آسٹریلوی ہائی کمشنر کو پشاور کا چرسی تکہ بھا گیا

پاکستان میں تعینات آسٹریلیا کے ہائی کمشنر نیل ہاکنز بھی پشاور کے چرسی تکے کے مداح ہو گئے۔

نیلی شلوار قیمص پہنے روایتی انداز میں آسٹریلوی ہائی کمشنر نیل ہاکنز پشاور کے قصہ خوانی بازار پہنچے جہاں انہوں نے روایتی پکوان اور قہوے کا لطف لیا۔

انہوں نے 15 جولائی کو ٹوئٹر پر اپنی تصاویر شیئر کرتے ہوئے لکھا کہ ’پشاور میں افسانوی قصہ خوانی یا کہانی سنانے والے بازار کا دورہ کرنے میں بہت مزا آیا، جہاں تاجر صدیوں سے خبروں اور کہانیوں کے تبادلے کے لیے جمع ہوتے ہیں۔‘

انہوں نے مزید لکھا کہ ’اپنا دن شروع کرنے کا واحد طریقہ ہے کہ ان رنگین قدیم تانبے کے برتنوں میں الائچی کے ساتھ گرم قہوہ پئیں۔‘ انہوں نے اس کے ساتھ ’ٹی از گریٹ‘ کا ہیش ٹیگ بھی استعمال کیا۔‘

اس کے بعد آج صبح نیل ہاکنز پشاور کے مشہور چرسی تکوں کا مزا لینے پہنچے اور اس کے دیوانے ہو گئے۔

انہوں نے خیبر چرسی تکہ سے اپنی تصویر شیئر کرتے ہوئے کہا کہ ’میں نے ابھی پشاور کا سب سے مزے دار چرسی تکہ کھایا، مجھے تکے کا نشہ ہو گیا ہے۔ اس کا ذائقہ لاجواب ہے۔ اب مجھے پتہ لگا ہے کہ اسے چرسی کیوں کہتے ہیں، یہ ملک کا سب سے بہترین تکہ ہے، اسے کھانے سے کون رک سکتا ہے۔‘

ان کی اس ٹویٹ پر کئی صارفین نے ان کی اس بات کی تائید کرتے ہوئے پشاوری تکہ کھانے کی خواہش ظاہر کی۔

حیدر نامی صارف نے اپنے لیے بھی تکے کا آرڈر دیتے ہوئے کہا کہ ’آپ واقعی چاہتے ہیں کہ چرسی تکہ کے لیے میں فلائٹ پکڑ لوں؟‘

عبدالباقی نے لکھا کہ ’پشاور نہ صرف بہترین چائے کے لیے بلکہ کم مصالحوں اور زیادہ قدرتی اجزا کے ساتھ انتہائی لذیذ اور صحت بخش کھانوں کے لیے بھی بہترین ہے۔‘

جبکہ واجد حسین نے انہیں سرگودھا آنے کی بھی دعوت دے دی، انہوں نے اپنی ٹویٹ میں لکھا کہ ’میں آپ کو آپ کی فیملی کے ساتھ سرگودھا آنے کی دعوت دیتا ہوں، جو کھٹے پھلوں کا مرکز ہے، یہاں آ کر آپ ہماری دیہی زندگی دیکھیں اور میرے گاؤں میں روایتی کھانوں جیسے دیسی چکن، حلوہ، لسی، تندوری روٹی سے لطف اندوز ہوں۔‘
 

نیل ہاکنز کی ٹویٹس کے جواب میں صارفین کی جانب سے دلچسپ تبصروں کا سلسلہ جاری ہے۔