کرکٹ ورلڈ کپ 2023 کا آفیشل ترانہ جاری کر دیا گیا

انٹرنیشنل کرکٹ کونسل (آئی سی سی) نے کرکٹ کی دنیا کے سب بڑے ایونٹ ورلڈ کپ 2023 کا آفیشل ترانہ ’دل جشن بولے‘ ریلیز کر دیا، جس کے موسیقار انڈین گلوکار پریتم ہیں، جبکہ گانے میں ہر جگہ بالی وڈ اداکار رنویر سنگھ کا راج نظر آتا ہے۔ 

آئی سی سی نے ایکس (سابق ٹوئٹر) پر ترانہ ریلیز کرتے ہوئے پوسٹ کی کہ ’ون ڈے ایکسپریس کی سواری کریں اور کرکٹ کے عظیم جشن کا لطف پائیں۔‘ 

ورلڈ کپ کے اس آفیشل ترانے کی ویڈیو میں جہاں کرکٹ سے زیادہ انڈیا میں کرکٹ کا جشن نظر آیا وہیں دیگر ممالک کی جھلک بھی دکھائی دی۔ 

تاہم گانے میں ایک مقام پر پاکستان کی شرٹ پہنے بیٹنگ اور بولنگ کرتے نوجوان کو دکھایا گیا تو ان کی شرٹس کا رنگ پاکستان کی آفیشل ورلڈ کپ کی شرٹ کے رنگ سے کچھ الگ دکھائی دیا۔ تاہم دیگر ممالک کے شرٹس کا رنگ بھی روایتی رنگ سے مختلف دکھائی دے رہا ہے۔

مگر اس جشن سے بھرے گانے کے بعد سوشل میڈیا صارفین بھی میدان میں آ گئے اور کسی نے اس جشن کو انجوائے کیا تو کچھ نے اسے بالی وڈ گانا قرار دے کر ریجیکٹ کر دیا۔ 

شیوانی نے لکھا ’آئی سی سی کے پاس بہت اچھی تخلیقی صلاحیت ہے، لیکن اسے پوشیدہ ہی رکھیں۔‘ 

شاہد نامی صارف نے کہا کہ ’ آئی سی سی کرکٹ ورلڈ کپ  کا آفیشل گانا پتا کر بالی ووڈ گانا کر دو، پھر شاید چل جائے‘ 

عاقد نے لکھا کہ یہ گانا کتنا اچھا ہے اسے الفاظوں میں بیان نہیں کیا جا سکتا لیکن نبمر دیں تو 10 میں صفر ہو گا۔ 

گانے کی پوسٹ پر حریم شاہ نے بھی سوال پوچھا کہ ’ یہ ورلڈ کپ ہے یا انڈین کپ؟ ہر پروموشنل ویڈیو میں انڈین فنکار کیوں ہوتے ہیں؟ یہ فرق کیوں؟‘ 

جبکہ اقصیٰ کا کہنا تھا کہ اس سے اچھا تو چاہت فتح علی خان گا لیتا ہے۔ 

راہول ورما نے گانے کو اچھا یا برا ہونے پر تو تبصرہ نہیں کیا تاہم انہوں نے لکھا: ’آپ اسے آئی سی سی کا آفیشل ترانہ کہہ رہے ہیں لیکن یہ انڈین اور پاکستانیوں کے علاوہ کون سمجھے گا؟‘ 

 لیکن کچھ صارفین نے گانے کو پسند کرتے ہوئے کہا: ’ترانہ ہمیشہ ترانہ ہونا ضروری نہیں ہے۔ جتنا آپ اسے سنیں گے اتنا ہی آپ اسے پسند کرنے لگیں گے۔‘