خیبر پختونخوا کے ضلع کرک میں ہندوؤں کے مذہبی رہنما گرو پرماہنس کی سمادھی پر اُن کے پیروکاروں نے مسلمان مزدوروں میں بدھ کے روز دس لاکھ روپے مالیت کے فوڈ پیکج تقسیم کیے، اور اس کے ساتھ ساتھ عید کے لیے انہیں کپڑے بھی دیے۔

گرو پرماہنس تقسیم ہند سے قبل ضلع کرک کے قصبے ٹیری میں رہائش پذیر تھے۔ ان کے آشرم پر بڑی تعداد میں ہندوؤں کے ساتھ مسلمان بھی آتے تھے اور گرو انہیں تعویذ لکھ کر دیتے تھے۔

وہ 1919 میں فوت ہوئے، ان کے لیے سنگِ مرمر کا عالیشان مزار تعمیر کیا گیا تاہم اسے 1997 میں شدت پسندوں نے بم دھماکے سے اڑا دیا۔

اب اس مزار کو ایک ہندو تنظیم نے بحال کیا ہے اور یہیں سے مسلمانوں میں راشن تقسیم کیا جا رہا ہے۔