کی اقتصادی لچک کو مضبوط کرے گا۔
ایوان وزیر اعظم کے بیان میں مزید کہا گیا ہے کہ ایس ایف ڈی مانسہرہ، خیبر پختونخوا میں گریوٹی فلو واٹر سپلائی سکیم کے لیے 41 ملین امریکی ڈالر کی رقم فراہم کرے گا جس سے مانسہرہ کے 150,000 مقامی لوگوں کے لیے پینے کے صاف پانی تک رسائی میں اضافہ ہوگا اور 2040 تک 201,249 افراد کو پانی کی طلب کو پورا کرنے کے لیے کافی ہو گا۔
