پاکستان کے سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری نے  پیر کو ایک انٹرویو میں الزام عائد کیا ہے کہ عمران خان کی سابق اہلیہ جمائما گولڈ سمتھ یوٹیوبرز کو پیسے دیتی ہیں تاکہ وہ یہ تاثر دے سکیں کہ آئندہ انتخابات میں پاکستان تحریک انصاف دو تہائی اکثریت سے جیتے گی۔

آصف علی زرداری کے اس بیان پر سوشل میڈیا صارفین تنقید کر رہے ہیں اور ایکس پر #staystronJemimaKhan ٹرینڈ کر رہا ہے۔

پاکستان کے سابق وزیراعظم اور پاکستان تحریک انصاف (پی ٹی آئی) کے سربراہ عمران خان کی سابق اہلیہ جمائما اکثر و بیشتر پاکستانی میڈیا میں خبروں کی زینت بنتی ہیں، جس کی اکثر وجہ ان کے اپنے بیانات نہیں بلکہ پاکستانی شخصیات کے ان سے متعلق بیانات ہوتے ہیں اور اس بار بھی ایسا ہی ہوا جب آصف زرداری نے ایک انٹرویو میں جمائما کا ذکر کیا۔

پیپلز پارٹی کے شریک چیئرمین کا انٹرویو گذشتہ شب نجی ٹی وی چینل ’آج نیوز‘ پر نشر ہوا، جس میں میزبان نے ان سے سوال کیا کہ ’تاثر یہی ہے کہ دو تہائی اکثریت لے کر آئیں گے، وہی (پی ٹی آئی) جیتے گی۔‘ جس پر سابق صدر نے جواب دیا: ’خدا کا خوف کریں، یہ تو باہر بیٹھے ہوئے وی لاگرز کہہ رہے ہیں، ان وی لاگرز کو پیسے دے رہی ہیں جمائما۔‘

سوشل میڈیا پر بہت سے صارفین آصف زرداری کے اس بیان کے تناظر میں جمائما کی حمایت کر رہے ہیں۔

ایکس صارف شہربانو نے لکھا: ’ثابت قدم رہیں پیاری میڈم جمائما، پوری قوم آپ کے ساتھ کھڑی ہے۔‘

نوید حسین نامی ایکس صارف کا کہنا تھا: ’اگر پیسوں سے سوشل میڈیا چلتا تو آج یوٹیوب، ٹوئٹر، ٹک ٹاک اور انسٹاگرام پر صرف اور صرف پاکستان پیپلز پارٹی، ن لیگ اور پاکستان استحکام پارٹی کا عروج ہوتا۔‘

ایک اور ایکس صارف نے اپنے جذبات کا اظہار کرتے ہوئے تحریر کیا: ’ہم آپ کے ساتھ کھڑے ہیں کیونکہ آپ اخلاص اور انسانیت کی مثال ہیں۔ ہم ان کا مقابلہ کریں گے اور جیتیں گے۔

محمد حسیب نامی صارف نے لکھا: ’آپ لاکھوں میں ایک ہیں، ہم تمام پاکستانیوں کو آپ پر فخر ہے۔ محفوظ رہیں اور ثابت قدم رہیں۔‘