پاکستان میں آج عید الاضحیٰ منائی جا رہی ہے، اس موقعے پر صدر پاکستان آصف علی زرداری اور وزیراعظم پاکستان شہباز شریف نے قوم کو مبارک باد پیش کی ہے۔

عید کے موقعے پر ملک بھر کے چھوٹے بڑے شہروں میں نماز عید کے اجتماعات ہوئے جبکہ شہریوں کی جانب سے سنت ابراہیمی کی پیروی کرتے ہوئے قربانی بھی کی جا رہی ہے۔

آج پاکستان کے علاوہ افغانستان، ایران اور انڈیا میں بھی عید الاضحیٰ منائی جا رہی ہے۔

صدر مملکت آصف علی زرداری کا پیغام

صدر آصف علی زرداری نے عید الاضحیٰ کے بابرکت موقعے پر پاکستانی قوم اور امت مسلمہ کو مبارک باد پیش کی ہے۔

سرکاری خبر رساں ادارے اے پی پی کے مطابق اپنے پیغام میں انہوں نے دعا کی کہ اللہ تعالیٰ اس مبارک دن پر مسلم دنیا اور پاکستان کو اپنی رحمتیں اور خوشیاں عطا فرمائے۔

صدر مملکت کے پیغام میں کہا گیا کہ ’عید الاضحیٰ اللہ کے دو منتخب نبیوں حضرت ابراہیم علیہ السلام اور حضرت اسماعیل علیہ السلام کی رضا کے لیے اپنے عزیز ترین اثاثوں کو قربان کرنے کی خواہش کی یاد دلاتا ہے۔‘

صدر کے پیغام میں کہا گیا کہ ’یہ ہمارے لیے ایک سبق ہے کہ کامیابی کی کلید آزمائشوں اور آزمائشوں کی حالت میں ثابت قدم رہنا اور اللہ تعالیٰ کی اطاعت کرنا ہے۔‘

صدر آصف علی زرداری نے قوم پر زور دیا کہ وہ اس موقع پر بھائی چارے، قربانی اور بے غرضی کی اقدار کے ساتھ اپنے عزم کا اعادہ کریں۔

وزیراعظم شہباز شریف کا پیغام

وزیراعظم محمد شہباز شریف نے عید الاضحیٰ کے پرمسرت موقعے پر پاکستانی قوم اور دنیا بھر کے مسلمانوں کو مبارک باد دی ہے۔

اے پی پی کے مطابق اپنے پیغام میں انہوں نے کہا کہ ’عید الاضحیٰ حضرت ابراہیم علیہ السلام کے اس غیر متزلزل عزم اور تیاری کی یاد دلاتی ہے کہ انہوں نے اپنے پیارے بیٹے حضرت اسماعیل علیہ السلام کو اللہ تعالیٰ کے حکم کے مطابق بغیر کسی ہچکچاہٹ کے قربان کر دیا تھا۔‘

وزیراعظم نے کہا کہ ’یہ دن لوگوں کو متحد کرنے اور بھائی چارے کے بندھن کو فروغ دینے کے ساتھ ساتھ ہمارے درمیان کم خوش قسمت لوگوں کی دیکھ بھال کرنے اور انہیں ہمارے اجتماعی جشن کا حصہ بنانے کے موقع کے طور پر بھی کام کرتا ہے۔‘

انہوں نے کہا کہ ’ہماری خواہش ہے کہ عید الاضحیٰ کے موقع پر دنیا بھر میں امن، خوشحالی اور محبت کا غلبہ ہو، ہم دنیا بھر کے بہت سے ممالک میں جاری تنازعات اور تشدد کو بھی دکھ اور تشویش کے ساتھ دیکھ رہے ہیں۔‘

بقول وزیراعظم: ’ہمیں فلسطین اور انڈیا کے غیر قانونی زیر قبضہ جموں و کشمیر کے عوام کی قربانیوں اور مصائب کو نہیں بھولنا چاہیے۔‘

ان کا مزید کہنا تھا کہ ’عید کے اس دن ہم اپنے فلسطینی اور کشمیری بھائیوں اور بہنوں کے لیے دعا گو ہیں، جو ظالمانہ غیر ملکی قبضے کا بہادری سے مقابلہ کر رہے ہیں لیکن اپنے حق خودارادیت کے حصول کے لیے اپنی جدوجہد میں ثابت قدم ہیں۔‘

انہوں نے دعا کی کہ ’عید الاضحیٰ کا جذبہ یکجہتی اور اتحاد کے پیغام کے ساتھ پوری امت مسلمہ کے لیے خوشحالی، کامیابی اور خوشیاں لے کر آئے۔‘

مسلح افواج کی جانب سے عید پر پیغام

مسلح افواج، چیئرمین جوائنٹ چیفس آف سٹاف کمیٹی (سی جے سی ایس سی) اور مسلح افواج کے سربراہان نے بھی عید الاضحیٰ کے موقع پر تمام پاکستانیوں کو مبارک باد پیش کی۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ ’یہ مقدس تقریب عظیم تر بھلائی کے لیے قربانی کے جذبے کی عکاسی کرتی ہے۔

’اس مبارک دن پر ہم ملک میں آزادی اور امن کے لیے اپنے شہیدوں اور غازیوں کے مقروض ہیں اور ان کی عظیم قربانیوں کو خراج تحسین پیش کرتے ہیں۔‘

اس سے قبل دنیا کے بیشتر مسلم ممالک میں کل عید الاضحیٰ منائی گئی جب کہ مناسک حج آخری مراحل میں داخل ہو چکے ہیں۔

کل سعودی عرب کے علاوہ متحدہ عرب امارات، قطر، کویت، ترکی، شام، اردن، عمان اور عراق میں عید منائی گئی جبکہ برطانیہ، امریکہ، کینیڈا اور آسٹریلیا میں مقیم مسلمان برادری نے بھی کل عید منائی۔