انڈین پولیس کے مطابق جنوبی انڈیا کے معروف فلمی اداکار الو ارجن کو جمعے کو گرفتار کر لیا گیا۔ ایک ہفتہ قبل ان کی فلم کے پریمیئر کی تقریب میں ان کی اچانک آمد کے بعد بڑی تعداد میں جمع ہونے والے مداحوں کی وجہ سے ایک خاتون دم گھٹ کر جان سے گئیں جب کہ ان کا بیٹا شدید زخمی ہوا۔

الو ارجن تلیگو فلم انڈسٹری کے بڑے سٹار ہیں۔ اس فلمی صنعت کا مرکز جنوبی ریاستوں آندھرا پردیش اور تلنگانہ میں ہے جہاں فلمی ستاروں کو ان کے پرجوش مداح  دیوتا کا درجہ دیتے ہیں۔

الو ارجن نے چار  دسمبر کو حیدرآباد میں  فلم کے پریمیئر میں شرکت کی۔

جب مداح ان سے ملنے کے لیے بے تاب تھے تو ایک 39 سالہ خاتون دم گھٹنے کے باعث جان سے چلی گئیں اور ان کا نو سالہ بیٹا شدید زخمی ہو گیا۔

رواں ہفتے پولیس نے اس تھیٹر کے مالک کو گرفتار کر لیا جہاں یہ واقعہ پیش آیا اور جمعے کو ارجن کو ان کی رہائش گاہ سے گرفتار کیا گیا۔

وکیل نے بتایا کہ ارجن کو چند گھنٹے بعد ایک مقامی عدالت نے ضمانت دے دی۔ توقع ہے کہ انہیں جلد ہی جیل سے رہا کر دیا جائے گا۔

روئٹرز کو موصول دستاویز کے مطابق 41 سالہ ارجن کا نام پولیس کو دی گئی ابتدائی درخواست میں شامل تھا۔ درخواست میں الزام لگایا گیا کہ اداکار کے ذاتی سکیورٹی گارڈز نے ان کے قریب پہنچنے والے ہجوم کو ہٹانے کی کوشش کی جس کے نتیجے میں خاتون کا دم گھٹ گیا اور ان کی موت ہو گئی۔

ارجن کے وکیل نے اداکار کے کسی بھی قسم کی غلطی کے مرتکب ہونے سے انکار کیا۔ اداکار نے عوامی سطح پر اس واقعے پر معذرت کی۔

جنوبی انڈیا میں اداکار، جہاں فلم انڈسٹری بالی وڈ سے آزاد اور مستحکم ہے، نہایت مقبول شخصیات سمجھے جاتے ہیں۔ ان کے مداح اکثر اپنے سٹارز کے لیے مندر تعمیر کرتے ہیں اور فلم کے پریمیئر کے دوران ان کے پوسٹرز کو دودھ سے نہلاتے ہیں۔