جماعت اسلامی پاکستان کے امیر حافظ نعیم الرحمٰن نے اتوار کو اسلام آباد میں منعقدہ غزہ مارچ سے خطاب میں 26 اپریل کو فلسطینی عوام سے اظہارِ یکجہتی کے لیے ملک گیر ہڑتال کا اعلان کرتے ہوئے کہا کہ یہ ہڑتال ’ایک پُرامن جہاد‘ ہو گی۔
حافظ نعیم نے کہا کہ ’ہم کسی سے ٹکراؤ نہیں چاہتے، نہ پولیس سے فساد چاہتے ہیں، مگر ہمارا راستہ کوئی نہیں روک سکتا۔‘
جماعت اسلامی نے آج ریڈ زون میں واقع امریکی سفارت خانے کے باہر احتجاج کا اعلان کیا تھا۔ تاہم حکومت کی جانب سے ریڈ زون جانے والے تمام راستوں کو کنٹینرز لگا کر مکمل بند کرنے کے بعد پارٹی نے ایکسپریس وے پر مظاہرے کا فیصلہ کیا۔
جماعت اسلامی اسلام آباد کے سیکریٹری عامر بلوچ نے بتایا کہ وہ اسلام آباد ایکسپریس وے پر مارچ کریں گے۔
’اسلام آباد ایکسپریس وے پر زیرو پوائنٹ کے قریب مارچ ہو گا اور ایچ-8 اوور ہیڈ برج پر سٹیج قائم کیا جائے گا۔ جماعت اسلامی پاکستان کے امیر حافظ نعیم الرحمٰن سمیت مرکزی رہنما ریلی سے خطاب کریں گے۔‘
مارچ سے خطاب میں حافظ نعیم نے مزید کہا کہ ’ہم اپنے ملک کی عزت کرتے ہیں، مگر حکمرانوں کو جھنجھوڑنا چاہتے ہیں کہ فلسطین کے لیے، کشمیر کے لیے، ہمارے ساتھ کھڑے ہوں۔‘
انہوں نے کہا کہ امت مسلمہ غفلت کی نیند سو رہی ہے، جسے جگانے کے لیے بار بار اسلام آباد کا رخ کیا جاتا ہے۔
’یہ صرف سیاسی معاملہ نہیں، فلسطین سے ہمارا دینی، تاریخی، اور نظریاتی رشتہ ہے۔ جب پاکستان بنا، تو فلسطین کی آزادی کی تحریک بھی ساتھ ہی چل رہی تھی۔‘
حافظ نعیم نے کہا کہ مسلم حکمرانوں نے بے حسی کا لبادہ اوڑھ رکھا ہے۔ ’آج بھی نتن یاہو کہتا ہے کہ ہم جنگ نہیں روکیں گے۔ کیا یہ وقت نہیں کہ ہم اپنی صفوں میں اتحاد پیدا کریں؟ مسلم حکمران اب بھی نہ جاگے تو تاریخ معاف نہیں کرے گی۔‘
اُنہوں نے امریکہ کو غیرمعتبر قرار دیتے ہوئے کہا کہ ’امریکہ کسی کا نہیں ہوتا، نہ دوستوں کا نہ دشمنوں کا۔ آج وہاں خود ان کی حکومت کے خلاف لوگ احتجاج کر رہے ہیں۔
’یورپ، پیرس، ایڈنبرا ہر جگہ اسرائیل کے خلاف مظاہرے ہو رہے ہیں۔‘
انہوں نے مزید کہا: ’میں پوری امت باالخصوص پاکستانی قوم سے اپیل کرتا ہوں کہ اسرائیلی اور اس کے پشت پناہوں کی مصنوعات کا بائیکاٹ جاری رکھیں۔‘
تقریر کے اختتام پر حافظ نعیم نے عوام سے اپیل کی کہ ’پنجاب، سندھ، بلوچستان، خیبرپختونخوا اور گلگت بلتستان کے غیور عوام ایک جھنڈے تلے جمع ہو جائیں۔ صرف مسلمان بنیں، تفرقہ ختم کریں، اور 26 اپریل کی ہڑتال کو کامیاب بنائیں۔‘
شرکا میں مرد، خواتین، بچوں اور بزرگوں کی بڑی تعداد نے شرکت کی۔
