امریکی صدر ڈونلڈ ٹرمپ نے بدھ کو غزہ کے لوگوں کو دھمکی دیتے ہوئے کہا کہ اگر بقیہ تمام اسرائیلی قیدیوں کو فوراً رہا نہ کیا گیا تو آپ (غزہ کے لوگ) خود کو ختم سمجھیں۔

فرانسیسی خبر رساں ایجنسی اے ایف پی کے مطابق ٹرمپ نے اسرائیل کی بھرپور حمایت کا اعلان کرتے ہوئے کہا: ’میں اسرائیل کو وہ سب کچھ بھیج رہا ہوں جو اسے یہ مشن کو مکمل کرنے کے لیے چاہیے۔‘ ان کی انتظامیہ اسرائیل کو اربوں ڈالر کے ہتھیاروں کی فوری ترسیل کو یقینی بنا رہی ہے۔

رہا کیے گئے قیدیوں سے ملاقات کے بعد انہوں نے اپنے پلیٹ فارم ’ٹروتھ سوشل‘ پر لکھا: ’تمام قیدیوں کو ابھی، فوراً رہا کرو اور ان تمام مقتولین کی لاشیں واپس کرو جنہیں تم نے قتل کیا، ورنہ تمہارے لیے سب کچھ ختم ہو جائے گا۔

’یہ تمہارے لیے آخری وارننگ ہے! قیادت کے لیے یہی وقت ہے کہ وہ غزہ چھوڑ دیں، جب تک کہ ان کے پاس موقع ہے۔‘

ٹرمپ نے یہ بھی کہا کہ غزہ کو مجموعی طور پر سنگین نتائج کا سامنا کرنا پڑے گا، جہاں اسرائیلی فوجی کارروائی کی وجہ سے تقریباً پوری آبادی بے گھر ہو چکی ہے۔

ٹرمپ نے کہا: ’غزہ کے لوگوں کے لیے: ایک خوبصورت مستقبل تمہارا منتظر ہے، لیکن اگر تم قیدیوں کو رکھو گے تو نہیں۔ اگر ایسا کیا، تو تمہاری موت یقینی ہے!‘

ان کے یہ بیانات اسرائیلی وزیر اعظم بن یامین نتن یاہو کے اس انتباہ کے بعد سامنے آئے، جس میں انہوں نے حماس کو دھمکی دی تھی کہ ’اگر قیدیوں کو رہا نہ کیا گیا تو ایسے نتائج بھگتنا پڑیں گے جن کا تم تصور بھی نہیں کر سکتے۔‘