گوگل ڈوڈل میں ’پانی پوری‘ کی گیم

سرچ انجن گوگل نے آج اپنے ڈوڈل کو جنوبی ایشیا کے مشہور سٹریٹ فوڈ ’پانی پوری‘ کے نام کر دیا ہے اور اسی مناسبت سے صارفین کو ایک گیم کی سہولت بھی دی گئی ہے۔

پاکستان اور انڈیا میں مشہور پانی پوری کو گول گپا، پچکا اور گپ شپ بھی کہا جاتا ہے، جس میں گول فرائیڈ پوریوں کو املی کے پانی یا دیگر چٹنیوں اور لوازمات کے ساتھ پیش کیا جاتا ہے۔

گوگل پر موجود گیم میں، کھلاڑیوں کو پانی پوری کے آرڈرز کو پورا کرنے میں سٹریٹ وینڈر ٹیم کی مدد کرنے کا کام دیا گیا ہے جبکہ کھلاڑیوں کو ہر گاہک کے ذائقے اور مقدار کی ترجیحات سے ملنے والی پوریوں کا انتخاب بھی کرنا ہو گا۔ 

WhatsApp Image 2023-07-12 at 11.24.34 AM.jpeg

انڈین میڈیا کے مطابق 12 جولائی 2015 کو مدھیہ پردیش کے شہر اندور میں ایک ریسٹورنٹ نے پانی پوری کے 51 مختلف آپشنز پیش کر کے عالمی ریکارڈ بنایا تھا، جسے گوگل نے اپنے اس منفرد ڈوڈل سے یاد کیا ہے۔

گوگل ڈوڈل کے اس نئے گیم پر صارفین بھی دلچسپ تبصرے کر رہے ہیں۔

رچیتا پراساد نامی صارف نے لکھا: ’کون ہے جس کا صبح صبح پانی پوری کھانے کا دل کر رہا ہے؟‘ اس کے لیے انہوں نے گوگل کا شکریہ بھی ادا کیا۔

جبکہ انوپریا نے ڈوڈل گیم کو انجوائے کرتے ہوئے لکھا کہ ’سٹریٹ فوڈ پانی پوری کا جشن منانے والے گوگل گیم میں آپ کو کتنے آرڈرز ملے؟‘ ساتھ ہی انہوں نے اپنا سکور بھی بتایا جو 58 تھا۔

یکتی ارورا نے گوگل کے اس پانی پوری گیم کو سراہا اور کہا کہ ’گول گپے بیچنا میرے لیے کیریئر کا متبادل انتخاب ہو سکتا ہے۔‘