ملائیشیا کی فضائی کمپنی کی لاپتہ ہونے والی پرواز ایم ایچ 370 ایک دہائی سے ہوا بازی کی تاریخ کا معمہ چلی آ رہی ہے۔

تاہم اب امید پیدا ہو گئی ہے کہ زیر آب مائیکرو فونز کے ریکارڈ کیے گئے سگنلز کی مدد سے لاپتہ طیارے کا کھوج لگایا جا سکتا ہے۔

ملائیشیا کی فضائی کمپنی کا طیارہ آٹھ مارچ، 2014 کو دوران پرواز غائب ہو گیا تھا۔ یہ طیارہ ملائیشیا کے دارالحکومت کوالا لمپور سے چینی دارالحکومت بیجنگ جا رہا تھا۔

ایم ایچ 370 کے 239 مسافروں اور عملے کے ساتھ کیا واقعہ پیش آیا، اس بارے میں مختلف نظریات کا تفصیل کے ساتھ جائزہ لیا گیا ہے۔

اب کارڈف یونیورسٹی کے ماہرین کا ماننا ہے کہ انہوں نے طیارے کی جنوبی بحر ہند پر پرواز کے آخری مرحلے میں ہائیڈرو فون (زیر آب مائیکروفون) کے سگنل کو شناخت کیا ہے۔

پرواز کے 200 میٹر فی سیکنڈ کی رفتار کے ساتھ سمندر کے پانی کے ساتھ ٹکرانے کی صورت میں، کارڈف کے محققین کا اندازہ ہے کہ بہت زیادہ حرکی توانائی کا اخراج ہوا ہو گا، جس کی مثال ایک چھوٹا زلزلہ ہے۔

تین مارچ، 2019 کو کوالا لمپور میں بوئنگ 777 طیارے کے پر کا ایک حصہ ڈسپلے پر رکھا ہوا ہے۔ اس حصے کے بارے میں خیال کیا جاتا ہے کہ یہ لاپتہ ایم ایچ 370 کا حصہ ہے (اے ایف پی)

طیارے کو تلاش کرنے کے عمل میں تجویز کردہ وقت میں کیپ لوون میں چھ سیکنڈ کا ایک کمزور سگنل ریکارڈ کیا گیا تھا۔

لیکن محققین کا کہنا ہے کہ اگر طیارے کا پتہ لگانے کی کوششوں کا ازسرنو جائزہ لیا جائے تو دیگر سگنلز کی تصدیق ہو سکتی ہے۔

ایم ایچ 370 کی گمشدگی کے وقت بحر ہند میں ایک اور ہائیڈروایکوسٹک سٹیشن ڈیاگو گارشیا بھی کام کر رہا تھا۔

کارڈف یونیورسٹی کے سکول آف میتھمیٹکس کے پروفیسر ڈاکٹر اسامہ کدری کا کہنا ہے کہ ’ہمارے تجزیے سے ظاہر ہوتا ہے کہ ماضی میں طیاروں کو پیش آنے والے حادثات کے واضح پریشر سگنل ہائیڈرو فونز میں پائے گئے۔ یہاں تک کہ 3000 کلومیٹر سے زیادہ کے فاصلے پر بھی۔

’ایم ایچ 370 کے معاملے میں سرکاری تحقیقات اس نتیجے پر پہنچی کہ طیارہ تلاش کے علاقے کے ساتویں حصے کے قریب گر کر تباہ ہوا ہو گا۔ یہ وہ مقام ہے جہاں طیارے اور انمارسیٹ (سیٹلائٹ ٹیلی کمیونیکیشن کمپنی) کے درمیان آخری بار رابطہ ہوا تھا۔‘

نتائج کے بعد محققین نے حکام سے کہا ہے کہ وہ تلاش کے میدان کے ’ساتویں حصے میں منظم دھماکے یا ایئر گنز کے استعمال‘ سمیت فیلڈ تجربات کریں تاکہ قریبی ہائیڈرو ایکوسٹک سٹیشنوں پر موصول ہونے والے سگنلز پران کے اثرات کو جانچا جا سکے۔

اس ضمن میں مئی میں شائع ہونے والی اس تحقیق میں 2017 میں ارجنٹائن کے ساحل سے غائب ہونے والی اے آر اے سان جوان آبدوز کے سرچ اینڈ ریسکیو مشن کا حوالہ دیا گیا۔

آبدوز کے غائب ہونے کے وقت اس کے پچک جانے کے نتیجے میں ہونے والے دھماکے اور موازنے کے لیے ایک سال بعد آوازوں کی نقل تیار کرنے کی خاطر دستی بموں کا استعمال کیا گیا۔

اس طرح ہائیڈروایکوسٹک ٹیکنالوجی نے جنوبی بحر اوقیانوس میں تین ہزار میٹر کی گہرانی میں موجود آبدوز کا پتہ لگانے میں میں مدد کی۔

ڈاکٹر کدری نے مزید کہا: ’بدقسمتی سے ہمیں یقین کے ساتھ کوئی ایسا سنگل نہیں ملا کہ جس کی لاپتہ طیارے کو نئے سرے سے تلاش کرنے کے لیے ضرورت ہے۔

’تاہم حکام کی جانب سے سفارشات پر عمل کرنے کی صورت میں، ہم مشاہدے میں آنے والے سنگل کے متعلقہ ہونے کے حوالے سے جائزہ لے سکتے ہیں۔ اس طرح ممکن ہے کہ ایم ایچ 370 کی موجودگی کے مقام پر روشنی پڑے۔‘