امریکی فضائیہ نے بتایا ہے کہ یمن میں ایرانی حمایت یافتہ حوثیوں کے متحدہ عرب امارات (یو اے ای) میں حالیہ غیر معمولی حملوں کے بعد امریکی ایف 22 لڑاکا طیارے خلیجی ملک کے فوجی ہوائی اڈے پہنچ گئے ہیں۔
برطانوی خبر رساں ادارے روئٹرز کے مطابق حالیہ ہفتوں کے دوران حوثیوں نے متحدہ عرب امارات کے متعدد اہداف کے خلاف بڑے پیمانے پر حملے کیے ہیں، جن میں سے کئی کو ناکام بنا دیا گیا تھا۔
ان حملوں نے اماراتی اور امریکی فضائی دفاع کے لیے پریشانی کو جنم دیا۔ یہاں تک کہ ایک موقع پر یو اے ای میں مقیم امریکی فوجی مختصر دورانیے کے لیے پناہ لینے پر بھی مجبور ہوگئے تھے۔
امریکی فضائیہ کے بیان میں کہا گیا کہ جدید ترین جیٹ طیارے گذشتہ ماہ جنوری کے دوران میزبان ملک میں تعینات امریکی اور اماراتی مسلح افواج کے خلاف سلسلہ وار حملوں کے بعد یو اے ای کے لیے امریکی حمایت کے کثیر جہتی مظاہرے کے طور پر، خلیجی ریاست کے فوجی ہوائی اڈے پر پہنچے ہیں۔
’یونائیٹڈ سٹیٹس ایئر فورس سینٹرل‘ کے ایک بیان میں کہا گیا ہے کہ امریکی وزیر دفاع نے ابوظبی کے ولی عہد شہزادہ محمد بن زاید آل نہیان کے ساتھ مذاکرات کے بعد ففتھ جنریشن کے ان طیاروں کی تیزی سے تعیناتی کا حکم دیا ہے۔
بیان کے مطابق: ’یہ تعیناتی پورے خطے میں پہلے سے موجود اتحادیوں اور شراکت داروں کی مشترکہ جنگی فضائی طاقت کی صلاحیتوں کو بڑھا دے گی۔‘
امریکی فضائیہ نے کہا کہ ایئرمین اور ایف 22 طیارے ورجینیا کے جوائنٹ بیس کے ’فرسٹ فائٹر ونگ‘ سے تعینات کیے گئے ہیں۔
HOT: @usairforce F-22 Raptors arrived at Al Dhafra Air Base, in the UAE, today as part of a multifaceted demonstration of U.S. support after a series of attacks throughout January threatened U.S. and Emirati armed forces stationed at the host installation.@380AEW pic.twitter.com/nAAZYK2BjV
— US AFCENT (@USAFCENT) February 12, 2022
گذشتہ ہفتے مشرق وسطیٰ میں کارروائیوں کی نگرانی کرنے والے امریکی جنرل نے روئٹرز کو بتایا تھا کہ امریکہ متحدہ عرب امارات پر داغے جانے والے میزائلوں کو گرانے کے لیے اپنے انٹرسیپٹرز کا استعمال کرے گا۔
امریکی نیوز ایجنسی ایسوسی ایٹڈ پریس (اے پی) کے مطابق امریکی طیارے ابوظبی کے الظفرہ ایئر بیس پر اترے جہاں تقریباً دو ہزار امریکی فوجی پہلے ہی موجود ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
ایئر بیس پر موجود امریکی فوجیوں نے گذشتہ ماہ حوثیوں کے حملوں کے جواب میں پیٹریاٹ انٹرسیپٹر میزائل داغے تھے۔
اے پی کے مطابق 2003 میں عراق پر امریکی حملے کے بعد یہ پہلا موقع ہے جب امریکی فوجیوں نے خطے میں اس دفاعی نظام کا استعمال کیا ہے۔
امریکی حکام نے آپریشنل سکیورٹی کا حوالہ دیتے ہوئے ایف 22 طیاروں اور پائلٹس یا ایئرمین کی تعداد بتانے سے گریز کیا ہے۔
بعدازاں امریکی فضائیہ کی طرف سے جاری کردہ ایک تصویر میں الظفرہ ایئر بیس کے ایک ٹیکسی وے پر چھ ایف 22 طیاروں کو ایک قطار میں دکھایا گیا تھا۔
امریکی فضائیہ کے کمانڈر لیفٹیننٹ جنرل گریگ گیلوٹ نے کہا: ’ریپٹرز کی موجودگی پہلے سے ہی مضبوط اتحادی ملک کے دفاع کو تقویت دے گی اور عدم استحکام پیدا کرنے والی قوتوں کو یہ پیغام دے گی کہ امریکہ اور ہمارے شراکت دار خطے میں امن اور استحکام کو فعال کرنے کے لیے پرعزم ہیں۔‘
