بھارت اور پاکستان کے درمیان ٹیسٹ میچ ہو یا ایک روزہ میچ یا پھر ٹی ٹوئنٹی کا مقابلہ، سنسنی خیزی اس کی کم نہیں ہوتی ہے۔ کچھ میچ توایسے ہیں جو تاریخ کا ایسا حصہ بن جاتے ہیں کہ ضرب المثل بن جاتے ہیں۔ شارجہ کا چھکا تھا تو کرکٹ کی ایک گیند کا کھیل لیکن اس کی شہرت آج بھی چھائی ہوئی ہے اور مثالیں دی جاتی ہیں۔ 36 سال قبل آج ہی کے دن شارجہ کے گراؤنڈ میں آخری گیند پر جب جاوید میانداد کے سامنے چیتن شرما بولنگ کرنے اپنے رن اپ سے چلنا شروع ہوئے تھے تو شارجہ سے لے کر پاکستان تک امید تو سب کو تھی لیکن کسی کو یقین نہیں تھا کہ آخری گیند پر چھکا لگ جائے گا۔ ڈریسنگ روم میں سب سے الگ تھلگ اپنی روایتی خاموشی کے ساتھ بیٹھے ہوئے کپتان عمران خان بھی اس ہی امید میں تھے جس میں پورا پاکستان تھا۔ 80 کی دہائی میں شارجہ ایک مصروف ترین کرکٹ وینیو تھا جس میں سال میں دو دفعہ مختلف ناموں سے ایک روزہ میچوں کے ٹورنامنٹ ہوتے تھے اور بھارت اور پاکستان اس کی اہم ٹیمیں ہوتی تھیں۔ عرب امارات میں دونوں ممالک کے شہریوں کے بہت زیادہ تعداد کے باعث یہ مقابلے منی ورلڈکپ کی مانند ہوتے اور دیکھنے والوں کا جم غفیر ہوتا تھا۔ 18 اپریل 1986 کے گرم ترین دن میں آسٹریلشیا کپ کا فائنل پاکستان اور بھارت کے درمیان کھیلا جارہا تھا۔ حسب معمول سٹیڈیم میں تماشائیوں کے شور میں کان پڑی آوازسنائی نہیں دے رہی تھی۔ بھارت نے پہلے بیٹنگ کرتے ہوئے 245 رنز بنائے تھے اس طرح پاکستان کو جیت کے لیے 246 رنز کا ہدف ملا تھا جو مضبوط بیٹنگ لائن کو دیکھتے ہوئے مشکل نہ تھا اس زمانے میں بھارت کی بولنگ واجبی سی ہوتی تھی۔ سارا بوجھ کپل دیو اٹھاتے تھے۔ لیکن پاکستان کی بیٹنگ نے ایک بار پھر دھوکہ دیا اور پہلے چار اچھے بلے باز 110 رنز پر واپس لوٹ گئے تھے۔ سارا بوجھ میانداد پر جاوید میانداد اپنی کتاب ’کٹنگ ایج‘ میں لکھتے ہیں کہ ’جب میں 39 رنز کے مجموعی سکور پر وکٹ پر پہنچا تو امید تھی کہ ہم ہدف عبور کرلیں گے لیکن جب سامنے مسلسل وکٹیں گرنے لگیں۔ جب عمران خان بھی آؤٹ ہوئے تو میں نے سوچ لیا شاید ہم نہیں جیت سکتے۔ میں نے پھر فیصلہ کرلیا کہ میچ کو آخری اوور تک لے جاؤں گا۔‘ جاوید کسی نہ کسی طرح میچ کو 48 ویں اوور تک لے گئے انہوں نے اس دن اپنی سنچری بھی مکمل کی اور ایک اینڈ سنبھالے رکھا جب آخری 18 گیندوں پر 31 رنز درکار تھے تو انہیں امید ہوئی کہ میچ جیت سکتے ہیں۔ اگلی 12 گیندوں پر 20 رنز بن گئے تو ان کوکچھ اطمینان ہوا۔ لیکن وہ میچ آخری گیند تک نہیں لے جانا چاہتے تھے اور اس سے پہلے ہی ایک دو چوکے مار کر ختم کردینا چاہتے تھے مگر شومئی قسمت اس دوران ان کے سامنے وسیم اکرم رن آؤٹ ہوگئے۔ اب میانداد دوسری طرف تھے اور ذوالقرنین نئے بلے باز تھے جن کی شہرت ہارڈ ہٹر کی تھی۔ چیتن شرما آخری اوور کررہے تھے۔ انہوں نے اوور کی چوتھی گیند پر ذوالقرنین کو بولڈ کردیا۔ اب دو گیندیں تھیں اور پانچ رنز درکار تھے۔ توصیف احمد آخری بلے باز تھے اور دوسری طرف میاں داد بے تابی سے سٹرائیک کے منتظر تھے۔ توصیف احمد کا ایک رن توصیف احمد شارجہ کی یادیں تازہ کرتے ہوئے کہتے ہیں کہ ’جب میں میدان میں داخل ہوا تو شور اس قدر تھا کہ میں نروس ہوگیا تھا۔‘ ’جب پچ پر پہنچا تو جاوید بھائی نے کہا کیا کروگے؟ میں نے بمشکل ان کی آواز سن کر کہا کچھ بھی ہو میں بھاگ کر آپ کو سٹرائیک دوں گا۔ ہم نے طے کرلیا تھا کہ گیند اگر بیٹ پر نہ آئے اور کیپر کے پاس بھی جائے تو ہمیں بھاگنا ہوگا۔‘ ’دھڑکتے ہوئے دل کے ساتھ میں کریز پر تیار ہوگیا جب چیتن شرما کی گیند آئی تو میں نے بیٹ گھما دیا اتفاق ہوا کہ گیند بیٹ پر آگئی۔ گیند مڈ آف پر اظہر الدین کے پاس گئی اور میں نے بھاگنا شروع کردیا کیوں کہ جاوید بھائی چیخ رہے تھے۔ توصیف بھاگو۔‘ ’میں دیکھ رہا تھا گیند اظہر الدین کے پاس ہے اور میں ان ہی کے قریب اینڈ کی طرف بھاگ رہا تھا۔ مجھے ایسا لگا کہ وہ ایک رن نہیں میرا پورا کیریئر ہے! اظہر چاہتے تو بھاگ کر وکٹ پر آتے اور مجھے رن آؤٹ کر دیتے لیکن انہوں نے کھڑے کھڑے تھرو کی اورپھر ۔۔۔ میں بچ گیا اور وہ تاریخی رن بھی مکمل ہوگیا جو اگر نہ ہوتا تو کچھ نہ ہوتا۔‘ توصیف کہتے ہیں میں نے پاکستان کے لیے کئی دفعہ عمدہ بولنگ کرکے میچ جتائے لیکن وہ ایک رن میری پہچان بن گیا۔ جہاں بھی گیا وہ رن ہی مجھ سے پوچھا گیا ہر ایک آج بھی اس رن کے لینے کی روداد پوچھتا ہے۔ شارجہ کا چھکا جب جاوید میانداد کو سٹرائیک ملی تو پاکستان کو چار رنز چاہیے تھے۔ جاوید اپنی کتاب میں تفصیل سے لکھتے ہیں کہ ’میں چیتن شرما کی آخری گیند کے لیے دماغ بنا چکا تھا مجھے اندازہ تھا کہ وہ آخری گیند یارکر کریں گے اس لیے میں کریز سے دو فٹ باہرنکل کر کھڑا ہوگیا تاکہ فل ٹاس بنا سکوں۔‘ ’شرما نے توقع کے مطابق یارکر کی اور میں نے ایک قدم پیچھے ہٹ کر شاٹ لگایا اور بغیردیکھے گیند کہاں گئی ہے پویلین کی طرف دوڑ پڑا۔ کیوں کہ مجھے اپنے شاٹ پر یقین تھا کہ گیند عین بیٹ کے درمیانی حصے پر لگی ہے اور باؤنڈری سے باہر ہی گرے گی اور ایسا ہی ہوا۔ تماشائیوں کے شور نے بتا دیا کہ ہم میچ جیت چکے ہیں۔‘ توصیف بیچارے کو درہم آٹھ ملیں گے اس شارجہ کے چھکے نے صرف پاکستان کو آسٹریلیشیا کپ جتایا بلکہ تہلکہ مچادیا، پورا سٹیڈیم اچھل پڑا تھا ہر ایک خوشی سے پاگل ہو رہا تھا۔ اس چھکے کو پوری قوم نے بھرپور انجوائے کیا۔ مزید پڑھ اس سیکشن میں متعلقہ حوالہ پوائنٹس شامل ہیں۔اس چھکے پر انور مقصود نے سلمی آغا کے ایک گانے کی طرز پر مزاحیہ گیت لکھا تھا جسے بشری انصاری نے گایا تھا۔ ایک چھکے کے جاوید کو سو لاکھ ملیں گے توصیف بیچارے کو درہم آٹھ ملیں گے وہ گانا آج بھی مقبول ترین گانا ہے۔ شارجہ کے چھکے نے جاوید میانداد کو شارجہ کا کنگ بنادیا تھا وہ اس سے مالامال ہوگئے۔ ایک لگژری مرسڈیز کار تحفے میں ملی اور بھی بیش قیمت انعامات بھی اور پھر جس بلے سے انہوں نے چھکا مارا اس کی نیلامی سے الگ بھاری رقم ملی۔ حالانکہ انہوں نے یہ بیٹ شارجہ گراؤنڈ کے بانی عبدالرحمن بخاتر کو تحفہ میں دے دیا تھا تاہم انہوں نے نیلامی کرکے رقم جاوید کو دے دی تھی۔ اس ایک چھکے نے کرکٹ کی تاریخ بنادی میانداد مقبول ترین شخص بن گئے۔ پاکستان جیت گیا۔ لیکن تاریخ اس وقت پیچھے رہ جاتی اگر توصیف احمد آخری گیند سے قبل ایک رن لے کر جاوید میاں داد کو سٹرائیک نہ دیتے۔ یہی وہ لحہ تھا جب میانداد سے پہلے توصیف احمد نے تاریخ لکھ دی تھی۔
لیکن پھر بھی انہیں اس کارنامے کے آٹھ درہم بھی نہ مل سکے اور ان کا وہ ایک رن چھکے کے جشن میں دب گیا۔
