انٹرنیشنل کرکٹ کونسل (آئی سی سی) نے ورلڈ کپ 2023 کی ٹرافی  کے ساتھ بالی ووڈ اداکار شاہ رخ خان کی تصویر اپنے آفیشل ٹوئٹر اور انسٹاگرام پر شیئر کی، جس میں بالی وڈ اداکار پیار بھرے انداز میں ٹرافی کو دیکھ رہے ہیں۔

آئی سی سی کی شیئر کردہ تصویر کے ساتھ شاہ رخ خان کو کنگ خان کہا گیا اور ساتھ ہی ’یہ بس یہیں ہے‘ کا کیپشن بھی دیا گیا۔

آئی سی سی کی جانب سے یہ تصویر شیئر کرنے پر شاہ رخ کے مداحوں کی خوشی کا ٹھکانہ نہیں رہا۔

ٹوئٹر پر راجہ بابو نامی صارف نے لکھا کہ ’جب انڈیا ورلڈ کپ جیتے گا تو اس کا کریڈٹ شاہ رخ خان کو ملے گا۔‘

نے کہا کہ ’یہ شاہ رخ کی میراث ہے کہ آئی سی سی نے انہیں کنگ خان تسلیم کیا ہے۔ اور ورلڈ کپ ٹرافی کی نقاب کشائی کرنے والے انڈیا کے سب سے بڑے چہرے سے بہتر اور کون ہو گا۔‘ 

دکشا سنگھ نے انسٹاگرام پر کمنٹ کرتے ہوئے بالی ووڈ اداکار کے ٹرافی کو دیکھنے کے انداز کی تعریف کرتے ہوئے کہا کہ ’انوشکا شرما نے ٹھیک کہا تھا کہ شاہ رخ خان کسی بے جان چیز سے بھی رومانس کر سکتے ہیں۔‘

نسٹاگرام پر ہر ادتیہ نامی صارف نے ٹرافی کی طرف سے ایک مشورہ دے ڈالا اور کہا کہ ’ اتنی شدت سے مت دیکھو۔۔ ہمارا ساتھ بس سیمی فائنل تک کا ہے۔‘

تاہم ان سب میں ایک پاکستانی صارف بھی میدان میں آئے اور انہوں نے لکھا: ’اگر شاہ رخ خان نے ٹرافی رکھنی ہے تو رکھ لیں ورنہ انڈین ٹیم کو تو ہم پاکستانی یہ ٹرافی لینے نہیں دیں گے، لیکن شاہ رخ کے لیے کچھ بھی۔‘ 

 واضح رہے کہ آئی سی سی مینز کرکٹ ورلڈ کپ 2023 کی ٹرافی 27 جون سے شروع ہونے والے ٹرافی ٹور میں 18 ملکوں کا دورہ کرے گی۔ ٹرافی اس وقت پاپوآ نیو گنی میں ہے، جبکہ انٹرنیشنل کرکٹ کونسل کے جاری کردہ شیڈول کے مطابق ورلڈ کپ ٹرافی 31 جولائی سے چار اگست تک پاکستان لائی جائے گی۔