انڈیا میں حکام نے جمعرات کو کہا کہ ملک کے شمال مشرقی علاقے سکم میں شدید بارشوں سے سیلاب کے نتیجے میں 14 افراد جان سے گئے جبکہ 22 فوجیوں سمیت 102 افراد لاپتہ ہیں۔
خبر رساں ادارے روئٹرز کے مطابق حکام نے کہا کہ سیلابی صورت حال نے 22 ہزار لوگوں کی زندگی کو متاثر کیا ہے۔
انڈیا کے ایک دفاعی ترجمان نے سوشل میڈیا پلیٹ فارم ایکس (سابقہ ٹوئٹر) پر کہا کہ، ’ٹیستا دریا میں شدید بارشوں اور پانی کے تیز بہاو اورکچھ مقامات پر پل بہہ جانے کے باوجود سرچ آپریشنز کا آغاز کر دیا گیا ہے۔‘
لوہنک جھیل میں بدھ کو کلاؤڈ برسٹ کے باعث ٹیستا دریا سے سیلابی ریلوں کا بہاؤ شروع ہوگیا۔ ریاستی ڈیزاسٹر میجیمنٹ ایجنسی نے کہا کہ 26 لوگ زخمی ہوئے جبکہ جمعرات تک 102 افراد لاپتہ ہوگئے۔ ساتھ میں 11 پل بھی سیلابی ریلوں میں بہہ گئے۔
اے این آئی ایجنسی کی جانب سے ایک ویڈیو فوٹیج میں دیکھا جاسکتا ہے بارش اور سیلابی پانی کے بہاؤ سے متعدد گھروں، فوجی بیسز اور گاڑیوں کو نقصان پہنچا۔
ان حالات میں محکمہ موسمیات نے لینڈ سلائیڈنگ اور پروازوں میں تاخیر کی وارننگ دی ہے کیونکہ سکم اور ملحقہ ریاستوں میں اگلے دو دنوں میں مزید بارش متوقع ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
یہ دور افتادہ علاقہ نیپال کے ساتھ انڈیا کی سرحد کے قریب واقع ہے اور لوہونک جھیل دنیا کی تیسری بلند ترین چوٹی کنگچن جنگا کے ارد گرد برفانی چوٹیوں میں گلیشیئر کے دامن میں ہے۔
یہاں مون سون کے موسم میں اچانک سیلاب آنا عام بات ہے جو جون میں شروع ہوتا ہے اور عام طور پر ستمبر کے آخر تک رہتا ہے۔
اکتوبر تک مون سون کی شدت عام طور پر ختم ہو جاتی ہے لیکن ماہرین کا کہنا ہے کہ آب و ہوا کی تبدیلی سے ان میں شدت بڑھ رہی ہے۔
مون سون ہر سال لینڈ سلائیڈنگ اور سیلاب کی شکل میں تباہی بھی لاتا ہے۔ گلیشیئرز کے پگھلنے سے پانی کے حجم میں اضافہ ہوتا ہے جبکہ سیلاب زدہ علاقوں میں غیر منظم تعمیرات سے نقصان بڑھ جاتا ہے۔
آب و ہوا کی تبدیلی کی وجہ سے ہمالیہ کے گلیشیئر پہلے سے کہیں زیادہ تیزی سے پگھل رہے ہیں، جس سے کمیونیٹیز کو غیر متوقع اور مہنگی آفات کا سامنا کرنا پڑ رہا ہے۔
انٹرنیشنل سینٹر فار انٹیگریٹڈ ماؤنٹین ڈیولپمنٹ (آئی سی آئی ایم او ڈی) کی جون میں جاری ہونے والی ایک رپورٹ میں خبردار کیا گیا تھا کہ گلیشیئرز گذشتہ دہائی کے مقابلے میں 2011 سے 2020 تک 65 فیصد تیزی سے پگھلے
رپورٹ میں کہا گیا ہے کہ پگھلنے کی موجودہ رفتار کے حساب سے گلیشیئرز اس صدی کے آخر تک اپنے موجودہ حجم کا 80 فیصد تک کھو سکتے ہیں۔
