نیمار نے جمعرات کو اعلان کیا کہ وہ برازیل کے کلب سانتوس میں واپس آ رہے ہیں، وہ سعودی عرب میں ایک میچ کے دوران انجری کا شکار ہو گئے تھے اور صحت یابی کے بعد اب وہ ایک بار پھر میدان میں اترنے جا رہے ہیں۔
نیمار نے ساؤ پاؤلو کی ٹیم کے ساتھ اپنے ماضی کی تصاویر کے ساتھ سوشل میڈیا پر ایک پوسٹ میں لکھا کہ ’میں سانتوس فٹ بال کلب کے ساتھ معاہدے پر دستخط کروں گا،‘ جہاں فٹ بال آئیکون پیلے نے اپنے کیریئر کا زیادہ تر حصہ گزارا تھا۔
کلب اور شائقین کے لیے میرے جذبات کبھی تبدیل نہیں ہوئے۔
سانتوس کے ایکس اکاؤنٹ نے نیمار کی پوسٹ کا جواب دیتے ہوئے کہا: ’آپ کا گھر آپ کا انتظار کر رہا ہے۔ آپ کے لوگ آپ کا انتظار کر رہے ہیں۔‘
نیمار کو جمعہ کو کلب کے سٹیڈیو اربانو کالدیرا میں مداحوں کے سامنے پیش کیا جائے گا، جہاں مقامی موسیقی کے ستاروں کے کنسرٹس بھی ہوں گے۔
نیمار نے، جو برازیل کے سب سے زیادہ گول کرنے والے کھلاڑی ہیں، اگست 2023 میں الہلال میں شمولیت اختیار کی تھی۔ تاہم، دو ماہ بعد ایک میچ کے دوران ان کے بائیں گھٹنے میں چوٹ لگ گئی، جس کی وجہ سے وہ ایک سال تک کھیل سے باہر رہے۔
نیمار نے کہا کہ وہ دوبارہ کھیلنے کے لیے تیار ہیں اور سانتوس جیسا کلب ہی انہیں وہ محبت دے سکتا ہے جس کی انہیں ضرورت ہے۔
32 سالہ سابق بارسلونا اور پیرس سینٹ جرمین فارورڈ نے الہلال کے لیے صرف سات میچ کھیلے، حالانکہ ان کی سالانہ تنخواہ تقریباً 104 ملین ڈالر بتائی جاتی ہے۔
برازیل کے سب سے زیادہ گول کرنے والے کھلاڑی نیمار نے اگست 2023 میں الہلال میں شمولیت اختیار کی، جس کے بعد ان کے ساتھ سپر سٹارز کرسٹیانو رونالڈو اور کریم بنزیما بھی خلیج میں شامل ہوئے۔
لیکن ریاض پہنچنے کے دو ماہ بعد، 2026 ورلڈ کپ کوالیفائر کے دوران برازیل کے لیے کھیلتے ہوئے، ان کے بائیں گھٹنے میں ایک لیگامینٹ زخمی ہو گیا، جس کی وجہ سے وہ ایک سال تک کھیل سے باہر رہے۔
پھر جب نیمار نے دوبارہ کھیلنے کی کوشش کی تو انہیں ہیمسٹرنگ اور گھٹنے کی چوٹوں کا سامنا کرنا پڑا۔
کلب کے کوچ جارج جیسس نے حال ہی میں کہا: ’وہ اب اس سطح پر نہیں کھیل سکتے جس کے ہم عادی ہیں۔ بدقسمتی سے، ان کے لیے چیزیں مشکل ہو گئی ہیں۔‘
برازیل واپسی نیمار کے لڑکھڑاتے کیریئر کا آخری موقع ہو سکتی ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
نیمار نے اپنے ملک کے لیے 128 میچوں میں 79 گول کیے ہیں۔
نیمار کو امریکہ میں ایم ایل ایس ٹیموں نے اپنی طرف راغب کیا تھا، لیکن انہوں نے میکسیکو، امریکہ اور کینیڈا میں ہونے والے 2026 ورلڈ کپ کے لیے برازیل کی ٹیم میں منتخب ہونے کی غرض سے گھر واپس آنے کا فیصلہ کیا ہے۔
نیمار نے کہا: ’اب مجھے دوبارہ کھیلنے کی ضرورت ہے۔ اور صرف سانتوس جیسا کلب ہی مجھے وہ محبت فراہم کر سکتا ہے جس کی مجھے آنے والے سالوں کے چیلنجز کے لیے تیاری کرنے کی ضرورت ہے۔‘
سانتوس میں انہیں ایک بڑا چیلنج درپیش ہے، جو 2024 میں ایک سال کے بعد دوبارہ ایلیٹ ڈویژن میں واپس آیا ہے۔
نیمار کو برازیل بھر میں طویل پروازوں کے ساتھ ایک مصروف شیڈول کا سامنا کرنا پڑے گا، جس میں ساؤ پالو سٹیٹ ٹورنامنٹ، برازیلین کپ اور قومی چیمپئن شپ شامل ہیں جو مارچ کے آخر میں شروع ہو رہی ہیں۔
اتنے بڑے نام کی موجودگی سانتوس کے مداحوں کی زبردست دلچسپی کو اپنی طرف متوجہ کرے گی، لیکن نیمار کے بہترین دن تقریباً یقینی طور پر پیچھے رہ گئے ہیں۔
پیلے کا وارث
اپنے کیریئر کے آغاز میں انہیں پیلے کا وارث سمجھا جاتا تھا۔
سانتوس کے لیے 225 میچوں میں 136 گول کرنے کے بعد، نیمار 2013 میں بارسلونا میں شامل ہوئے، جہاں وہ لیونل میسی اور لوئس سواریز کے ساتھ ایک نوجوان ستارے کے طور پر ابھرے۔
اس ٹیم نے 2015 میں برلن میں ہونے والے فائنل میں یووینٹس کو 3-1 سے شکست دے کر چیمپئنز لیگ کا ٹائٹل جیتا۔
2014 میں برازیل میں ہونے والے ورلڈ کپ میں ان کی شرکت کوارٹر فائنل میں چوٹ کی وجہ سے مختصر ہو گئی اور برازیل سیمی فائنل میں جرمنی کے ہاتھوں 7-1 کی شرمناک شکست کے بعد باہر ہو گیا۔
نیمار نے 2016 میں کچھ واپسی کی جب انہوں نے شوٹ آؤٹ میں فیصلہ کن پنالٹی سکور کی اور برازیل نے ریو اولمپکس میں مردوں کے فٹ بال کا گولڈ میڈل جیتا۔
2017 میں، قطر کی ملکیت والے پیرس سینٹ جرمین نے نیمار کو 220 ملین یورو ($230 ملین) کی عالمی ریکارڈ ٹرانسفر فیس کے ساتھ بارسلونا سے حاصل کیا۔
انہوں نے پانچ لیگ 1 ٹائٹل جیتے اور فرانسیسی فارورڈ کیلیان ایمباپے کے ساتھ مل کر 2019-2020 کے کووڈ سے متاثرہ سیزن میں پی ایس جی کو چیمپئنز لیگ کے فائنل تک پہنچایا، لیکن وہ بایرن میونخ سے ہار گئے۔
پی ایس جی نے نیمار کو فرانسیسی دارالحکومت میں میسی کے ساتھ دوبارہ ملا دیا، لیکن ایمباپے کے ساتھ ان کی تگڑی ذاتی رقابتوں کی وجہ سے کامیاب نہ ہو سکی اور 2023 میں پیرس کی انتظامیہ نے انہیں باہر نکال کر سعودی عرب بھیج دیا۔
