مگرمچھوں کا گشت شروع ہونے سے پہلے دریا پار کرتی ہوئی شیرنی۔تصویر: الیکسس کیسٹیلو
قدیم چنگ سلطنت کے وقتوں سے رائج چینی نئے سال کے موقعے پر آتش گیر ڈریگن کا رقص۔ ڈریگن تھامنے والوں پر آگ کی چنگاریاں گرتے رہنا عام سی بات ہے۔تصویر: لیون ووک
درخت کے تنے سے ہم رنگ ’جےکو‘ چھپکلی خود کو چھپاتے ہوئے۔تصویر: لی ہانگ لو
بلغاریہ کے لوگ اپنے مذہبی تیوہار کے موقعے پر ’کوکیری‘ کا روپ دھارے ہوئے۔ زیر نظر تصویر میں تمام مقدس کوکیری ڈھلتے سورج کا نظارہ کرنے کے لیے اپنے مقامی پہاڑ کی چوٹی پر موجود ہیں۔ تصویر: کرسٹین ٹیلر
’میں نے سنا تھا کہ اس پہاڑ کی چوٹی پر سورج طلوع ہوتے وقت قوس قزح کے رنگ چھلکتے ہیں۔ میں نے یہاں ایک رات پہلے ہی قیام کی ٹھانی۔ صبح اتنی دھند تھی کہ بہت دیر تک انتظار کرنے کے باوجود بھی کسی تصویر کے کوئی آثار نہیں تھے۔ تب مایوسی میں واپس اترتے ہوئے یہ خوبصورت ’الپاکا‘ جوڑا مجھے دکھائی دیا۔ اب میرے انتظار کی قیمت وصول ہو چکی تھی‘۔ تصویر: برائن لاروسا
’یہ تصویر اتارنے کے لیے مجھے گرم ترین اونی لباس پہن کر الاسکا کے دریا عبور کرنا پڑے۔ میری خوش قسمتی تھی کہ میں نے وہ منظر محفوظ کیا جب برفانی ریچھ کے بچے کھیلتے ہوئے تالی مار رہے تھے۔ ایک مرتبہ برف جم جائے تو چھوٹی موٹی کشتیاں تو ویسے بھی کام نہیں آتیں۔ واحد حل یہ ہےکہ آپ علی الصبح نکلیں اور جمے ہوئے دریا کے آس پاس برفانی ریچھوں کا انتظار کریں‘، تصویر: مشیل تھیئل
’وینس کے ساحل سے گزرتے ہوئے اس جوڑے کو دیکھ کر میں نے تصویر بنانے کی ٹھانی۔ کم از کم پندرہ منٹ اس بیلینسنگ سٹریپ کو سیٹ کرنے کے بعد جب یہ اس پر چل سکنے کے قابل ہوئے تو ان سے زیادہ خوشی مجھے ہوئی۔ تب میرے پاس ایک شاندار تصویر آنے والی تھی‘۔ تصویر: کارل لورینز راموس
مینڈک مچھلی ایک خوفناک شکاری ہے۔ منہ کھول کر اپنی جگہ جمی ہوئی یہ مچھلی تصویر کے فوراً بعد اپنا شکار بے رحمی سے نگل چکی تھی۔ تصویر: گیبرئیل بیریتھیو
چائنا ٹاؤن کے قدیمی علاقے میں ہونے والی ایک پریڈ کا فضائی منظر۔ تصویر: گانگ چی گو
نیشنل جیوگرافک کی طرف سے شروع کیا گیا فوٹو گرافی مقابلہ اپنے پانچویں ہفتے میں داخل ہو چکا ہے۔
تمام عمروں کے فوٹوگرافر دور دراز سے مقابلے کے لیے اپنی تصاویر بھجوا رہے ہیں۔
اس مقابلے میں ایسی تصاویر کی حوصلہ افزائی کی جاتی ہے جو دنیا کے مختلف حصوں میں پائے جانے والے لوگوں کی ثقافت، وہاں پائی جانے والی جگہوں اور دلچسپ سفری لمحات کی عکاسی کرتی ہوں۔
