پاکستان فوج کے شعبہ تعلقات عامہ (آئی ایس پی آر) نے جمعے کو ایک بیان میں بتایا کہ آرمی چیف جنرل عاصم منیر نے زور دیا ہے کہ قانون نافذ کرنے والے ادارے اور حکومت کے دیگر محکمے ’غیر قانونی سرگرمیوں کے خلاف پوری قوت کے ساتھ کوششیں جاری رکھیں گے تاکہ وسائل کی چوری اور معاشی نقصانات کو روکا جا سکے۔‘

آرمی چیف آج کراچی پہنچے جہاں انہوں نے سندھ کی اپیکس کمیٹی کے اجلاس میں شرکت کی۔ اجلاس میں نگران وزیراعلیٰ جسٹس (ر) مقبول باقر کے علاوہ دیگر عہدے داروں بھی شریک ہوئے۔

اس کے علاوہ کراچی ٹرانسفارمیشن پلان اور خصوصی سرمایہ کاری سہولت کونسل (ایس آئی ایف سی) کے تحت اقدامات زیر غور آئے۔

بیان کے مطابق آرمی چیف جنرل عاصم منیر کا کہنا تھا کہ قانون نافذ کرنے والے اور دیگر سرکاری ادارے غیر قانونی سرگرمیوں کے خلاف کارروائیاں پوری قوت کے ساتھ جاری رکھیں گے تاکہ وسائل کی چوری اور ان سرگرمیوں کی وجہ سے ملک کو ہونے والے معاشی نقصانات سے بچایا جا سکے۔

انہوں نے تاریخی اقدامات سے فائدہ اٹھانے کے لیے تمام متعلقہ محکموں کے مابین ہم آہنگی کی ضرورت پر بھی زور دیا۔

آئی ایس پی آر کے مطابق اجلاس کے شرکا نے کہا کہ صوبے کی ترقی اور خوش حالی کے لیے ریاستی ادارے، سرکاری محکمے اور عوام متحد ہیں۔