الخدمت ویمن ٹرسٹ کی نائب امیر قدسیہ وحید نے انڈپینڈنٹ اردو سے بات کرتے ہوئے کہا کہ ’ہر بندے نے اپنا حساب دینا ہے اور ہم سب نے اپنا حصہ ڈالنا ہے۔ جیسے بائکاٹ کر کے یا ملین مارچ کی صورت میں ہو۔ اللہ بس ہمارے فلسطین پر اپنا کرم کر دے۔‘
احتجاج میں شریک بین الاقوامی اسلامک یونیورسٹی کے طالب علم سید صداقت یار نے کہا ’مغربی ممالک اکٹھے ہو کر فلسطین کے مسلمانوں پر ظلم ڈھا رہے ہیں۔ یہ ظلم اتنی انتہا پر ہے کہ جس کی مثال تاریخ میں کہیں نہیں ملتی۔
’پوری دنیا کے مسلمان اور بالخصوص پاکستان کی عوام اپنی فلسطینی بہن بھایئوں کے ساتھ کھڑے ہیں۔‘
ریڈ زون مکمل سیل
’غزہ مارچ‘ کے موقعے پر وفاقی دارالحکومت میں آج سکیورٹی کے غیر معمولی انتظامات تھے۔
ریڈزون کو جانے والے راستوں کے علاوہ سری نگر ہائی وے پر بھی کنٹینرز لگائے گئے اور بڑی تعداد میں اسلام آباد پولیس کی نفری تعینات رہی۔
اس کے علاوہ اسلام آباد کے علاقے آبپارہ اور سیکٹر جی سکس کو بھی اسلام آباد پولیس نے متعدد مقامات پر بند کر دیا۔
ریڈ زون کے داخلی و خارجی راستوں پر خار دار تاریں اور بیرئیرز لگائے گئے تھے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اسلام آباد ٹریفک پولیس کا کہنا ہے کہ سری نگر ہائی وے پر غیر معمولی سکیورٹی انتظامات ہیں لہٰذا شہری سری نگر ہائی وے سے منسلک متبادل راستوں کا انتخاب کریں۔
اس سے قبل لاہور اور ملتان سمیت ملک کے دیگر شہروں میں بھی جماعت اسلامی نے رواں ہفتے کے دوران فلسطینیوں سے یکجہتی کے لیے اجتماعات اور ریلیاں منعقد کی تھیں۔
کراچی میں جمعرات کو این ای ڈی یونیورسٹی میں طلبہ نے غزہ میں اسرائیلی جارحیت کے خلاف اور فلسطینیوں سے اظہار یکجہتی کے لیے ریلی منعقد کی تھی جس میں ہزاروں طلبہ شریک ہوئے تھے۔
کراچی میں ’غزہ ملین مارچ‘ کے اعلانات
گذشتہ اتوار یعنی 13 اپریل کو بھی جماعت اسلامی پاکستان نے کراچی میں ’یکجہتی غزہ ملین مارچ‘ منعقد کیا تھا جس میں لاکھوں افراد نے شرکت کی تھی۔
امیر جماعت اسلامی پاکستان حافظ نعیم الرحمٰن نے کراچی میں خطاب کرتے ہوئے اسرائیلی مصنوعات کے مکمل بائیکاٹ کا اعلان کیا تھا۔
کراچی کی مرکزی شاہراہ فیصل پر مارچ میں شریک لوگوں کی بڑی تعداد سے خطاب میں انہوں نے 22 اپریل کو ملک بھر میں شٹر ڈاؤن ہڑتال کا اعلان کرتے ہوئے کہا کہ وہ اس ہڑتال کو عالمی سطح پر پھیلانے کے لیے دیگر ممالک کی تحریکوں اور ریاستوں سے بھی رابطہ کریں گے۔
تاہم بعد میں تاجر تنظیموں سے رابطوں کے بعد یہ تاریخ تبدیل کر کے 26 اپریل کر دی گئی۔
ان کا کہنا تھا کہ اسلامی ممالک کے حکمرانوں کو خطوط لکھے جا چکے ہیں اور عالمی سطح پر دباؤ ڈالا جائے گا، جبکہ عوام کو امریکہ کے غلاموں کے خلاف اُٹھ کھڑے ہونے کی کال دی جائے گی تاکہ پاکستان کو ایک باوقار اور ترقی یافتہ ملک بنایا جا سکے۔
