چار سال قبل جنوبی ایشیا کے دو ایٹمی ملک پاکستان اور انڈیا جنگ کے دہانے پر تھے۔ 26 فروری 2019 کو انڈین فضائیہ نے بالاکوٹ پر سٹرائیک کیا اور اس کے ایک دن بعد پاکستانی فضائیہ نے انڈیا کا ایک جنگی جہاز مار گرایا۔

اس وقت تو دونوں ایٹمی قوتیں جنگ کے دہانے سے واپس آئی تھیں مگر اب اس واقعے کو چار سال بیت چکے ہیں اور ان برسوں میں پاکستان انڈیا تعلقات بہت سے اتار چڑھاؤ کا شکار رہے ہیں۔

سابق سفیر آصف درانی نے انڈپینڈنٹ اردو سے گفتگو میں کہا کہ ’جب سے نریندر مودی نے حکومت سنبھالی ہے دونوں ممالک کے تعلقات کبھی اچھے نہیں ہو سکے، پلوامہ حملے کو نریندر مودی نے الیکشن مہم کے لیے استعمال کیا۔ دوبارہ حکومت میں آنے کے بعد کشمیر کی حیثیت بدل دی اور یہ ان کے پلان کا حصہ تھا۔‘

آصف درانی نے کہا کہ ’چار برسوں میں ایک مثبت بات ہوئی ہے اور وہ فروری 2021 میں لائن آف کنٹرول پر جنگ بندی ہے۔ اس کا فائدہ کشمیریوں کو ہوا ہے کیونکہ انڈین جارحیت کی وجہ سے لائن آف کنٹرول پر جانی نقصان ہوتا تھا۔‘

انہوں نے کہا کہ ’پاکستان جوابی کارروائی میں محتاط ہوتا تھا کیونکہ سرحد کے اس پار بھی کشمیری آبادی ہیں، جن کا ہم نقصان نہیں چاہتے۔‘

14 نومبر 2020 کی اس تصویر میں پاکستان کے زیر انتظام کشمیر کی وادی نیلم میں لائن آف کنٹرول کے قریب انڈین شیلنگ سے متاثر گھر کے باہر اس کے مکین موجود ہیں (اے ایف پی)

آصف درانی نے کہا: ’فی الحال تو نظر نہیں آ رہا کہ دونوں ممالک کے درمیان برف پگھلے کیونکہ کشمیر کے بغیر پاکستان بات نہیں کر سکتا۔‘

سفارتی امور پر رپورٹنگ کرنے والے صحافی شوکت پراچہ کہتے ہیں کہ ’پاکستان اور انڈیا کے تعلقات کی بنیاد تو ابھی پانچ اگست 2019 کے معاملات ہی ہیں، پاکستان نے اپنی طرف سے سرخ لکیر کھینچی ہوئی ہے کہ جب تک انڈیا کی جانب سے کشمیر کا پرانا سٹیٹس بحال نہیں کیا جاتا پاکستان آگے نہیں بڑھے گا۔‘

انہوں نے کہا کہ ’پلوامہ، ابھی نندن اور پانچ اگست کے واقعات کے تسلسل کے بعد سے دونوں ممالک کے تعلقات تنزلی کا شکار ہیں۔‘

شوکت پراچہ نے مزید کہا کہ ’ہائی کمیشن میں بھی معاملات  ڈپٹی ہائی کمشنر چلا رہے ہیں، چار سال سے ہائی کمشنر بھی تعینات نہیں ہوئے، دونوں جانب سے عملے کی تعداد بھی آدھی کی گئی۔ دونوں ممالک کے مابین تجارت بھی مکمل بند ہے اور نہ ہی کوئی زمینی رابطے ہیں۔ سارک کا فورم بھی گذشتہ کئی برسوں سے غیر فعال ہے۔

’لیکن شنگھائی تعاون تنظیم میں ہم توقع کر سکتے ہیں کہ دونوں ممالک کے درمیان کچھ برف پگھلے، تاہم کوئی بڑا بریک تھرو اس لیے نہیں ہو سکتا کیونکہ پاکستان میں رواں برس اور انڈیا میں آئندہ برس انتخابات ہیں تو کوئی حکومت ایسا بوجھ نہیں اٹھانا چاہے گی۔ البتہ اتنا ہو سکتا ہے کہ بڑے فورمز پر دونوں ممالک ایک دوسرے سے بات چیت بحال کر لیں۔‘

وزیراعظم شہباز شریف نے پیر کو واقعے کے چار سال مکمل ہونے پر ایک ٹویٹ میں کہا کہ ’پلواما حملے کو بہانہ بنا کر انڈیا کی جانب سے پاکستانی فضائی حدود کی خلاف ورزی پر منہ توڑ جواب دینے پر آج قوم پاکستان ایئرفورس کو خراج تحسین پیش کرتی ہے انہیں خراج تحسین پیش کرتی ہے۔ ہم سب کے ساتھ امن کے خواہاں ہیں مگر ساتھ ساتھ ملک کے دفاع کے لیے اپنے فرض سے بھی آگاہ ہیں۔‘

چار برس قبل پاکستان انڈیا کے مابین کیا ہوا؟

پاکستان انڈیا تعلقات میں کشیدگی فروری 2019 میں اس وقت بڑھی جب انڈیا نے 14 فروری کو پلوامہ حملے کا ذمہ دار پاکستان کو ٹھہرایا، جس کا پاکستان نے ہمیشہ انکار کیا ہے۔

اس واقعے کے بعد انڈیا نے پاکستان سے متصل سرحد پر فوج کی تعداد بڑھا دی اور پاکستان پر حملے کے بیانات سامنے آنے لگے۔ پلوامہ واقعے کے 12 دن بعد بالاکوٹ ایئر سٹرائیک اور اس سے اگلے دن سرکاری موقف کے مطابق جب انڈین جہاز پاکستان کی حدود میں داخل ہوئے تو پاکستان ائیر فورس کے لڑاکا طیاروں نے لائن آف کنٹرول میں کشمیر کے سماہنی سیکٹر میں انڈین مگ 21 طیارہ مار گرایا، جس کے بعد انڈین پائلٹ ونگ کمانڈر ابھی نندن کو حراست میں لیا گیا۔

سفارتی مداخلت کے باعث اگلے دن انڈین پائلٹ کو براستہ واہگہ انڈیا کے حوالے کر دیا گیا، جس کے بعد دونوں ممالک کی کشیدگی کو بین الاقوامی برادری کی مداخلت نے کچھ حد تک کم کیا۔ 

27 فروری کے واقعے کے حوالے سے سوشل میڈیا صارفین نے انڈین پائلٹ کی ویڈیو پوسٹ کی، جس میں انہوں نے اپنا جہاز تباہ ہونے اور اپنی حراست کا بتایا تھا۔

انڈیا میں انتخابات اور نریندر مودی کی حکومت آنے کے بعد  پانچ اگست 2019 کو وہ واقعہ بھی پیش آیا، جب انڈیا نے اپنے زیر انتظام جموں کشمیر کی آئینی حیثیت کو تبدیل کرکے اسے انڈیا میں ضم کر لیا جس پر کشمیریوں نے اور پاکستان نے عالمی برادری کے سامنے احتجاج کیا لیکن تاحال اس معاملے پر کچھ نہیں ہو سکا۔