رنویر سنگھ بالی وڈ کے نئے ڈان

امیتابھ بچن اور شاہ رخ خان کے بعد بالی وڈ کو رنویر سنگھ میں نیا ڈان مل گیا۔ جس کی تصدیق خود فلم کے ہدایت کار اور مصنف فرحان اختر نے کی۔  

فرحان اختر نے اپنے ٹوئٹر پر ’ڈان تھری‘ کا ٹیزر ریلیز کرتے ہوئے کیپشن دیا کہ نئے دور کا آغاز ہو رہا ہے۔ جس میں رنویر سنگھ کو مداحوں نے پہلی بار ڈان کے روپ میں دیکھا۔ 

ایک دن پہلے  ہی فرحان اختر نے ایک طویل نوٹ ٹوئٹر پر شئیر کرتے ہوئے ڈان میں کسی نئے چہرے کو متعارف کرانے کا اعلان کیا تھا۔ اس نوٹ میں انہوں لکھا تھا کہ ’1978 میں، سلیم جاوید کے تخلیق کردہ کردار جسے امیتابھ بچن نے بڑی آسانی کے ساتھ نبھا کر ملک بھر میں تھیٹر جانے والوں کے تخیل کو اپنی گرفت میں لے لیا۔ وہ پُراسرار کردار ڈان تھا۔ 2006 میں  ڈان کودوبارہ تصویر کیا گیا اور شاہ رخ خان نے اپنے دلکش انداز میں اسے دوبارہ زندہ کیا۔ 

’ڈان کی بھرپور ذہانت ہو، یا شدید غصہ، شاہ رخ نے اپنی شخصیت کو پیش کیا ہے۔ مصنف اور ہدایت کار کے طور پر، میں نے شاہ رخ کے ساتھ ایک نہیں بلکہ دو، 'ڈان' فلمیں تخلیق کیں اور دونوں تجربات میرے دل کے بہت قریب ہیں۔‘  

فرحان اختر نے اپنے نوٹ کے آخری حصے میں ڈان کے کردار میں نئے اداکار کو کاسٹ کرنے کا اعلان کرتے ہوئے لکھا کہ ’اب وقت آ گیا ہے کہ ڈان کی وراثت کو آگے بڑھایا جائے اور اس نئی تشریح میں ہمارے ساتھ شامل ہونے والا نیا اداکار ہو گا جس کی قابلیت کی میں نے طویل عرصے سے تعریف کی ہے۔ ہم امید کرتے ہیں کہ آپ اسے وہ محبت دکھائیں گے جو آپ نے مسٹر بچن اور شاہ رخ خان کو دکھائی۔‘ 

آخر میں فرحان اختر نے ڈان کے نئے دور کا آغاز 2025 میں ہو گا۔ 

اور اب رنویر سنگھ کو نئے ڈان کے کردار میں دیکھ کر سوشل میڈیا صارفین جہاں اسے سراہ رہے ہیں وہیں کئی لوگ ڈان کے کردار میں شاہ رخ خان کے علاوہ کسی اور کو دیکھنا نہیں چاہتے ، اسی لیے ’ نو ایس آر کے نو ڈان ‘ کا ہیش ٹیگ بھی ٹرینڈ کرنے لگا۔ دھاول کمار نے لکھا کہ ’کسی اور کو ڈان کے کردار میں دیکھنے میں کوئی دلچسپی نہیں، اس میں صرف شاہ رخ خان ہونے چاہیے، براہ مہربانی مداحوں سے مت کھیلیں۔‘ 

ایک اور صارف نے حیرانگی کا اظہار کرتے ہوئے کہا کہ ’شاہ رخ کے بغیر ڈان نے مجھے حیران نہیں کیا، جس چیز نے مجھے حیران کیا وہ یہ ہے کہ جب منفی کردار کی بات آتی ہے تو فلمساز شاہ رخ خان پر کسی اور کو کاسٹ کرنے کے بارے میں کیسے سوچ سکتا ہے۔‘ 

جبکہ ابھے نامی صارف نے رنویر کو ہم سب جانتے ہیں کہ شاہ رخ خان ستاروں میں سے آخری ہیں، لیکن رنویر سنگھ میں وہ صلاحیت ہے جو آپ کو حیران کر سکتی ہے۔‘ 

سورج نے ڈان 3 کے آنے پر اپنی خوشی کا اظہار کرتے ہوئے لکھا کہ ’اپنی سیٹ بیلٹ باندھ لو ڈان آرہا ہے۔ وہ نہ صرف آپ کو لوٹ سکتا ہے بلکہ آپ کا دل بھی چرا سکتا ہے۔‘ 

ڈان فرنچائز پر اب تک تین فلمیں بن چکی ہیں، جن میں سب سے پہلی فلم 1978 میں بنی، جس میں امیتبابھ بچن نے مرکزی کردار ادا کیا تھا، جس کے بعد اسے فلم کو فرحان اختر نے شاہ رخ خان کے ساتھ شہرت کی نئی بلندیوں پر پہنچایا اور 2006 اور 2011 میں دو فلمیں ریلیز کیں۔ 

اور 2025 میں فرحان اختر ہی ڈان کو ایک  نئے مشن کے ساتھ آگے لے کر بڑھیں گے لیکن اس بار ان کے ساتھ بالی ووڈ کے بادشاہ نہیں بلکہ رنویر سنگھ ہوں گے۔