کراچی: ایکٹوسٹ ارسلان خان کی مختصر حراست کے بعد گھر واپسی

سوشل میڈیا ایکٹوسٹ اور جیو نیوز کے سابق ملازم محمد عامر ارسلان خان رینجرز کی حراست میں مختصراً رہنے کے بعد واپس گھر پہنچ گئے ہیں۔

عامر ارسلان، جو اے کے 47 کے نام سے ٹوئٹر اکاؤنٹ چلاتے ہیں، نے جمعے اور ہفتے کی درمیانی شب ایک ٹویٹ میں اپنی  ’بخیریت گھر واپسی‘ کا اعلان کرتے ہوئے ’مشکل وقت میں ساتھ دینے‘ پر سب کا شکریہ ادا کیا۔

عامر ارسلان خان کو 24 جون کو علی الصبح مبینہ طور پر ان کے گھر سے اٹھا لیا گیا تھا، جس کے بعد ٹوئٹر پر ’ارسلان خان کو رہا کرو‘ کا ہیش ٹیگ ٹرینڈ کرتا رہا، جس میں لوگوں کا کہنا تھا کہ انہیں رینجرز نے حراست میں لیا ہے۔

مزید پڑھیے: ’لاپتہ‘ سوشل میڈیا ایکٹیوسٹ سرمد سلطان کون ہیں؟

ارسلان خان کی اہلیہ نے بھی سوشل میڈیا پر جاری ویڈیو پیغام میں کہا کہ ’رینجرز کے 14 سے 15 اہلکار ہمارے گھر میں داخل ہوئے، ان کے ہاتھ میں اے کے 47 بندوقیں تھیں، جو انہوں نے ہمارے اوپر تانیں اور وہ میرے اور بچوں کی موجودگی میں ارسلان کو اپنے ساتھ لے گئے۔‘

انہوں نے مزید کہا: ’میرے اصرار کرنے پر کہ آپ انہیں کہاں لے کر جارہے ہیں اور ان کا جرم کیا ہے، انہوں (رینجرز اہلکاروں) نے مجھے بتایا کہ یہ سوشل میڈیا پر بہت لکھتے ہیں، بہت بولتے ہیں۔‘

ارسلان خان کی اہلیہ نے متعلقہ اداروں سے مدد کی اپیل بھی کی تھی۔

بعدازاں سندھ رینجرز نے اپنی ایک پریس ریلیز میں ارسلان خان کی گرفتاری ظاہر کردی۔

ترجمان رینجرز کی جانب سے جاری کی گئی پریس ریلیز میں کہا گیا کہ ’پاکستان رینجرز سندھ نے 24 جون 2022 کو انٹیلی جنس معلومات کی بنیاد پر کارروائی کرتے ہوئے کلفٹن کے علاقے سے ملزم محمد عامر ارسلان خان عرف اے کے 47 کو ایک دہشت گرد گروپ کے ساتھ روابط کی بنا پر گرفتار کیا تھا۔‘

سندھ رینجرز کی جانب سے جاری کی گئی پریس ریلیز کا عکس

مزید کہا گیا کہ ’ابتدائی تفتیش کے دوران ملزم کے دہشت گرد گروپ سے مالی معاونت لینے اور روابط کا انکشاف ہوا ہے۔‘

ترجمان کا مزید کہنا تھا کہ ’واضح وائٹ کالر کرائم کی بنا پر مکمل تحقیقات کی غرض سے کیس متعلقہ اتھارٹی کے سپرد کیا جارہا ہے جبکہ ملزم کومستقبل میں ہونے والی تفتیش میں تعاون کرنے کی تنبیہ کرکے رہا کردیا گیا ہے۔‘