اسرائیل نے جمعے کو لبنان کے دارالحکومت بیروت کے جنوب میں فضائی حملے کیے ہیں، جن کے بارے میں اس کا کہنا ہے کہ حزب اللہ کے صدر دفتر کو نشانہ بنایا گیا۔
لبنانی المنار ٹی وی کا کہنا ہے کہ حملوں میں کم از کم ایک شخص جان سے گیا جب کہ 50 افراد زخمی ہوئے۔
خبر رساں ایجنسی اے ایف پی نے رپورٹ کیا کہ حزب اللہ کے قریبی ذرائع نے کہا ہے کہ حملے میں حزب اللہ کے سربراہ حسن نصراللہ ’ٹھیک‘ ہیں۔
ذرائع نے نام ظاہر نہ کرنے کی شرط پر بتایا کہ سید نصراللہ ٹھیک ہیں۔ ذرائع میڈیا سے بات کرنے کے مجاز نہیں۔
حزب اللہ کے ایک ذرائع نے روئٹرز کو بتایا کہ حملے میں حزب اللہ کے سینئئر عہدے دار ہاشم صفی الدین زندہ ہیں۔
معروف اسرائیلی ٹیلی ویژن نیٹ ورکس کے مطابق حسن نصراللہ اس حملے کا ہدف تھے۔
حملوں سے چند لمحے قبل اسرائیلی وزیر اعظم بن یامین نتن یاہو نے عسکریت پسند گروپ کے خلاف لڑائی جاری رکھنے کے عزم کا اظہار کیا۔
اسرائیلی وزیر اعظم کے دفتر سے جاری بیان کے مطابق وزیراعظم نیتن یاہو نے اپنا امریکہ کا دورہ مختصر کرتے ہوئے آج ہی واپسی کا فیصلہ کیا ہے۔
اسرائیلی حملوں کی آوازیں پورے شہر میں سنی گئیں۔ حملوں کے نتیجے میں حزب اللہ کے اہم گڑھ بیروت کے گنجان آباد جنوبی حصے میں دھوئیں کے بادل چھائے رہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
لبنانی میڈیا کا کہنا ہے کہ حملوں میں چار عمارتیں تباہ ہو گئیں۔ امریکی میڈیا کا دعویٰ ہے کہ اسرائیل نے حزب اللہ کے سربراہ حسن نصر اللہ کو نشانہ بنایا۔
تاہم حزب اللہ نے تاحال اس حوالے سے کچھ نہیں کہا۔
اسرائیلی فوج کے ترجمان ڈینیئل ہاگری نے کہا کہ حملے میں شہر کے جنوبی مضافات میں حزب اللہ کے ’مرکزی ہیڈ کوارٹر کو نشانہ بنایا گیا۔‘
اسرائیلی بمباری ایسے وقت پر ہوئی جب نتن یاہو نے نیویارک میں اقوام متحدہ کی جنرل اسمبلی سے خطاب مکمل کیا تھا، جس میں انہوں نے حزب اللہ کے خلاف حملے جاری رکھنے اور حماس کے خلاف ’فتح تک‘ لڑنے کے عزم کا اظہار کیا۔
اقوام متحدہ نے بیروت کے ’گنجان آباد‘ علاقے پر اسرائیلی حملوں پر گہری تشویش کا اظہار کیا۔
اقوام متحدہ کے ترجمان ستیفین دوجارک نے ایک بریفنگ میں کہا کہ ’اقوام متحدہ بیروت پر حملوں کو انتہائی تشویش کے ساتھ دیکھ رہی ہے۔‘
’جو کوئی بھی گنجان آباد علاقے سے اٹھتے ہوئے دھوئیں کی تصاویر دیکھے گا اسے پریشانی ہو گی۔ ہم اس وقت مزید معلومات حاصل کرنے کی کوشش کر رہے ہیں۔‘
خبر رساں ایجنسی روئٹرز کے مطابق پینٹاگون کے ایک ترجمان نے کہا ہے کہ امریکہ کو بیروت میں اسرائیلی حملے کے بارے میں پیشگی انتباہ نہیں تھا۔
