وفاقی دارالحکومت اسلام آباد، راولپنڈی اور گرد و نواح میں ہفتے کو زلزلے کے زوردار جھٹے محسوس کیے گئے جن کی شدت پاکستانی محکمہ موسمیات کے مطابق 5.5 تھی۔
پنجاب کے دیگر شہروں اٹک، چنیوٹ، چکوال، میانوالی اور گردونواح میں بھی زلزلے کے جھٹکے محسوس کیے گئے جہاں شہری گھروں اور عمارتوں سے باہر نکل آئے تاہم زلزلے کے باعث کسی قسم کے نقصان کی کوئی اطلاع نہیں ملی ہے۔
پاکستان میٹرولوجیکل ڈپارٹمنٹ کے مطابق روالپنڈی کے 60 کلو میٹر شمال مغرب میں زلزلے کا مرکز تھا، جبکہ اس کی گہرائی 12 کلو میٹر تھی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پی ایم ڈی نے بیان میں کہا کہ زلزلے کی شدت پانچ اعشاریہ پانچ تھی اور 12 بج کر 31 منٹ پر زلزلے کے جھٹکے محسوس کیے گئے۔
دوسری جانب امریکی جیولوجویکل سروے (یو ایس جی ایس) کے مطابق زلزلے کا مرکز سنجوال تھا جس کی گہرائی 12 کلو میٹر تھا جبکہ شدت ریکٹر سکیل پر پانچ تھی۔
پنجاب ڈیزاسٹر منیجمنٹ اتھارٹی (پی ڈی ایم اے) کے ترجمان کا کہنا ہے کہ پنجاب بھر کی انتظامیہ عمارتوں کی چیکنگ میں مصروف ہے۔
ترجمان کی جانب سے جاری بیان میں کہا گیا کہ پنجاب کے کسی بھی علاقے سے جانی و مالی نقصان کی رپورٹ موصول نہیں ہوئی۔
ڈائریکٹر جنرل پی ڈی ایم اے نے کہا کہ ’زلزلے کے آفٹر شاکس سے نمٹنے کے لیے مشینری اور عملے کو الرٹ رکھا گیا ہے۔‘
ان کا کہنا تھا کہ پی ڈی ایم اے کے صوبائی کنٹرول روم سمیت پنجاب بھر کے ڈسٹرکٹ ایمرجنسی آپریشن سینٹرز الرٹ ہیں۔
