وزیراعظم شہباز شریف نے اتوار کو کہا کہ کالعدم تحریک طالبان پاکستان (ٹی ٹی پی)، داعش خراسان اور دیگر ’دہشت گرد تنظیمیں‘ افغانستان سے آپریٹ کر رہی ہیں اور پاکستان میں بے گناہ لوگوں کو ’شہید‘ کر رہی ہیں۔

پاکستان کے سرکاری خبر رساں ادارے اے پی پی کے مطابق لندن میں صحافیوں سے گفتگو کرتے ہوئے وزیر اعظم شہباز شریف نے کہا کہ ’افغان عبوری حکومت کو ہم نے متعدد بار یہ پیغام دیا کہ دوحہ معاہدے کے مطابق وہ کسی طور پر بھی افغانستان کی سر زمین کو دہشت گردی کے لیے استعمال ہونے کی اجازت نہیں دیں گے، لیکن بد قسمتی سے ٹی ٹی پی، آئی ایس کے پی اور دیگر دہشت گرد تنظیمیں وہاں سے آپریٹ کرتی ہیں اور پاکستان کے بے گناہ لوگوں کو انہوں نے شہید کیا ہے۔‘

وزیرِاعظم نے کہا کہ ’میں سمجھتا ہوں یہ قربانیاں جو پاکستان کے عوام، افواج پاکستان، پولیس اور دیگر قانون نافذ کرنے والے ادارے دے رہے ہیں، یہ رائیگاں نہیں جائیں گی۔‘

انہوں نے افغان حکومت سے مطالبہ کیا کہ وہ فی الفور ان تنظیموں کو لگام ڈالے اور اپنی سرزمین کو ان کے ہاتھوں استعمال ہونے کی قطعاً اجازت نہ دے۔

’میں نے ہمیشہ کہا کہ افغانستان ہمارا ایک ہمسایہ برادر ملک ہے، ہمیں ہمسائے کے طور پر ہمیشہ رہنا ہے، یہ ہم پر منحصر ہے کہ ہم اچھے ہمسائے کے طور پر رہیں یا تنازعات پیدا کریں۔‘

بیلاروس کے دورے سے متعلق ایک سوال کے جواب میں انہوں نے کہا کہ بیلاروس کی زراعت کے شعبے میں مہارت سے فائدہ اٹھائیں گے، ’اللہ تعالی نے پاکستان کو معدنیات کے خزانے عطا کیے ہیں، ترقی کرتا ہوا، خوشحالی کی طرف تیزی سے گامزن پاکستان انشا اللہ ہماری منزل ہے۔‘

وزیراعظم نے کہا کہ دورہ بیلاروس اچھا رہا، بیلاروس کی زراعت کے شعبے میں مہارت سے فائدہ اٹھائیں گے، بیلاروس میں بننے والی زرعی مشینری کے جوائنٹ وینچرز پاکستان میں بنیں گے۔

انہوں نے کہا کہ آج سے اوور سیز کنونشن کا آغاز ہو چکا ہے، تاریخی کنونشن ہو رہا ہے، اوورسیز پاکستانی اپنے گھر پاکستان میں تشریف لا رہے ہیں، دن رات محنت کر کے اورسیز پاکستانی، پاکستان کا نام روشن کرتے ہیں اور ہر سال اربوں ڈالر کی ترسیلات زر بھجواتے ہیں، رواں سال اوورسیز پاکستانیوں کی بھجوائی گئی ترسیلات زر میں نمایاں اضافہ ہوا ہے۔

وزیرِاعظم نے کہا کہ کنونشن بیرون ملک مقیم پاکستانیوں سے بات چیت کرنے کا بہت شاندار موقع ہے، کنونشن میں اووسیز پاکستانیوں کے جائز مطالبات کو غور سے سنیں گے اور ان پر جس قدر ہو سکا تیزی سے عمل کریں گے۔