اسلام آباد میں برطانوی ہائی کمیشن میں انڈین نژاد پون ڈانڈے کو ترجمان کے طور پر حال ہی میں تعینات کیا گیا ہے، جن کے آبا و اجداد فیصل آباد سے تعلق رکھتے تھے۔

پون ڈانڈے کہتے ہیں کہ ان کی تعیناتی برطانیہ اور پاکستان کے درمیان سفارتی تعلقات کے علاوہ ان کے خود کے لیے بھی اہم ہے۔ انہوں نے کہا کہ ’میں اپنے ورثے کو مزید دریافت کرنا چاہتا ہوں۔‘

پوون ڈانڈے کی پیش رو پاکستانی نژاد فوزیہ یونس تھیں، جن کا تعلق گوجر خان سے تھا۔

پون ڈانڈے نے انڈپینڈنٹ اردو سے غیر رسمی گفتگو میں بتایا کہ وہ پاکستان میں اپنی تعیناتی پر بہت پرجوش ہیں۔ ان کے والدین کا تعلق تو انڈین پنجاب جالندھر سے ہے لیکن ان کی نانی کا تعلق (لائلپور) فیصل آباد پاکستان سے ہے، جسے وہ دیکھنے کے خواہش مند ہیں۔

پون نے بتایا کہ ’میری نانی، جنہیں میں بی بی پکارتا تھا، کا گذشتہ برس انتقال ہوا۔ وہ پوری زندگی اپنی جائے پیدائش کی یاد میں آہیں بھرتی رہیں۔ ’میں بچپن سے ان سے پاکستان کی کہانیاں سنتا رہا ہوں۔ پاکستان آنا ان کی خواہش تھی جو اب میں پوری کر رہا ہوں۔‘

انہوں نے مزید کہا: ’میں دو تارکین وطن والدین کی اولاد ہوں اور بیرون ملک برطانیہ کی نمائندگی کر رہا ہوں۔ یہ میری خوش قسمتی ہے کیونکہ زیادہ عرصہ پہلے اس کا تصور بھی نہیں کیا جاسکتا تھا۔

’یہ جدید دور کے برطانیہ کا ثبوت ہے کہ رنگ نسل کے فرق کو مٹا دیا گیا ہے جو اصل جمہوریت ہے۔‘

انہوں نے بتایا کہ آئندہ ماہ نئی برطانوی ہائی کمشنر جین میریٹ بھی پاکستان پہنچ جائیں گی جس سے دو طرفہ تعلقات کو فروغ ملے گا۔

نئی ہائی کمشنر جین میریٹ اس سے قبل کینیا میں برطانوی سفیر کے طور فرائض سرانجام دیتی رہی ہیں۔

پون ڈانڈے چھ برسوں سے برطانوی دفتر خارجہ سے وابستہ ہیں اور اس سے قبل مڈل ایسٹ میں بھی خدمات سرانجام دے چکے ہیں۔