طوفان شمال کی جانب بڑھ رہا ہے: چیف میٹرولوجسٹ

اسی حوالے سے انڈپینڈنٹ اردو سے بات کرتے ہوئے چیف میٹرولوجسٹ سردار سرفراز نے کہا ہے کہ بائپرجوائے ’ایکسٹریملی سیویئر سائیکلونک سٹارم‘ بن چکا ہے، جو کراچی کے جنوب میں 760 کلو میٹر دور ہے۔

چیف میٹرولوجسٹ سردار سرفراز نے بتایا کہ ’بحیرہ عرب میں موجود سمندری طوفان ’بپرجوئے‘ سمندری طوفان کا یہ سسٹم شمال کی جانب بڑھ رہا ہے۔ طوفان اس وقت ٹھٹھہ کے جنوب میں 740 کلو میٹر جبکہ اوڑماڑہ کے جنوب مشرق میں 840 کلو میٹر کے فاصلے پر ہے۔ 15جون کی دوپہر کو ٹھٹہ کی تحصیل کیٹی بندر اور انڈین گجرات کے درمیان سے ہوتا ہوا گزر سکتا ہے۔‘

#NEOC Update:Very Severe Cyclonic Storm #BIPARJOY status.
Dev path based on intl weather models is for proactive measures against likely impacts. It's evolving sit & impact will only be certain w/ further devplt of sys.
Source:Windy (UKM,BoM-A, ECMWF model)11June,0900hrs PST pic.twitter.com/SMD9c6cnmg

— NDMA PAKISTAN (@ndmapk) June 11, 2023

 انہوں نے یہ بھی بتایا کہ ’اگر طوفان کمزور ہوتا ہے تو اس کی شدت شدید سمندری طوفان کی رہے گی۔ کیٹی بندر پر لہریں 8 سے 10 فٹ بلند ہو سکتی ہیں۔‘

سردار سرفراز کے مطابق ’سمندری طوفان جس بھی علاقے سے ٹکراتا ہے اس وقت تین بڑے اثرات سامنے آتے ہیں۔ جب طوفان ٹکراتا ہے اس جگہ پر ہوا کی رفتار 120 کلو میر فی گھنٹہ سے زیادہ ہو جاتی ہے۔ لہریں 20 فٹ معمول سے اونچی ہو جاتی ہیں جس سے نشیبی علاقوں میں سیلابی صورت حال دیکھنے میں آتی ہے اور متاثرہ علاقے میں تیز طوفانی بارشیں ہوتی ہیں۔‘

10 جون 2023 کی اس تصویر میں کراچی میں سمندری طوفان بپرجوئے کے خطرے کے پیش نظر ماہی گیروں کی کشتیاں کھڑی ہیں (اے پی)

ان کا مزید کہنا تھا کہ ’کراچی کے ساحل سے طوفان  760کلو میٹر دور جنوبب میں ہے جبکہ کراچی کی ساحلی پٹی کو براہ راست ’بپرجوئے‘ نقصان نہیں پہنچائے گا لیکن سمندر میں غیر معمولی سرگرمی جاری رہے گی لہریں اونچی ہیں جبکہ سائیکلون کے باعث شہر کا درجہ حرارت بڑھنے کا امکان ہے۔‘

شہری انتظامیہ نے سمندر کا تفریح کی غرض سے رخ کرنے والوں پر پابندی عائد کر دی ہے۔

محکمہ موسمیات کے مطابق: ’جب سائیکلون بنتے ہیں تو درجہ حرارت میں بھی اضافہ ہو جاتا ہے۔ ان دنوں کراچی کا درجہ حرارت 35 ڈگری سے زیادہ ہے امکان ہے جبکہ درجہ حرارت مزید بڑھ کر آئندہ دنوں میں 40 ڈگری کو بھی چھو سکتا ہے۔‘

محکمہ موسمیات کی جانب سے ماہی گیروں کو ہدایت جاری کی گئی ہے کہ وہ کھلے سمندر کا رخ نہ کریں اور اس سسٹم کے خاتمے تک سفر سے گریز کریں کیونکہ بحیرہ عرب میں صورت حال مزید خراب ہو جائے گی اور لہریں بلند ہوں گی۔

 سردار سرفراز کا کہنا تھا کہ ’ماضی میں اس سے بھی زیادہ شدت کے سائیکلون دیکھنے میں آئے ہیں جس میں ایک کیار نامی طوفان تھا جو 2019میں بحیرہ عرب میں بنا تھا جو عمان اور یمن کی جانب آگے بڑھ گیا تھا۔‘

آٹھ جون 2022 کی اس تصویر میں کراچی کے ساحل پر ماہی گیروں کی ایک کشتی دیکھی جاسکتی ہے (اے ایف پی)

این ڈی ایم اے کی وارننگ

نیشنل ڈیزاسٹر منیجمنٹ اتھارٹی کے ڈی جی سلمان شاہ نے انڈپینڈنٹ اردو کو بتایا کہ انہوں نے الرٹ پہلے سے جاری کیا ہوا ہے۔ اس وقت طوفان کی شدت میں خطرناک حد تک اضافہ دیکھنے میں آ رہا ہے۔ بپرجوئے کی پیش رفت پر مسلسل نگرانی جاری ہے۔

سمندری طوفان کی ممکنہ پیش قدمی کے پیش نظر سندھ اور مکران کے ساحل پر 13 جون کی شام سے شدید بارشوں کی توقع ہے۔

جبکہ تیز ہوائیں چلنے سے ناقص اور کمزور عمارتوں اور بل بورڈز وغیرہ کو بھی نقصان پہنچنے کا اندیشہ ہے۔

وزیراعظم شہباز شریف اور وزیراعلیٰ سندھ مراد علی شاہ کی ہدایات

وزیراعظم شہباز شریف نے بھی سمندری طوفان کے پیش نظر متعلقہ حکام کو بلوچستان میں طوفان اور بارشوں سے متاثرہ علاقوں میں عوام کی مدد کرنے کی ہدایت جاری کی ہے۔