پاکستان ویمن کرکٹ ٹیم کی سابق کپتان اور کمنٹیٹر ثنا میر کا بلے باز فخر زمان سے متعلق دیا گیا ایک بیان سوشل میڈیا پر زیر بحث ہے۔ کچھ صارفین ان کے بیان کا دفاع کر رہے ہیں تو کچھ ان کے بیان کو بابر اعظم کے خلاف تعبیر کر کے انہیں تنقید کا نشانہ بنا رہے ہیں۔

سوشل میڈیا پر وائرل ویڈیو میں ثنا میر کو فخر زمان کے لیے کہتے ہوئے سنا جا سکتا ہے: ’ان کے رنز کی سب سے اچھی بات یہ ہے کہ وہ ہمیشہ ٹیم کے لیے ہوتے ہیں۔

’اگر سو (رنز) کیا بھی ہے تو ایک سو پچیس کے سٹرائیک ریٹ سے اس وقت کیا جب آپ تین سو، ساڑھے تین سو، تین سو تیس رنز کا ٹارگٹ پورا کرنے جا رہے ہوتے ہیں۔ سو کے سٹرائیک ریٹ پر نہیں کیا۔ سب سے اچھی بات ان کے رنز کی یہی ہے۔‘

انہوں نے مزید کہا: ’یہ اچھا کھیلنے والے کھلاڑی ہیں اور میرے حساب سے اسی لیے ٹیم کے لیے بہت ضروری ہیں۔ جہاں پر ٹیم میں ایک بال پر ایک رن بنانے والے کھلاڑی ہیں وہاں ان کا کردار بہت اہم ہو جاتا ہے۔

’جو بھی تین سو رنز سے زیادہ کا ٹارگٹ حاصل کیا گیا ہے اس میں ان کا کردار بہت اہم رہا ہے، اسّی کا ایوریج رہا ہے جو کہ غیرمعمولی ہے۔‘

ثنا میر کے اس بیان کو کئی سوشل میڈیا صارفین بابر اعظم کے خلاف تعبیر کر کے انہیں تنقید کا نشانہ بنا رہے ہیں جب کہ کئی صارفین کا کہنا ہے کہ ثنا نے کچھ غلط نہیں کہا۔

آکاش نامی ٹوئٹر صارف نے کہا: ’یہ بات حیران کن ہے کہ ثنا میر کو یہ لگتا ہے کہ ایک روزہ کرکٹ میں سو کے سٹرائیک ریٹ سے کھیلنا ناکافی ہے۔‘

اسی طرح صبا نامی صارف کا کہنا تھا: ’یہ بہت پریشان کن ہے کہ ثنا میر جیسے افراد اپنی رائے کو حقائق بنا کر پیش کرتے ہیں۔ ٹوئٹر پر پہلے ہی ایسے کئی صارفین موجود ہیں جو ایسی آرا رکھتے ہیں اور ثنا میر جیسی شخصیت کی جانب سے ایسی بات ایسے افراد کی حوصلہ افزائی کرے گی۔‘

کئی سوشل میڈیا صارفین ثنا میر کی حمایت میں بھی سامنے آئے اور ان کے موقف کا دفاع کیا۔

عمران صدیق نامی ٹوئٹر صارف نے لکھا کہ ’ثنا میر نے بابر اعظم کا نام بھی نہیں لیا اور ٹوئٹر ان پر حملہ آور ہو گیا۔‘

ٹوئٹر صارف فاطمہ سجاد شاہ کا کہنا تھا: ’ثنا میر سے اتنا نفرت کا اظہار کیوں کیا جا رہا ہے؟ انہوں نے حقائق بیان کیے ہیں۔ فخر ایک اہم کھلاڑی ہیں، گو ہماری ٹیم میں کئی اچھے کھلاڑی موجود ہیں مگر ہمارے پاس چند ہی ایسے کھلاڑی ہیں جو گیم کو ایسے چلا سکتے ہیں جیسے فخر چلاتے ہیں۔‘