اس شخص کا نام سے زیادہ چہرہ اور منفرد انداز مشہور ہے جبکہ چہرے سے زیادہ شاید نام جانا پہچانا جاتا ہے۔ یہ پاکستانی شوبز اور سٹائل کی دنیا کے بے تاج بادشاہ طارق امین ہیں۔

لکس سٹائل ایوارڈ میں 2017 میں لائف ٹائم اچیومنٹ ایوارڈ حاصل کرنے والے اور پاکستان کے ٹاپ سٹائلسٹ طارق امین چار دہائیوں سے اس صعنت سے وابستہ ہیں۔ پاکستان کے اندر اور باہر کون سی اہم شخصیات ہیں، جنہوں نے ان کے ٹیلنٹ سے فیض نہ پایا ہو۔ کیا اداکار، کیا سیاست دان اور کیا گلوکار۔ 

60 سالہ طارق امین کے ’مداحوں‘ میں بے نظیر بھٹو اور ریما جیسی شخصیات شامل رہ چکی ہیں۔ سابق مرحوم وزیراعظم کی شادی پر میک اپ کرنے کا اعزاز بھی طارق امین کو حاصل ہے، جس کے حوالے سے ان کا کہنا ہے کہ انہیں اصل شناخت ہی اس سے ملی۔

اسلام آباد کے ایک ریستوران میں ان سے پہلی مرتبہ ملاقات اور گفتگو کا موقع ملا، جس کے بعد میں نفاست اور خیالات کی شفافیت کا احساس لے کر واپس لوٹا۔ سفید کوٹ اور فلسطینی سرخ و سیاہ كوفیہ ان کی سفید داڑھی کے ساتھ جچ رہا تھا۔

وہ کہتے ہیں کہ 60 سال کا ہونے کے باوجود وہ اب بھی جوان ہیں۔ ’مجھے بتایا جاتا ہے کہ 60 اب نیا 20 سالہ ہے۔‘

Screenshot 2023-12-28 114104.png

لیکن ان کی اگلی بات زیادہ تشویش ناک تھی۔ ان کا اصرار تھا کہ یہ حقیقی دنیا نہیں ہے۔ ’مغرب میں جہاں فیشن بنتا ہے لندن، پیرس، نیو یارک وہ حقیقی دنیا ہے۔ یہاں آپ کو اس کا چھن کر آنے والا (فلٹرڈ) ورژن ملتا ہے۔‘

طارق امین کا کہنا تھا کہ فیشن اب اشرافیہ تک محدود نہیں رہا۔ ’یہ اب سب کی پہنچ میں ہے۔ پاکستان میں فیشن کی صعنت ترقی پا رہی ہے۔ بہت سی تبدیلیاں آئی ہیں لیکن یہ اب بھی سٹریٹ فیشن، یعنی جو آپ نے اور میں نے پہنا ہے، جو نارمل لوگ پہنتے ہیں، پر مبنی نہیں ہے۔‘

پاکستان میں فیشن کی صنعت میں جو شعبہ سب سے زیادہ پلا بڑھا ہے وہ ہے برائیڈل فیشن۔ بقول طارق امین: ’یہ فیشن صرف مقامی مارکیٹ کے لیے تیار کیا گیا ہے۔ معاشی بحران ہو یا نہ ہو شادیاں نہیں رکتیں۔ لہنگے بکتے رہتے ہیں۔ کچھ بھی ہو فیشن تفریح بن گئی ہے۔ بہت سی تبدیلیاں آئی ہیں لیکن سب مثبت نہیں ہیں۔‘

سوشل میڈیا نے ان کا کام مشکل یا آسان بنایا؟ اس سوال کے جواب میں طارق امین کا کہنا تھا کہ اب ہر کوئی سٹار ہے۔ ’کوالٹی معمولی یا اوسط درجے کی (Mediocre) ہوگئی ہے۔ کوئی بھی آگے پیچھے اچھل کود کر اہمیت اختیار کرلیتا ہے۔‘

فلٹرز کے بعد اب آرٹیفیشل انٹیلی جنس نے مزید کیا گُر کھلائے ہیں؟ اس حوالے سے ان کا کہنا تھا کہ اب تو آپ جا کر ناک خرید سکتے ہیں، چیک بونز (گال کی ہڈیاں) خرید سکتے ہیں، آپ اپنے سِکس پیکس خرید سکتے ہیں، آپ اپنے بال خرید سکتے ہیں۔ اب یہ فرد پر منحصر ہے کہ وہ کیا چاہتا ہے۔ سب کچھ دستیاب ہے۔‘  

طارق کا کہنا تھا کہ سوشل میڈیا بس آپ کو قابل ذکر بناتا ہے۔ خبریں پڑھنے سے لے کر ہر چیز بدل گئی ہے۔ ’فیشن اور سیلون کا کاروبار تبدیل ہوا ہے۔‘

چار دہائیوں سے فیشن کی دنیا میں چھائے طارق امین (طارق امین انسٹاگرام اکاؤنٹ)

ان کا کہنا تھا کہ ’میرے اعتبار سے آج کل خواتین میک اپ کر کے زیادہ بھیانک لگ رہی ہیں۔ جو ٹیوٹوریل آپ کو سکھا رہے ہیں وہ آپ کے لیے نہیں ہوتے۔ وہ سٹیج، ڈریگ کوئین کے لیے ہوتے ہیں۔ اگر لوگ یہ چاہتے ہیں تو میں کیا کرسکتا ہوں۔ ہم اپنے اندر اور ایک دوسرے کے اندر پرفیکشن تلاش کر رہے ہیں جو پائیدار نہیں ہے۔ میڈیا آپ کو بتا رہا ہے کہ چلنا کیسے ہے اور کیا پہننا ہے۔‘

طارق امین ان خوش قسمت افراد میں شامل ہیں جو پاکستان میں رہنے پر خوش اور مطمئن ہیں۔ ان کا کہنا تھا کہ ملک چھوڑنے کا خیال کبھی ان کے ذہن میں نہیں آیا۔ ’مجھے اپنا سبز پاسپورٹ پسند ہے اور میں فرسٹ کلاس شہری ہی رہنا چاہتا ہوں۔‘

وہ فی الحال لاہور، کراچی اور اسلام آباد میں (جہاں وہ رہتے ہیں) اپنے سیلون چلا رہے ہیں۔ ہر مہینے ان کے کراچی اور لاہور کے چکر لگتے ہیں لیکن وہ اپنے فارغ وقت سے سب سے زیادہ اپنے خاندان، اپنی 12 بلیوں اور دو کتوں کے ساتھ لطف اندوز ہوتے ہیں۔

اپنے 40 سال کے تجربے کو نوجوانوں میں منتقل کرنے کے لیے اکیڈمی کھولنے سے متعلق سوال پر ان کا جواب تھا کہ آج کی نسل ایک ہفتے میں استاد بننا چاہتی ہے۔ ’اکیڈمی شروع کی لیکن کوئی آیا ہی نہیں۔ لوگ یہ کام ایک ہفتے میں سیکھنا چاہتے ہیں۔‘

کہتے ہیں کہ طارق پاکستانی فیشن میں ’بہت سے کلونز میں سے ایک‘ نہیں بلکہ ’اصلی‘ ہیں۔ ان کا کہنا ہے کہ وہ اپنی ذاتی زندگی کے بارے میں کتاب لکھنا چاہتے ہیں، جس کا انہیں اب تک وقت نہیں ملا۔ 

مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