جنوبی کوریا کی پارلیمنٹ نے منگل کی رات صدر یون سک یول کی جانب سے محض چند گھنٹے قبل ملک میں نافذ کیے گئے مارشل لا کے اعلان کو اٹھانے کے حق میں ووٹ دیا۔

صدر نے مارشل لا کا اعلان کرتے ہوئے ’ریاست مخالف‘ قوتوں کو ختم کرنے کے عزم کا اظہار کیا تھا کیونکہ وہ ملک کی پارلیمنٹ کو کنٹرول کرنے والی حزب اختلاف کے خلاف جدوجہد کر رہے ہیں اور کمیونسٹ شمالی کوریا کے ساتھ ہمدردی کا الزام لگاتے ہیں۔
امریکی نیوز ایجنسی اسوسی ایٹڈ پریس (اے پی) کے مطابق مارشل لا کے اعلان کے چند گھنٹوں بعد جنوبی کوریا کی پارلیمنٹ نے اعلان اٹھانے کے حق میں ووٹ دیا۔

قومی اسمبلی کے سپیکر وو وون شیک نے اعلان کیا کہ قانون ساز ’عوام کے ساتھ مل کر جمہوریت کی حفاظت کریں گے۔‘

انہوں نے نے پولیس اور فوجی اہلکاروں سے اسمبلی کے احاطوں سے پیچھے ہٹنے کا مطالبہ کیا۔

صدر کے حیران کن اقدام نے آمرانہ دور کی یاد تازہ کی، جسے ملک نے 1980 کی دہائی سے نہیں دیکھا تھا اور اس کی فوری طور پر اپوزیشن اور یون کی اپنی قدامت پسند پارٹی کے رہنما نے مذمت کی تھی۔

جنوبی کوریا کی یونہاپ نیوز ایجنسی کے مطابق صدر کے اعلان کے بعد جنوبی کوریا کی فوج نے اعلان کیا تھا کہ پارلیمان اور دیگر سیاسی اجتماعات، جو ’سماجی الجھن‘ کا باعث بن سکتے ہیں، معطل کر دیے جائیں گے۔‘

یونہاپ نے کہا کہ فوج نے یہ بھی کہا کہ ملک کے ہڑتالی ڈاکٹروں کو 48 گھنٹوں کے اندر کام پر واپس آنا چاہیے۔

میڈیکل سکولوں میں طلبا کی تعداد بڑھانے کے حکومتی منصوبوں کے خلاف ہزاروں ڈاکٹر مہینوں سے ہڑتال پر ہیں۔ فوج نے کہا کہ جو بھی حکم کی خلاف ورزی کرتا ہے اسے بغیر وارنٹ کے گرفتار کیا جا سکتا ہے۔

جنوبی کوریا کے قانون کے تحت پارلیمنٹ میں اکثریتی ووٹ کے ساتھ مارشل لا کو اٹھایا جا سکتا ہے۔ پارلیمنٹ میں حزب اختلاف کی ڈیموکریٹک پارٹی کو اکثریت حاصل ہے۔

اعلان کے فوراً بعد قومی اسمبلی کے سپیکر نے اپنے یوٹیوب چینل پر تمام قانون سازوں سے اسمبلی کی عمارت میں جمع ہونے کا کہا۔

انہوں نے فوج اور قانون نافذ کرنے والے اہلکاروں پر زور دیا کہ وہ ’پرسکون رہیں اور اپنے عہدوں پر فائز رہیں۔‘

ووٹ میں حصہ لینے والے تمام 190 قانون سازوں نے مارشل لا کے خاتمے کی حمایت کی۔ ٹیلی ویژن فوٹیج میں ایسے فوجیوں کو دیکھا جا سکتا ہے، جو پارلیمنٹ میں تعینات تھے اور ووٹنگ کے بعد وہاں سے چلے گئے۔

اس سے قبل  ٹی وی نے پولیس افسران کو اسمبلی کے داخلی راستے کو روکتے ہوئے اور ہیلمٹ والے فوجیوں کو عمارت کے سامنے رائفلیں اٹھائے دکھایا۔

ایسوسی ایٹڈ پریس کے ایک فوٹوگرافر نے کم از کم تین ہیلی کاپٹر دیکھے، جو ممکنہ طور پر فوج کے تھے، جو اسمبلی کے میدان کے اندر اترے، جب کہ دو یا تین ہیلی کاپٹر اس جگہ کے اوپر چکر لگا رہے تھے۔

یون کی قدامت پسند پیپلز پاور پارٹی کے رہنما ہان ڈونگ ہون نے مارشل لا لگانے کے فیصلے کو ’غلط‘  قرار دیا اور ’عوام کے ساتھ مل کر اسے روکنے‘ کا عزم کیا۔

2022 کے صدارتی انتخابات میں یون سے شکست کھانے والے اپوزیشن لیڈر لی جے میونگ نے یون کے اعلان کو ’غیر قانونی اور غیر آئینی‘ قرار دیا۔

مارشل لا کا نفاذ

جنوبی کوریا کے صدر یون سوک یول نے منگل کو یہ کہتے ہوئے ہنگامی مارشل لا کا اعلان کر دیا کہ یہ قدم ’کمیونسٹ قوتوں‘ سے ملک کی حفاظت کے لیے ضروری تھا۔