برطانوی مصنف سلمان رشدی نے اپنے نئے ناول ’وکٹری سٹی‘ کی ریلیز سے قبل پیر کو شائع ہونے والے ایک انٹرویو میں کہا ہے کہ گذشتہ سال چاقو کے وار سے زخمی ہونے کے بعد انہیں لکھنا ’بہت مشکل‘ لگتا ہے۔
سلمان رشدی کا کہنا ہے کہ اس حملے نے انہیں ذہنی طور پر خوفزدہ کر دیا ہے۔
سلمان رشدی کا نیا ناول 14 ویں صدی کی ایک خاتون کی کہانی ہے جو پدرشاہی دنیا کی خلاف ورزی کرتے ہوئے ایک شہر پر حکومت کرتی ہے۔ ان کا ناول آج (منگل) امریکہ میں فروخت کے لیے پیش ہو گا۔
12 اگست کو نیو یارک کے ایک علاقے میں ایک کانفرنس میں چاقو سے حملے کے بعد اپنے پہلے انٹرویو میں 75 سالہ مصنف نے نیویارکر میگزین کو بتایا کہ ’پی ٹی ایس ڈی جیسی کوئی چیز ہے۔‘
ان کا مزید کہنا تھا کہ ’مجھے لکھنا بہت مشکل لگا ہے۔ میں لکھنے کے لیے بیٹھتا ہوں، اور کچھ نہیں ہوتا۔ میں لکھتا ہوں، لیکن یہ خالی پن اور کباڑ کا امتزاج ہے، وہ چیزیں جو میں لکھتا ہوں اسے میں اگلے دن حذف کر دیتا ہوں۔ میں ابھی تک اس جنگل سے باہر نہیں آیا ہوں۔‘
ایوارڈ یافتہ ناول نگار کے ایجنٹ نے گذشتہ برس اکتوبر میں کہا تھا کہ ان کی ایک آنکھ کی بینائی اور ایک ہاتھ کا استعمال ختم ہو گیا ہے۔ سلمان اب امریکی شہری ہیں جو 20 سال سے نیویارک میں رہ رہے ہیں۔
سلمان رشدی نے صحافی ڈیوڈ ریمنک کو بتایا کہ ’بڑی چوٹیں ٹھیک ہو جاتی ہیں‘ لیکن کچھ انگلیوں میں احساس کی کمی کی وجہ سے وہ اچھی طرح ٹائپ نہیں کر پا رہے ہیں۔ ڈیوڈ ریمنک 1998 سے دی نیویارکر کے ایڈیٹر ہیں اور 1992 سے سٹاف رائٹر ہیں۔ وہ ’دی برج: دی لائف اینڈ رائز آف باراک اوباما‘ کے مصنف ہیں۔
انڈین نژاد مصنف نے خود کو ’خوش قسمت‘ قرار دیتے ہوئے کہا کہ ’میں بہتر ہو گیا ہوں۔ لیکن جو کچھ ہوا اس کو دیکھتے ہوئے میں اتنا برا نہیں ہوں۔‘
سلمان رشید کہتے ہیں کہ 'میں نے ہمیشہ سوچا ہے کہ میری کتابیں میری زندگی سے زیادہ دلچسپ ہیں۔ ایسا لگتا ہے کہ دنیا اس سے متفق نہیں ہے۔‘
گذشتہ موسم گرما میں جب سلمان رشدی 75 برس کے ہو گئے تو ان کے پاس یہ یقین کرنے کی تمام وجوہات موجود تھیں کہ انہوں نے قتل کے خطرے پر قابو پا لیا ہے۔ سال 2000 میں نیو یارک میں آباد ہونے کے بعد، وہ آزادانہ طور پر رہتے تھے اور ان کا کہنا تھا کہ انہوں نے دہشت زدہ ہونے سے انکار کر دیا تھا۔
تاہم، ایسے وقت بھی آئے جب یہ خطرہ خود کو ظاہر کر رہا تھا۔ 2012 میں اقوام متحدہ میں عالمی رہنماؤں کے سالانہ خزاں کے اجلاس کے دوران وہ ایران کے صدر محمود احمدی نژاد کے ساتھ صحافیوں کی ایک چھوٹی سی ملاقات میں شریک ہوئے اور ان سے پوچھا تھا کہ کیا ایک ایرانی فاؤنڈیشن کی جانب سے سلمان رشدی کے سر پر رکھی گئی کروڑوں ڈالر کی انعامی رقم ختم کر دی گئی ہے۔
احمدی نژاد مسکرائے اور کہا 'سلمان رشدی، وہ اب کہاں ہیں؟ اس کی کوئی خبر نہیں ہے۔ کیا وہ امریکہ میں ہے؟ اگر وہ امریکہ میں ہے، تو آپ کو اس کی حفاظت کے لیے اس معلومات کو نشر نہیں کرنا چاہیے۔‘
2012 میں شائع ہونے والی اپنی تیسری یادداشت 'جوزف انٹن' میں انھوں نے لکھا تھا کہ 'مطلق سلامتی جیسی کوئی چیز نہیں تھی۔ عدم تحفظ کی صرف مختلف سطحیں تھیں۔ انہیں اس کے ساتھ جینا سیکھنا ہوگا۔ وہ اچھی طرح سمجھتے تھے کہ ان کے قتل کے لیے پاسداران انقلاب یا حزب اللہ کی مشترکہ کوششوں کی ضرورت نہیں ہوگی۔ ایک بکھرا ہوا اکیلا شخص آسانی سے یہ کام کر سکتا تھا۔ لیکن میں نے محسوس کیا تھا کہ یہ بہت پہلے کی بات ہے، اور یہ کہ دنیا آگے بڑھ رہی ہے۔‘
ایران کے سپریم لیڈر آیت اللہ روح اللہ خمینی نے 1988 میں رشدی کی تحریری شدہ کتاب کو توہین آمیز نوعیت کی وجہ سے ان کے قتل کا حکم دیا تھا جس کے بعد وہ کئی سالوں تک روپوش رہے۔
الفاظ ’صرف فاتح‘
رشدی سے پوچھا گیا کہ کیا انہیں لگتا ہے کہ حالیہ دنوں میں اپنی حفاظت میں نرمی لانا ایک غلطی تھی۔
’میں خود سے یہ سوال پوچھ رہا ہوں، اور مجھے اس کا جواب معلوم نہیں ہے۔‘
انہوں نے کہا کہ ایک مصنف کی حیثیت سے ان کی زندگی کا تین چوتھائی حصہ اس فتوے کے بعد کا ہے۔ ’ایک طرح سے آپ اپنی زندگی پر افسوس نہیں کر سکتے۔‘
نیو جرسی سے تعلق رکھنے والے 24 سالہ ہادی ماتر کو حملے کے فوری بعد گرفتار کر لیا گیا تھا اور انہوں نے حملے کے الزامات سے انکار کر دیا تھا۔
سلمان رشدی نے سادہ لہجے میں کہا ’میں اسے مورد الزام ٹھہراتا ہوں۔‘
’وکٹری سٹی‘ جس کا مطلب فاتح شہر ہے سنسکرت میں لکھی گئی ایک تاریخی داستان کا ترجمہ ہے۔ یہ ان کا 15 واں ناول ہے اور حملے سے پہلے لکھا گیا تھا۔
David Remnick on the defiance of Salman Rushdie https://t.co/MgD6ieG1Ne
— New Yorker Fiction (@NYerFiction) February 6, 2023
اس ناول میں نوجوان یتیم پامپا کمپانا کی کہانی بیان کی گئی ہے جسے ایک دیوی نے جادوئی طاقتوں سے نوازا ہے اور اسے جدید انڈیا میں بسناگا کا شہر مل گیا ہے، جس کا ترجمہ وکٹری سٹی کے طور پر کیا جاتا ہے۔
ذاتی طور پر کتاب کی تشہیر نہ کرتے ہوئے سلمان رشدی نے سوشل میڈیا کے ذریعے بات چیت شروع کر دی ہے اور اکثر اپنے نئے ناول کے پریس ریویو شیئر کرتے رہتے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پیر کو انہوں نے ٹوئٹر پر اپنی ایک تصویر پوسٹ کی جس میں ان کی ایک آنکھ سیاہ عینک سے ڈھکی ہوئی ہے، جس کے کیپشن میں انہوں نے لکھا کہ '@NewYorker میں جو تصویر ہے وہ ڈرامائی اور طاقتور ہے لیکن ذاتی طور پر میں ایسا ہی لگ رہا ہوں۔'
پبلشر کے خلاصے میں مزید کہا گیا ہے کہ ’اگلے 250 سالوں میں پامپا کمپانا کی زندگی جادوئی بیجوں کے تھیلے سے لغوی طور پر بونے سے لے کر انسانی طریقوں سے اس کی المناک تباہی تک، یعنی اقتدار میں بیٹھے لوگوں کی تکبر تک، بسناگا کی زندگی سے گہری جڑی ہوئی ہے۔‘
ناول کا اختتام اس بیان کے ساتھ ہوتا ہے: ’الفاظ ہی فاتح ہیں۔‘
1947 میں ممبئی میں پیدا ہونے والے سلمان نے 1975 میں اپنا پہلا ناول ’گریمس‘ شائع کیا اور چھ سال بعد ’مڈ نائٹس چلڈرن‘ سے دنیا بھر میں شہرت حاصل کی جس نے انہیں بوکر پرائز سے نوازا۔
’وکٹری سٹی‘ جمعرات کو برطانیہ میں ریلیز کی جائے گی۔
فی الحال وہ ’جوزف انٹن‘ کے سیکوئل کے بارے میں سوچ رہے ہیں۔ پہلے وہ اس خیال سے خوش نہیں تھے، ’کیونکہ ایسا لگ رہا تھا کہ یہ مجھ پر تھوپا جا رہا ہے - حملے کا مطالبہ ہے کہ مجھے اس کے بارے میں لکھنا چاہیے۔‘
