رواں برس کا نوبل انعام برائے فزکس جاپانی سائنسدان سیوکورو مانابے، جرمنی کے کلاؤس ہاسل مان اور اٹلی کے جارجیو پاریسی کو مشترکہ طور پر دینے کا اعلان کیا گیا ہے۔

اس انعام کا اعلان کرنے والی جیوری کے مطابق ان تینوں ماہرین کو یہ انعام ماحولیات کے ماڈلز اور فزیکل سسٹمز کی تشریح و تفہیم کے لیے ان کی خدمات کے اعتراف میں دینے کا فیصلہ کیا گیا۔

جاپان کے 90 سالہ مانابے اور جرمنی کے 89 سالہ ہاسل مان مشترکہ طور پر کلائمیٹ ماڈلز پر تحقیق کے لیے فزکس کے اس سال کے نوبل پرائز کے آدھے حصے کے حقدار قرار پائے۔

ان کی تحقیق زمینی آب و ہوا سے متعلق چند بنیادی معلومات اور اس پر اثر انداز ہونے والے انسانی عوامل سے متعلق ہے۔

اطالوی سائنس دان 73 سالہ پاریسی کو یہ اعزاز فزیکل سسٹمز میں خرابی، اتار چڑھاؤ اور بے ترتیب مادوں اور بے ترتیب عوامل کے نظریے سے متعلق ان کے انقلابی کام کے اعتراف میں دینے کا فیصلہ کیا گیا ہے۔

نوبیل کمیٹی برائے فزکس کی جیوری کے سربراہ تھور ہانس ہینسن کا کہنا ہے کہ ’عالمی رہنما جنہیں ابھی تک پیغام نہیں ملا، مجھے یقین نہیں ہے کہ وہ اسے حاصل بھی کریں گے کیونکہ یہ ہم کہہ رہے ہیں۔ لیکن جو ہم کہہ رہے ہیں وہ یہ ہے کہ آب و ہوا کی ماڈلنگ فزکس کی تھیوری پر مبنی ہے۔‘

منابے امریکہ کی پرنسٹن یونیورسٹی سے وابستہ ہیں جبکہ ہاسل مین ہیمبرگ کے میکس پلانک انسٹی ٹیوٹ برائے موسمیات میں پروفیسر ہیں۔

پیرسی جنہوں نے فروری میں معتبر وولف انعام بھی جیتا تھا روم کی سیپینزا یونیورسٹی میں پروفیسر ہیں۔