پاکستان کرکٹ بورڈ نے پیر کو لاہور میں کرکٹ ورلڈ کپ 2023 کے لیے قومی ٹیم کی ’سٹار نیشن جرسی‘ کی رونمائی کر دی ہے۔
قذافی سٹیڈیم لاہور میں منعقدہ تقریب میں پاکستان کرکٹ بورڈ کی منیجمنٹ کمیٹی کے چیئرمین ذکا اشرف نے آئی سی سی کرکٹ ورلڈ کپ کے لیے قومی ٹیم کی نئی جرسی کی رونمائی کی۔
پی سی بی کے مطابق ’ورلڈ کپ کی یہ سٹار نیشن جرسی درحقیقت پاکستان کرکٹ کے ہیروز اور پرجوش سپورٹرز کے تعلق کو ظاہر کرتی ہے۔‘
پاکستان کرکٹ بورڈ کی منیجمنٹ کمیٹی کے چیئرمین ذکا اشرف کا کہنا ہے کہ ’سٹار نیشن جرسی سے ہمارے کرکٹرز اور جوشیلے شائقین ہر میچ میں ایک مضبوط تعلق سے جڑے رہیں گے۔ یہ جرسی ہماری کرکٹ کی شاندار روایات اور ورثے اور روشن مستقبل کی عکاس ہے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پاکستان کرکٹ بورڈ کے ڈائریکٹر کمرشل عثمان وحید کا کہنا ہے کہ ’یہ جرسی صرف ایک یونیفارم نہیں ہے بلکہ اس پر کامیابیاں، قربانیاں اور کہانیاں نمایاں ہیں۔‘
’اس کا ہر سٹار شائقین کی بھرپور حوصلہ افزائی اور ہمارے ہیروز کی روایات کو بیان کرتا ہے۔ اس میں ایک ایک نکتہ بڑی خوبی سے شامل کیا گیا ہے جس سے یہ ہر پاکستانی میں فخر کا احساس پیدا کرے گی۔‘
پی سی بی کی پریس ریلیز کے مطابق ’اس جرسی کا ہر سٹار کرکٹ کے میدان میں کارناموں، چمک دمک اور کچھ کر دکھانے کی خواہش کی عکاسی کرتا ہے۔ اس جرسی کے ڈیزائن میں وہ جذبہ بھی نمایاں ہے جو کرکٹ سے محبت کرنے والے ہر پاکستانی کے اندر گونجتا رہتا ہے۔‘
آئی سی سی کرکٹ ورلڈ کپ رواں سال اکتوبر سے انڈیا میں کھیلا جائے گا جبکہ اس سے قبل رواں ماہ کے آخر میں پاکستان کی میزبانی میں ایشیا کپ بھی کھیلا جانا ہے۔
